அங்கிள்ன்னு சொன்னப்ப இனிச்சதோ.. தம்பி விஜய் என்ற ஸ்டாலின்.. இரிட்டேட் ஆன தவெக தலைகள்!

ஸ்டாலின் வீடியோவில் சொன்னது என்ன?

சட்டமன்றத்தில் மிசா சிறைவாசம் மற்றும் தாடை எலும்பு முறிவு விவகாரம் குறித்து விஜய் பேசிய உடல்மொழிக்குப் பதிலடி கொடுக்கும் விதமாக மு.க. ஸ்டாலின் ஒரு வீடியோ வெளியிட்டார். அதில், முதல்வர் பதவியேற்ற பிறகு விஜய் தன்னை சந்திக்க வந்த நிகழ்வை ஸ்டாலின் நினைவு கூர்ந்தார்.

"நீங்க முதலமைச்சர் ஆனதும் என்னை சந்திக்க வீட்டுக்கு வந்தீங்க. உங்களை கரம் பிடித்து வரவேற்றேன். அப்போது நீங்க எங்கிட்ட, 'தேர்தல் பிரச்சாரத்தில் உங்களை விமர்சித்து பேசிவிட்டேன்... ரொம்ப சாரி சார்' என்று சொன்னீங்க. அதற்கு நான், 'பரவாயில்லை பிரதர், அதையெல்லாம் மனசில் வைச்சுக்கல... நீங்க இப்போது ஒரு மாநிலத்தின் முதலமைச்சர், யாரைப் பற்றி பேசும்போதும் கண்ணியத்தோடு பேசுங்கள்' என்று சொன்னேன். இதையெல்லாம் நீங்க மறந்துட்டீங்க போல" என்று ஸ்டாலின் அந்த வீடியோவில் கூறினார்.

தொடர்ந்து, ஆட்சியை சினிமா ஷூட்டிங் போலவும் ரீல்ஸ் எடுக்கும் இடமாகவும் மாற்றிவிட்டதாகக் குற்றம்சாட்டிய ஸ்டாலின், "தம்பி விஜய்... ஒரு முதலமைச்சருக்கான கண்ணியத்தோடு உங்கள் வார்த்தைகளும் உடல்மொழியும் இருக்க வேண்டும்" என்று அட்வைஸ் செய்தார்.

#### தவெக தலைவர்கள், தொண்டர்கள் கொதிப்பு

ஸ்டாலின் பேசிய கருத்துகளை விட, அவர் விஜய்யை "தம்பி விஜய்" என்று அழைத்ததுதான் தவெகவினரை அதிகம் எரிச்சலடையச் செய்துள்ளது. "விஜய் இப்போது ஒரு மாநிலத்தின் முதலமைச்சர். அவரை அரசியல்ரீதியாக விமர்சிப்பதில் தவறில்லை. ஆனால் ஒரு கட்சியின் தலைவராகவும், முதல்வராகவும் இருக்கும் அவரை 'தம்பி' என்று பொதுவெளியில் ஒருமை போல விளிப்பது அதிகாரத் தோரணை மற்றும் அரசியல் நாகரிகமற்ற செயல்" என்று தவெக முக்கிய நிர்வாகிகள் கொந்தளித்தனர்.

சமூக வலைதளங்களில் தவெக ஐடி விங் மற்றும் விஜய் ரசிகர்கள் பலரும் ஸ்டாலினின் இந்த வார்த்தைப் பிரயோகத்தைக் கடுமையாகக் கண்டித்து பதிவுகளைப் போடத் தொடங்கினர். ஒரு பொறுப்பான பதவியில் இருப்பவரை இப்படிப் பேசலாமா என்ற கேள்விகளையும் அவர்கள் எழுப்பினர்.

எக்ஸ் தளத்தில் வைரலாகும் பதிவு

இந்த விவாதம் உச்சக்கட்டத்தை எட்டிய நிலையில், எக்ஸ் (ட்விட்டர்) தளத்தில் பகிரப்பட்ட ஒரு பதிவு இணையத்தில் வேகமாகப் பரவியது. அதில், *"அங்கிள்ன்னு சொன்னப்ப இனிச்சதோ.. தம்பி விஜய் என்ற ஸ்டாலின்.. இரிட்டேட் ஆன தவெக தலைகள்!"* என்று தவெகவின் இரட்டை நிலைப்பாட்டை விமர்சித்து திமுக ஆதரவாளர்கள் பதிவிட்டிருந்தனர்.

"அங்கிள் சொன்னப்ப இனிச்சதா? - திமுகவினரின் அதிரடி பதிலடி

தவெகவினரின் இந்த எதிர்ப்புக்கு திமுக ஐடி விங்கும் நிர்வாகிகளும் உடனே பதிலடி கொடுக்கத் தொடங்கினர். "தேர்தல் பிரச்சாரக் களங்களில் முதலமைச்சராக இருந்த மு.க. ஸ்டாலினை 'ஸ்டாலின் அங்கிள்... ஸ்டாலின் அங்கிள்...' என்று விஜய் மேடைகளில் கிண்டலாகவும் ஏளனமாகவும் பேசியபோது இந்த நாகரிகம் எங்கே போனது? அப்போது தவெகவினருக்கு அது இனித்ததா?" என்று திமுகவினர் கேள்விகளை அடுக்கினர்.

மேலும், "வயதிலும் அரசியல் அனுபவத்திலும் ஸ்டாலின் விஜய்யை விட பல ஆண்டுகள் மூத்தவர். அப்படியிருக்க, பண்போடு 'தம்பி' என்று அழைத்ததில் என்ன தவறு இருக்கிறது? அங்கிள் என்று கூப்பிட்டு அரசியல் செய்தவர்கள், இன்று தம்பி என்ற ஒற்றை வார்த்தைக்கு இவ்வளவு பதறுவது ஏன்?" என்று திமுக தரப்பில் சமூக வலைதளங்களில் காரசாரமான விவாதங்கள் முன்வைக்கப்பட்டு வருகின்றன.

தேர்தல் காலத்தில் 'அங்கிள்' என்று தொடங்கிய வார்த்தை விளையாட்டு, இன்று ஆட்சி மாற்றத்திற்குப் பின் 'தம்பி' என்று மாறி இணையத்தில் அனல் பறக்கும் ட்ரோல் யுத்தமாக உருவெடுத்துள்ளது.