சென்னைக்கு 2-வது விமான நிலையம் ஏன் கட்டாயம்? மிக முக்கியமான கேள்விக்கு பதில் இதோ!

மீனம்பாக்கம் விரிவாக்கம்: குறுகிய காலத் தீர்வு மட்டுமே

சென்னையில் தற்போதைய விமானப் போக்குவரத்து நெரிசலைக் குறைக்க முனையம் 3 மற்றும் முனையம் 5 விரிவாக்கப் பணிகள் உதவக்கூடும். ஆனால், இது தற்காலிக நிவாரணம் மட்டுமே. இந்திய விமான நிலையங்கள் ஆணையத்தின் கணிப்புப்படி, 2031-32-க்குள் சென்னையின் பயணிகள் போக்குவரத்து 5.09 கோடியாகவும், 2032-33-க்குள் 4.64 கோடியாகவும் உயரும். மேலும், 2028 அல்லது 2032-க்குள் சென்னை விமான நிலையம் தனது முழு உச்சபட்சத் திறனை எட்டிவிடும் என விமானப் போக்குவரத்து அமைப்பான CAPA மற்றும் மாநில அரசின் கொள்கைக் குறிப்புகள் தெரிவிக்கின்றன.

தென் மாநிலங்களுடன் நிலவும் கடும் போட்டி

அண்டை நகரங்களான பெங்களூரு மற்றும் ஹைதராபாத் ஆகியவற்றுடன் ஒப்பிடும்போது, சென்னையின் உள்கட்டமைப்பு இடைவெளி தெளிவாகத் தெரிகிறது:

பெங்களூர் கெம்பேகவுடா விமான நிலையம்: 2025-26 நிதியாண்டில் 4.44 கோடி பயணிகளைக் கையாண்டுள்ளது. இதன் முனையம் 2 மட்டும் ஆண்டுக்கு 6 கோடி பயணிகளைக் கையாளும் வசதி கொண்டது.

ஹைதராபாத் ராஜீவ் காந்தி விமான நிலையம்: 3.05 கோடி பயணிகளைக் கையாண்டு வளர்ச்சி கண்டு வருகிறது. அடுத்த 5 ஆண்டுகளில் இதன் திறனை 8 கோடியாக உயர்த்தத் திட்டமிடப்பட்டுள்ளது.

சென்னை விமான நிலையம்: 3 கோடி பயணிகள் கையாளும் திறன் கொண்ட நிலையில், 2025-26-ல் 2.30 கோடி பயணிகளையே கையாண்டுள்ளது. விமான இயக்கத்திலும் பெங்களூரின் 2.81 லட்சத்துடன் ஒப்பிடுகையில் சென்னை 1.56 லட்சம் என்ற அளவிலேயே பின்தங்கியுள்ளது.

தொழில் முதலீடுகள், பன்னாட்டு நிறுவனங்கள் மற்றும் திறமையான பணியாளர்களை ஈர்ப்பதில் சென்னை தொடர்ந்து பெங்களூர், ஹைதராபாத்துடன் போட்டியிடுகிறது. இந்தச் சூழலில் நவீன விமான நிலைய உள்கட்டமைப்பு இல்லாவிட்டால் முதலீடுகள் அண்டை மாநிலங்களுக்குச் செல்லும் அபாயம் உள்ளதாக தொழில்துறை அமைப்புகள் எச்சரிக்கின்றன.

சரக்கு போக்குவரத்தும் தொழில் வளர்ச்சியும்

சென்னை மற்றும் அதன் சுற்றுவட்டாரப் பகுதிகள் வாகன உதிரிபாகங்கள், எலக்ட்ரானிக்ஸ், நவீன இயந்திரங்கள் மற்றும் உற்பத்தித் துறையின் முக்கிய மையமாகத் திகழ்கின்றன. 2024-25 நிதியாண்டில் பெங்களூரு 5.32 லட்சம் டன் சரக்குகளைக் கையாண்ட நிலையில், சென்னை 3.79 லட்சம் டன்களை மட்டுமே கையாண்டது.

டிட்கோ மற்றும் லூயிஸ் பெர்கர் தயாரித்த பரந்தூர் திட்ட வரைவில், எதிர்காலத்தில் 10 கோடி பயணிகள் மற்றும் 2.3 லட்சம் சதுர மீட்டர் சரக்கு முனையம் கையாளும் வகையில் திட்டம் வகுக்கப்பட்டிருந்தது. குறிப்பாக சரக்கு விமானங்களுக்கான தனித் தளங்கள் மற்றும் பராமரிப்பு வசதிகள் திட்டமிடப்பட்டிருந்தன.

ஏற்கனவே பல ஆண்டுகளாக நடைபெற்று வந்த பரந்தூர் திட்டம் கைவிடப்பட்டுள்ளதால், தற்போது மீண்டும் புதிய இடத்தை தேர்வு செய்தல், சாத்தியக்கூறு ஆய்வுகள், தொழில்நுட்ப மற்றும் சுற்றுச்சூழல் அனுமதிகள் பெறுதல் என அனைத்து நடைமுறைகளையும் முதலிலிருந்து தொடங்க வேண்டியுள்ளது. புதிய சர்வதேச விமான நிலையத்தை விரைந்து அமைப்பதே தமிழகத்தின் எதிர்காலப் பொருளாதார வளர்ச்சிக்கும் தொழில் கட்டமைப்புக்கும் வலுசேர்க்கும்.