தமிழினத்தின் தலையெழுத்தை மாற்றிய ‘தி கிரேட்’ அண்ணா! திராவிடத்தின் பிதாமகன்! தமிழ்நாட்டின் காட் பாதர்

எளிய தொடக்கமும் எழுச்சிமிகு பேச்சாற்றலும்

காஞ்சிபுரத்தில் பிறந்த அண்ணா, சென்னை பச்சையப்பன் கல்லூரியில் பொருளாதாரம் மற்றும் அரசியலில் முதுகலை பட்டம் பெற்றவர். தந்தை பெரியாரின் சுயமரியாதை இயக்கத்திலும், திராவிடர் கழகத்திலும் இணைந்து தன் பொது வாழ்க்கையைத் தொடங்கினார். பெரியாரின் சிந்தனைகளை மக்களிடம் கொண்டு சேர்க்கும் முதன்மைச் செயலாளராக இயங்கினார்.

அண்ணாவின் மிகப்பெரிய பலம் அவரது தமிழ் ஆற்றல். எதுகை மோனையுடன் கூடிய அவரது மேடைப் பேச்சு, அதுவரை சாமானிய மக்களுக்குப் புரியாமல் இருந்த அரசியலையும் சமூகநீதியையும் பாமர மக்களுக்கும் எளிதாகப் புரிய வைத்தது. மேடைகளில் மட்டுமல்லாமல், நாடகங்கள், கட்டுரைகள், சிறுகதைகள் மற்றும் சினிமா திரைப்படங்கள் வழியாகவும் தனது சமூகச் சிந்தனைகளை மக்களிடம் கொண்டு சேர்த்தார்.

அரசியலின் மாபெரும் திருப்புமுனை

1949-ஆம் ஆண்டு திராவிட முன்னேற்றக் கழகத்தை அண்ணா தொடங்கியபோது, அதை ஒரு சாதாரண அரசியல் கட்சி என்றுதான் பலர் நினைத்தார்கள். ஆனால், 1967-ஆம் ஆண்டு நடந்த சட்டமன்றத் தேர்தலில், அதுவரை இந்திய அரசியல் களத்தில் தோல்வியையே சந்திக்காத அகில இந்திய காங்கிரஸ் கட்சியை வீழ்த்தி, திமுக ஆட்சியைப் பிடித்தது.

டெல்லி மைய அரசியலுக்கு மட்டுமே கட்டுப்பட்டு இருந்த மாநில அரசியலை, "மாநில சுயாட்சி மற்றும் மொழி உரிமை" என்ற திசைக்கு மாற்றியமைத்தவர் அண்ணா. இந்திய மாநில அரசியலில் ஒரு பிராந்தியக் கட்சி தேசியக் கட்சியை வீழ்த்தி ஆட்சியைப் பிடித்த முதல் வரலாற்று நிகழ்வு அண்ணாவால் மட்டுமே சாத்தியமானது.

தமிழ்நாட்டின் 'காட்ஃபாதர்'

அண்ணா முதலமைச்சராக இருந்த காலம் மிகக் குறைவு என்றாலும், அவர் எடுத்த முடிவுகள் அடுத்த பல தலைமுறைகளுக்கான தமிழ்நாட்டின் வாழ்வியலைத் தீர்மானித்தன:

தமிழ்நாடு என்ற பெயர் மாற்றம்: நமது மாநிலத்திற்கு "மெட்ராஸ் ஸ்டேட்" என்றிருந்த பெயரை மாற்றி, "தமிழ்நாடு" என்று சட்டமன்றத்தில் தீர்மானம் நிறைவேற்றி அதிகாரப்பூர்வமாகப் பெயர் சூட்டினார்.

இருமொழிக் கொள்கை: இந்தி திணிப்பைத் தடுத்து நிறுத்தி, தமிழும் ஆங்கிலமும் மட்டுமே தமிழ்நாட்டின் கல்விக் கொள்கை என்ற இருமொழித் திட்டத்தைச் சட்டமாக்கினார்.

சுயமரியாதைத் திருமணச் சட்டம்: சடங்குகள் மற்றும் புரோகிதர்கள் இல்லாமல் நடக்கும் சுயமரியாதைத் திருமணங்களுக்குச் சட்டப்பூர்வ அங்கீகாரம் வழங்கிப் புரட்சி செய்தார்.

ஏழைகளின் பசி போக்கிய திட்டம்: எளிய மக்களும் பசியின்றி வாழ 'ஒரு ரூபாய்க்கு ஒரு படி அரிசி' திட்டத்தைத் தொடங்கி வைத்துச் சமூக நலத் திட்டங்களுக்கு வழிகாட்டினார்.

மாபெரும் ராஜதந்திரி

அண்ணா வெறும் அரசியல்வாதி அல்ல.. ஒரு மாபெரும் ராஜதந்திரி. மாற்றுக் கருத்துடையவர்களையும் மதித்துப் பேசும் பண்பு அவரிடம் நிறைந்து வழந்தது. "மாற்றான் தோட்டத்து மல்லிகைக்கும் மணம் உண்டு" என்ற அவரது பொன்மொழி, ஜனநாயகத்தில் எதிராளியையும் மதிக்க வேண்டும் என்பதற்கு மிகச்சிறந்த உதாரணம்.

"கடமை, கண்ணியம், கட்டுப்பாடு" என்ற மூன்று சொற்களைத் தன் தொண்டர்களுக்கும் மக்களுக்கும் கற்பித்தார். அதிகாரத்தில் இருந்தபோதும் ஆடம்பரம் இல்லாமல், சென்னை நங்கநல்லூரில் ஒரு சிறிய வீட்டிலேயே வாழ்ந்து எளிமைக்கு இலக்கணமாகத் திகழ்ந்தார்.

இன்றைய அரசியல் பாதையின் வழிகாட்டி

இன்று தமிழ்நாட்டில் இயங்கி வரும் அனைத்து முக்கிய அரசியல் கட்சிகளுக்கும், தலைவர்களுக்கும் அண்ணாவே முதன்மை வழிகாட்டி. கருணாநிதி, எம்.ஜி.ஆர், ஜெயலலிதா முதல் இன்றைய அரசியல் தலைவர்கள் வரை அனைவருமே அண்ணாவின் சிந்தனைகளையும், அவர் அமைத்துக் கொடுத்த அரசியல் பாதையையும்தான் பின்பற்றி வருகிறார்கள்.

செப்டம்பர் 15 அன்று, அண்ணாவின் பிறந்தநாளை முன்னிட்டுத் தமிழ்நாடு அரசு சார்பில் சீருடைப் பணியாளர்களுக்குக் 'முதலமைச்சரின் அண்ணா பதக்கங்கள்' வழங்கப்பட்டு கௌரவிக்கப்படுகிறது.

ஆட்சி, அதிகாரம், புகழ் என அனைத்தையும் தாண்டி, தமிழ்மக்களின் இதயங்களில் "அண்ணா" என்ற ஒற்றைச் சொல்லால் அரியணை அமைத்து அமர்ந்திருப்பவர் பேரறிஞர் அண்ணா. மொழியையும், இனத்தையும், மாநில உரிமையையும் தன் மூச்சாகக் கொண்டு வாழ்ந்த அந்த மாபெரும் தலைவரின் நினைவுகள், காலங்கள் கடந்தும் ஒவ்வொரு தமிழனின் நெஞ்சிலும் என்றும் நிலைத்திருக்கும்.