ராகுல்தான் பிரதமர் வேட்பாளர்.. விஜய் முதல்வராகவே தொடர்வார்.. தவெகவுக்கு மாணிக்கம் தாகூர் குட்டு

தேசிய அளவில் ராகுல் காந்தியைத் தவிர வேறு எந்தவொரு நபருக்கும் பிரதமர் வேட்பாளர் இடத்தை விட்டுக்கொடுக்க முடியாது என்பதில் காங்கிரஸ் மிகக் கறாராக இருப்பதை அவரது பேட்டி பட்டவர்த்தனமாக்கியுள்ளது.

விஜய் முதல்வராக இருக்கட்டும்... ராகுல்தான் பிரதமர்!

செய்தியாளர் சந்திப்பில் பேசிய மாணிக்கம் தாகூர், தமிழகத்தில் விஜய் தலைமையிலான தவெக அரசு ஊழலற்ற, புதிய நிர்வாகக் கட்டமைப்பை உருவாக்க முயற்சி செய்து வருவதாகவும், அதற்குத் துணை நிற்பது காங்கிரஸ் கட்சியின் கடமை என்றும் தெரிவித்தார். ஆனால், அதே நேரத்தில் தேசிய அரசியல் என்று வரும்போது தங்களின் தலைவர் ராகுல் காந்தியே தவிர்க்க முடியாத பிரதமர் வேட்பாளர் என்பதில் எந்த மாற்றுக் கருத்தும் இல்லை என அவர் திட்டவட்டமாகக் குறிப்பிட்டார்.

"தமிழகத்தின் முதலமைச்சராக விஜய் சிறப்பாகச் செயல்படுகிறார்.. அவர் அந்தப் பதவியிலேயே தொடர்ந்து நீடிக்க வேண்டும். ஆனால், மத்தியில் ஆட்சி மாற்றத்தை ஏற்படுத்தி நரேந்திர மோடியை வீழ்த்தும் தேசிய அளவிலான பலம் ராகுல் காந்திக்கு மட்டுமே உண்டு. எனவே 2029-ல் ராகுல் காந்தியே எங்களது பிரதமர் வேட்பாளர்" என்று மாணிக்கம் தாகூர் மிக அழுத்தமாகக் கூறியுள்ளார்.

தவெகவினருக்குக் கடும் கண்டனம்: ஜோசியர்கள் பேச்சுக்கு பதிலளிக்க முடியாது!

சமீபத்தில் தவெக எம்.எல்.ஏ. கனிமொழி சந்தோஷ் உள்ளிட்ட நிர்வாகிகள் சிலர், "ராகுல் காந்தி எதிர்காலத்தில் விஜய்யை பிரதமராக்குவார்" என்று கருத்துத் தெரிவித்திருந்ததைச் சுட்டிக்காட்டி செய்தியாளர்கள் எழுப்பிய கேள்விக்கு மாணிக்கம் தாகூர் காட்டமாக பதிலளித்தார்.

"தெருவுக்குத் தெரு கிளம்பும் ஜோசியர்களின் பேச்சுகளுக்கெல்லாம் காங்கிரஸ் கட்சியால் பதில் சொல்ல முடியாது" என்று அவர் நேரடியாகவே தவெகவினரைச் சாடினார். தவெகவினர் இன்னும் சினிமா ரசிகர் மன்ற மனநிலையிலிருந்து வெளியே வராமல் செயல்பட்டு வருவதாக விமர்சித்த அவர், சில ஊடகங்களும் நபர்களும் இரு கட்சிகளுக்கும் இடையே மோதலை உருவாக்கப் பொய்க் கதைகளை அவிழ்த்து விடுவதாகவும், இது முழுக்க முழுக்க ஒரு திசைதிருப்பும் உத்தி என்றும் சாடினார்.

அமைச்சரவையை விட்டு வெளியேறும் எச்சரிக்கை!

ஏற்கனவே தமிழக காங்கிரஸ் அமைச்சர் ராஜேஷ்குமார் கன்னியாகுமரி பொதுக்கூட்டத்தில் பேசும்போது, "2029-ல் ராகுல் காந்தியை தவெக பிரதமர் வேட்பாளராக ஏற்றுக்கொள்ளாவிட்டால், தமிழக அமைச்சரவையில் உள்ள இரண்டு காங்கிரஸ் அமைச்சர்களும் உடனடியாகப் பதவி விலகுவார்கள்" என்று வெளிப்படையாகவே எச்சரித்திருந்தார். அதேபோல் மற்றொரு காங்கிரஸ் எம்பி, "ராகுல் காந்தியை முன்னிறுத்தாவிட்டால் 200 சதவீதம் காங்கிரஸ் கூட்டணியை விட்டு வெளியேறும்" என்று ஆவேசப்பட்டிருந்தார்.

இத்தகைய அழுத்தமான சூழலில், மாணிக்கம் தாகூரும் தற்போது வெளிப்படையாகவே விஜய்யின் எல்லை தமிழக முதலமைச்சர் பதவி மட்டுமே என்பதைச் சுட்டிக்காட்டியிருப்பது, ஆளுங்கூட்டணிக்குள் நடக்கும் அதிகாரப் போட்டியின் தீவிரத்தை உணர்த்துகிறது.

விஜய்யின் மௌனமும் டெல்லிக்கு வைக்கும் செக்கும்!

காங்கிரஸ் தலைவர்கள் இவ்வளவு பகிரங்கமாக மைக் பிடித்து எச்சரித்த பிறகும், முதலமைச்சர் விஜய் இதுவரை அமைச்சர்களுக்கோ நிர்வாகிகளுக்கோ எந்த வாய்ப்பூட்டும் போடவில்லை. வட மாநிலங்களில் '#VijayThalapathy' என்ற பெயரில் இந்தியில் பரப்பப்படும் தீவிர ரீல்ஸ் பிரச்சாரங்களையும், உ.பி., பிகார் உள்ளிட்ட மாநிலங்களில் கட்சிக் கட்டமைப்பை உருவாக்கும் பணிகளையும் தவெக தரப்பு பின்வாங்காமல் முன்னெடுத்து வருகிறது.

தனித்து 35% வாக்குகளைப் பெற்று, 22 கட்சிகள் கொண்ட திமுக-காங்கிரஸ் கூட்டணியை எதிர்த்து நின்றே கோட்டையைப் பிடித்தவர் விஜய் என்பதால், காங்கிரஸின் எந்தவொரு மிரட்டலுக்கும் அடிபணியாமல், ராகுல் காந்தியின் நிபந்தனைகளுக்குத் தலைவணங்காமல் தனக்கான தேசியத் தளத்தை விஜய் அமைதியாக நகர்த்தி வருகிறார்.

ராகுல் காந்திதான் பிரதமர் வேட்பாளர் என்பதில் காங்கிரஸ் உறுதியாக நிற்கும் அதேவேளையில், தனது 2029 பிரதமர் கனவைக் கைவிட தவெக தயாராக இல்லாததால், இரு கட்சிகளுக்கும் இடையேயான இந்த அரசியல் கயிறு இழுக்கும் போட்டி எந்த நேரத்திலும் கூட்டணிக் கப்பலை மூழ்கடிக்கும் நிலைக்கு நகர்ந்து கொண்டிருக்கிறது.