சொதப்பிய விஜய்! ஸ்டார்ட்அப் சிஇஓ நியமனத்தில் தொடரும் இழுபறி.. 400 விண்ணப்பங்கள் வந்தும் தாமதம் ஏன்?

முந்தைய தலைமை செயல் அதிகாரி ஆட்சி மாற்றட்டத்திற்கு பின் பதவி விலகியதைத் தொடர்ந்து, புதிய சிஇஓ-வை தேர்ந்தெடுப்பதற்கான விண்ணப்பங்களை விஜய் அரசு வரவேற்றது. தொழில் துறை மற்றும் முதலீட்டு நிறுவனங்களில் அனுபவமுள்ள முன்னணி நிபுணர்கள், கார்ப்பரேட் ஆளுமைகள் மற்றும் புத்தொழில் நிறுவனங்களை வழிநடத்தியவர்கள் என 400-க்கும் மேற்பட்டோர் இப்பதவிக்காக விண்ணப்பித்தனர். இதில் தகுதியான நபர்களை நேர்காணல் செய்து, இறுதிக்கட்டமாக மூன்று பேர் கொண்ட பட்டியலை தேர்வுக் குழு இறுதி செய்துள்ளதாக தலைமைச் செயலக வட்டாரங்கள் தெரிவிக்கின்றன.

இருப்பினும், அந்த மூன்று பேரில் ஒருவரைத் தேர்வு செய்து விஜய் அரசு முறைப்படி உத்தரவு பிறப்பிப்பதில் கடந்த சில வாரங்களாக எந்தவொரு முன்னேற்றமும் காணப்படவில்லை. தேர்வுப் பட்டியல் இறுதி செய்யப்பட்டு பல வாரங்கள் கடந்தும், அரசு நிர்வாகம் இறுதி முடிவை எடுப்பதில் தயக்கம் காட்டி வருவது பல்வேறு சந்தேகங்களை எழுப்பியுள்ளது.

தலைமை இல்லாத ஒரு கப்பல்

தலைமை இல்லாத ஒரு கப்பல் சரியான திசையில் பயணிக்க முடியாது என்பதைப் போல, புதிய தலைமை தாமதமாவது மாநிலத்தின் புத்தொழில் வளர்ச்சிக்கு பெரும் முட்டுக்கட்டையாக மாறியுள்ளது. கடந்த சில ஆண்டுகளில் தமிழகத்தில் ஸ்டார்ட்அப் நிறுவனங்களின் எண்ணிக்கை பன்மடங்கு அதிகரித்ததுடன், இரண்டாம் மற்றும் மூன்றாம் நிலை நகரங்களுக்கும் தொழில்முனைவு விரிவடைந்தது. ஆனால், தற்போது அமைப்பின் உச்சபட்ச முடிவுகளை எடுக்க முழுநேரத் தலைவர் இல்லாததால், கொள்கை ரீதியான திட்டங்கள், விதை நிதி ஒதுக்கீடுகள் மற்றும் அரசு மானியப் பகிர்வுகள் உள்ளிட்ட பல நடைமுறைகள் முடங்கும் அபாயம் ஏற்பட்டுள்ளது.

"ஒரு அரசு சார்ந்த புத்தொழில் அமைப்புக்கு தெளிவான பார்வையும், துணிச்சலான வழிகாட்டுதலும் கொண்ட தலைவர் உடனடியாகத் தேவை. முழுநேர சிஇஓ இல்லாததால் நிர்வாக மட்டத்தில் முடிவுகள் தள்ளிப்போகின்றன. முதலீட்டாளர்களை ஈர்ப்பதிலும் சர்வதேச தளங்களில் தமிழக ஸ்டார்ட்அப்களை முன்னிறுத்துவதிலும் தொய்வு ஏற்பட்டுள்ளது" என இளம் தொழில்முனைவோர் வேதனை தெரிவிக்கின்றனர்.

நீண்டகால தாமதம் மற்றும் நிச்சயமற்ற தன்மை

மேலும், இந்த நீண்டகால தாமதம் மற்றும் நிச்சயமற்ற தன்மை, தமிழகத்தின் புத்தொழில் துறையை வலுப்படுத்துவதில் அரசு காட்டும் உண்மையான அக்கறை குறித்து பல கேள்விகளை எழுப்பியுள்ளது. அண்டை மாநிலங்கள் புதிய சலுகைகளுடனும், அதிரடித் திட்டங்களுடனும் முதலீடுகளையும் புதுமை கண்டுபிடிப்புகளையும் ஈர்க்கப் போட்டியிடும் வேளையில், தமிழகம் தனது தலைமைப் பொறுப்பைக்கூட நிரப்பாமல் மெத்தனமாக இருப்பது முதலீட்டாளர்கள் மத்தியிலும் தயக்கத்தை உருவாக்க வாய்ப்புள்ளது.

எனவே, குறுகிய கால நலன்களைத் தாண்டி, திறமையும் அனுபவமும் மிக்க ஒரு வலுவான தலைவரை தாமதமின்றி நியமித்து, ஸ்டார்ட்அப் தமிழ்நாடு திட்டங்களுக்கு மீண்டும் புத்துயிர் ஊட்ட வேண்டும் என்பதே தொழில்முனைவோரின் ஒற்றைக் கோரிக்கையாக உள்ளது.