சென்னை: இந்தியாவில் சர்க்கரை விலை கடந்த ஒரு மாதத்தில் மட்டும் சுமார் 30% வரை கிடுகிடுவென உயர்ந்துள்ளது. மத்திய நுகர்வோர் விவகார அமைச்சகத்தின் தரவுகளின்படி, கடந்த ஜூலை 24-ஆம் தேதி ஒரு கிலோ சர்க்கரையின் சராசரி சில்லறை விலை ரூ.48.73 ஆக இருந்தது. ஆனால், ஆகஸ்ட் 24-ஆம் தேதி இது ரூ.63.05 ஆக அதிகரித்தது. சில சில்லறை மார்க்கெட்டுகளில் ஒரு கிலோ சர்க்கரை ரூ.65 முதல் ரூ.75 வரை விற்கப்படுகிறது.
பண்டிகைக் காலம் நெருங்கும் வேளையில் ஏற்பட்டுள்ள இந்த விலை உயர்வு, நடுத்தர மற்றும் ஏழை எளிய குடும்பங்களின் அன்றாட வாழ்க்கையில் கூடுதல் சுமையை ஏற்படுத்தியுள்ளது.
சர்க்கரை என்பது ஒவ்வொரு வீட்டிலும் தினமும் பயன்படுத்தப்படும் மிக முக்கியமான அத்தியாவசியப் பொருள். இந்த விலை ஏற்றம் சாமானிய மக்களைப் பல வழிகளில் பாதிக்கிறது: அன்றாட மளிகைச் செலவு அதிகரிப்பு: காலையில் குடிக்கும் டீ, காபி முதல் குழந்தைகளுக்கான பால், தின்பண்டங்கள் வரை அனைத்திற்கும் சர்க்கரை தேவைப்படுகிறது. மாதத்திற்கு 4 முதல் 5 கிலோ சர்க்கரை வாங்கும் ஒரு சராசரி குடும்பத்திற்கு மளிகைச் செலவு உடனடியாக கூடுகிறது. பண்டிகை கால சுமை: விநாயகர் சதுர்த்தி, தீபாவளி, தசரா போன்ற பண்டிகைகள் அடுத்தடுத்து வரவுள்ளன. பண்டிகைக் காலங்களில் இனிப்புகள், பலகாரங்கள் செய்ய சர்க்கரை அதிகளவில் வாங்கப்படும். விலை உயர்வால் இல்லத்தரசிகள் தங்கள் பண்டிகை பட்ஜெட்டை குறைக்க வேண்டிய நிலைக்குத் தள்ளப்பட்டுள்ளனர். ஹோட்டல், டீக்கடை மற்றும் ஸ்வீட்களின் விலை உயர்வு: சர்க்கரை விலை அதிகரிப்பதால் டீக்கடைகளில் டீ, காபி விலையும், பேக்கரிகள் மற்றும் உணவகங்களில் இனிப்புகள், பிஸ்கட், குளிர்பானங்களின் விலையும் உயர வாய்ப்புள்ளது. இது சாமானியர்களின் அன்றாட பாக்கெட் செலவை நேரடியாகப் பாதிக்கும். ஒட்டுமொத்த சமையலறை பட்ஜெட் தடுமாற்றம்: ஏற்கனவே பருப்பு, எண்ணெய், காய்கறிகள் போன்ற அத்தியாவசியப் பொருட்களின் விலை ஏறி இறங்கும் நிலையில், சர்க்கரை விலையும் கூடியிருப்பது மாதச் சம்பளத்தில் வாழும் குடும்பங்களின் சேமிப்பை நேரடியாகக் கரைக்கும். மத்திய அரசு மற்றும் சந்தை நிபுணர்கள் இதற்குப் பல காரணங்களைக் குறிப்பிடுகின்றனர்: மோசமான வானிலை மற்றும் பயிர் பாதிப்பு: கரும்பு பயிரிடப்படும் முக்கிய மாநிலங்களில் பெய்த அதிக கனமழை, வயல்களில் தேங்கிய தண்ணீர் மற்றும் அழுகல் போன்ற பயிர் நோய்களால் கரும்பு விளைச்சல் குறைந்துள்ளது. இதனால் நாட்டின் சர்க்கரை உற்பத்தி 34.3 மில்லியன் டன்னிலிருந்து 30.6 மில்லியன் டன்னாகக் குறையலாம் என கணிக்கப்பட்டுள்ளது. பண்டிகைக் கால தேவை: பண்டிகைகள் வருவதால் சந்தையில் சர்க்கரைக்கான தேவை வழக்கத்தை விட அதிகரித்துள்ளது. விலை மேலும் உயரும் என்ற நோக்கில் சில வியாபாரிகள் சர்க்கரையை பதுக்குவதும் இதற்கு ஒரு காரணம். உலக சந்தையிலும் சர்க்கரை தட்டுப்பாடு ஏற்பட்டு, சர்வதேச விலை 16% வரை உயர்ந்துள்ளது. அதேசமயம், சக்கரை எத்தனால் தயாரிப்புக்காக சர்க்கரை அதிகம் திருப்பி விடப்படுவதால்தான் இந்த விலை உயர்வு என்ற கருத்தை அரசு மறுத்துள்ளது. எத்தனாலுக்கான சர்க்கரை பயன்பாடு 12%லிருந்து 9%-ஆக குறைந்துவிட்டதாகவும், சோளம் போன்ற தானியங்களே இதற்கு அதிகம் பயன்படுவதாகவும் தெளிவுபடுத்தியுள்ளது. பருவநிலை மாற்றத்தால் ஏற்படும் அதீத மழை மற்றும் வறட்சி போன்ற வானிலை மாற்றங்கள், உணவுப் பொருட்களின் விலையை அடிக்கடி உயர்த்தி பணவீக்கத்தை நீண்ட காலத்திற்கு நிலைக்கச் செய்துவிடும் என்று ரிசர்வ் வங்கி தொடர்ந்து எச்சரித்து வருகிறது. காய்கறிகள், சர்க்கரை போன்ற உணவுப் பொருட்களின் விலை உயர்வு, நாட்டின் ஒட்டுமொத்தப் பொருளாதாரத்திலும் விலைவாசி உயர்வுக்கு வழிவகுக்கும் என சுட்டிக்காட்டப்பட்டுள்ளது. விலையைக் கட்டுப்படுத்தவும், பதுக்கலைத் தடுக்கவும் மத்திய அரசு பல நடவடிக்கைகளை எடுத்துள்ளது. முக்கியமாக வியாபாரிகள் 400 டன்னுக்கு மேல் சர்க்கரையை சேமித்து வைக்க தடை விதிக்கப்பட்டுள்ளது. ஆலைகளில் உள்ள சர்க்கரை இருப்பு தீவிரமாக ஆய்வு செய்யப்பட்டு வருகிறது. 10 லட்சம் டன் வரை கச்சா சர்க்கரையை வரியின்றி இறக்குமதி செய்ய அனுமதி அளிக்கப்பட்டுள்ளது. அக்டோபர் 15-ஆம் தேதியே புதிய கரும்பு அரவை பருவத்தைத் தொடங்க ஆலைகளுக்கு உத்தரவிடப்பட்டுள்ளது. நாட்டில் அக்டோபர் மாதம் வரை போதுமான சர்க்கரை இருப்பு உள்ளதால், இந்த நடவடிக்கைகளின் மூலம் விரைவில் சர்க்கரை விலை குறையும் என அரசு தெரிவித்துள்ளது.குடும்ப பட்ஜெட்டை இது எப்படி நேரடியாக பாதிக்கும்?*
விலை உயர்வுக்கு என்ன காரணம்?