சென்னை: தமிழகத்தில் புதிய ஆட்சிப் பொறுப்பேற்றுள்ள நிலையில், கோட்டை வட்டாரத்தில் யாரும் எதிர்பாராத ஒரு பரபரப்புத் தகவல் கசிந்துள்ளது. முதலமைச்சர் சி. ஜோசப் விஜய் தரப்பிலிருந்து மிக முக்கிய மூத்த ஐஏஎஸ் அதிகாரிகளுக்கு அதிரடியான ரகசியத் தகவல் (Unofficial Order) ஒன்று நேரடியாகக் கடத்தப்பட்டுள்ளது. அரசு நிர்வாகத்தை எப்படிக் கையாள வேண்டும் என்பது குறித்து முதல்வர் அனுப்பியுள்ள இந்த அதிரடித் தகவல், ஐஏஎஸ் வட்டாரத்தை கவனிக்க வைத்துள்ளது.
புதிதாகப் பொறுப்பேற்றுள்ள அமைச்சரவையில் பெரும்பாலானோர் அரசு நிர்வாகத்திற்கு முற்றிலும் புதியவர்கள். கோப்புகளை எப்படிக் கையாள்வது, திட்டங்களை எப்படிச் செயல்படுத்துவது என்பதில் அவர்களுக்குப் போதிய கள அனுபவமில்லை. இதனால் ஆட்சித் தொடக்கத்திலேயே நிர்வாகத்தில் தொய்வு ஏற்பட்டுவிடக் கூடாது என்பதில் முதல்வர் விஜய் மிகத் தீவிரமாக இருக்கிறார். இதைக் கருத்தில் கொண்டே, அதிகாரிகளுக்கு இந்த ரகசிய உத்தரவு பிறப்பிக்கப்பட்டுள்ளது.
அதிகாரிகளுக்கு அனுப்பப்பட்டுள்ள அந்த ரகசியத் தகவலில், "அமைச்சர்களுக்குத் துறை சார்ந்த அனுபவக் குறைவு இருக்கிறது என்பது யதார்த்தம். எல்லோரும் புதியவர்கள். ஒன்றிரண்டு பேர் மட்டுமே நிர்வாகம் தெரிந்தவர்கள். அதைச் சரிசெய்யும் பொறுப்பு உங்களுடையது. அமைச்சர்களை எதிர்பாராமல், துறைகளின் அன்றாடச் செயல்பாடுகளையும் முக்கியத் திட்டங்களையும் அதிகாரிகளாகிய நீங்களே முன்னின்று நடத்த வேண்டும்" என்று மிகவும் வெளிப்படையாகத் தெரிவிக்கப்பட்டுள்ளது. அமைச்சர்கள் புதியவர்கள் என்பதால் கோப்புகள் தேங்கி நிற்கக் கூடாது என்றும், மாநிலத்தின் வளர்ச்சித் திட்டங்கள் எக்காரணம் கொண்டும் முடங்கிவிடக் கூடாது என்றும் அந்தத் தகவலில் அறிவுறுத்தப்பட்டுள்ளது. அமைச்சர்களுக்குத் துறை சார்ந்த நடைமுறைகளைக் கற்றுக்கொடுத்து, நிர்வாகச் சக்கரத்தைச் சீராக இயக்குவது அதிகாரிகளின் கடமை என்பது இதன் மூலம் தெளிவுபடுத்தப்பட்டுள்ளது. இந்த ரகசியத் தகவலில் இடம்பெற்றுள்ள மிக முக்கியமான எச்சரிக்கை என்னவென்றால், பொறுப்புக்கூறல் (Accountability) பற்றியதுதான். "அமைச்சர்களுக்கு அனுபவம் இல்லை என்பதைக் காரணமாகக் காட்டி, நிர்வாகத்தில் எந்தத் தவறும் நடந்துவிடக் கூடாது. உங்கள் துறைகளில் எடுக்கப்படும் ஒவ்வொரு முடிவுக்கும், அதில் நடக்கும் தவறுகளுக்கும் நீங்களே முழுப் பொறுப்பு" என்று அதிகாரிகளுக்குக் கறாராக உத்தரவிடப்பட்டுள்ளது. நிர்வாக ரீதியாக ஏதேனும் தவறான முடிவுகளோ அல்லது குளறுபடிகளோ ஏற்பட்டால், "அமைச்சர் சொன்னார்" என்று கூறி அதிகாரிகள் தப்பித்துக் கொள்ள முடியாது என்பதை இந்த அதிரடித் தகவல் உணர்த்தியுள்ளது. அமைச்சர்கள் ஒப்புதல் அளித்தாலும், சட்ட விதிகளின்படி கோப்புகள் சரியாக இருக்கிறதா என்பதை ஆராய்ந்து முடிவெடுக்க வேண்டிய முழுப் பொறுப்பும் இனி செயலாளர்களின் தலையில்தான் விழப்போகிறது. பொதுவாகத் தலைமைச் செயலகத்தில் அமைச்சர்களின் அதிகாரமே கொடிகட்டிப் பறக்கும். ஆனால், முதல்வர் விஜய் அதிகாரிகளுக்கு இத்தகைய தன்னிச்சையான அதிகாரத்தையும், அதே நேரத்தில் கடுமையான பொறுப்பையும் 'தகவலாக' அனுப்பியிருப்பது கோட்டை வட்டாரத்தில் பெரும் விவாதத்தைக் கிளப்பியுள்ளது. அமைச்சர்கள் தங்களை நிலைநிறுத்திக்கொள்ளும் வரை அரசு எந்திரம் தடையின்றி இயங்க வேண்டும் என்ற முதல்வரின் இந்த ராஜதந்திர வியூகம், அதிகாரிகள் மத்தியில் கூடுதல் பணிச்சுமையையும், அதே சமயம் பெரும் பயத்தையும் ஏற்படுத்தியுள்ளது. அதிகாரப்பூர்வ அறிவிப்பு இல்லாமல் பிறப்பிக்கப்பட்ட இந்த ரகசிய உத்தரவு, தமிழக அரசு நிர்வாகத்தில் ஒரு புதிய அத்தியாயத்தைத் தொடங்கியுள்ளது என்பதில் சந்தேகமில்லை.கசிந்த ரகசியத் தகவல்: "துறைகளை நீங்களே நடத்துங்கள்"
"தவறு நடந்தால் அமைச்சர்களைக் கை காட்டக் கூடாது" - முதல்வர் கெடுபிடி
கோட்டை வட்டாரத்தில் கிளம்பியுள்ள புகைச்சல்