சென்னை: திண்டிவனத்தில் இருந்து செங்கல்பட்டு வரையிலும், மீண்டும் கிளாம்பாக்கத்திலும் நீண்ட நேரம் போக்குவரத்து நெரிசலில் சிக்குவது விரைவில் முடிவுக்கு வர தேசிய நெடுஞ்சாலை ஆணையம் திட்டமிட்டுள்ளது. பயண நேரத்தைக் குறைந்தபட்சம் இரண்டு மணிநேரம் வரை குறைக்கும் வகையில் தேசிய நெடுஞ்சாலைகள் ஆணையம் இரண்டு விரைவுச் சாலைகளைத் திட்டமிட்டுள்ளது. இதில் முக்கியமான திட்டம், மஹிந்திரா சிட்டியில் இருந்து கிளாம்பாக்கம் பேருந்து நிலையம் வரையிலான 23 கி.மீ நீளமுள்ள இரண்டு அடுக்கு மேம்பாலச் பாதை அமைக்கப்பட உள்ளது.
இதன் முதல் அடுக்கில் சுங்கச்சாவடியுடன் கூடிய 6 வழி விரைவுப் பாதை அமைக்கப்படும். இது அதிக நெரிசல் நேரங்களில் 90 நிமிடங்களாக இருக்கும் பயண நேரத்தை 15-20 நிமிடங்களாகக் குறைக்கும். இரண்டாவது அடுக்கு மெட்ரோ ரயில் பாதையாகச் செயல்படும்.
பரனூருக்கு அப்பாலும் இந்த விரைவுச் சாலையை விரிவாக்கம் செய்ய தமிழ்நாடு அரசு விரும்பியதாக தேசிய நெடுஞ்சாலைத்துறை அதிகாரிகள் தெரிவித்தனர். ஆனால், குன்றுகள் இருப்பதால் அதைச் செய்ய முடியாத நிலையில், மஹிந்திரா சிட்டி வரை கட்ட தேசிய நெடுஞ்சாலைத்துறை ஆணையம் முன்மொழிந்துள்ளது. இது பற்றி அதிகாரி ஒருவர் கூறுகையில், "ஐடி துறையைச் சேர்ந்த பலர் இந்தச் சாலையைப் பயன்படுத்துவதால், இரண்டு அடுக்கு மெட்ரோ பாதையையும் மாநில அரசு கோரியது. தற்போது இவர்கள் செங்கல்பட்டு புறநகர் ரயிலைப் பயன்படுத்தி வருகின்றனர். எனவே மெட்ரோ ரயில் திட்டத்தையும் சேர்க்குமாறு அவர்கள் எங்களைக் கேட்டுக் கொண்டனர்," என்று கூறிய அதிகாரி, இதற்கான முன்மொழிவு மத்திய அரசுக்கு அனுப்பப்பட்டுள்ளதாகச் சேர்த்துக் கொண்டார். மேம்பால விரைவுச் சாலை மற்றும் மெட்ரோ ரயிலுக்கான மையத் தூண்கள் முழுவதையும் NHAI அமைக்கும். "மெட்ரோ நிர்வாகம் கார்டர்கள், தண்டவாளங்கள் மற்றும் மின்மயமாக்கல் பணிகளை மேற்கொள்வர். விரைவுச் சாலை முதலில் திறக்கப்படும்; அதன்பின் போக்குவரத்திற்கு இடையூறு இன்றி மெட்ரோ கார்டர்களைப் பொருத்த முடியும். இது சாத்தியமான ஒன்றுதான்" என்று அதிகாரி தெரிவித்தார். நெடுஞ்சாலைத்துறை அமைச்சர் ஆதவ் அர்ஜுனா, கூடுதல் விவரங்களுக்குள் செல்லாமல் சட்டப்பேரவையில் இத்திட்டம் குறித்து அறிவித்து இருந்தார். செங்கல்பட்டில் இருந்து நகரத்திற்குள் நுழைய மூன்று மணிநேரம் வரை ஆவதாக அவர் குறிப்பிட்டார். இது தவிர, மேல்மருவத்தூருக்கு அடுத்தபடியாக உள்ள ஜி.எஸ்.டி சாலையில் உள்ள பாக்கம் கிராமத்தில் தொடங்கி, காஞ்சிபுரம் - செங்கல்பட்டு நெடுஞ்சாலை சந்திப்பில் உள்ள பரனூர் வரை செல்லும் மற்றொரு புதிய விரைவுச் சாலையையும் NHAI திட்டமிட்டுள்ளது. மணிக்கு 120 கி.மீ வேகத்தில் செல்லக்கூடிய இந்த 6 வழி விரைவுச் சாலை, உத்திரமேரூர் வழியே சென்று பாலாற்றைக் கடந்து சந்திப்பு அருகே முடியும். "இந்த விரைவுச் சாலை சுமார் 15 கி.மீ நீளம் கொண்டதாக இருக்கும். இது மேற்கு மற்றும் தென் மாவட்டங்களில் இருந்து வரும் வாகனங்கள் விரைவாகச் செங்கல்பட்டை அடைய உதவும். திருவண்ணாமலையிலிருந்து வரும் வாகனங்களுக்கும் உத்திரமேரூரில் இணைப்புச் சாலை கிடைக்கும்" என்று அதிகாரி ஒருவர் தெரிவித்தார். நிதி ஆயோக் கூட்டத்தில் முதலமைச்சர் ஜோசப் விஜய் முன்வைத்த சென்னை - திருச்சி விரைவுச் சாலையின் ஒரு பகுதியாகவோ அல்லது தனியாகவோ இத்திட்டத்தை மேலும் திண்டிவனம் வரை நீட்டிக்க முடியும் என தேசிய நெடுஞ்சாலை துறை தெரிவித்துள்ளது. இது திண்டிவனத்தில் இருந்து செங்கல்பட்டிற்கான பயண நேரத்தை ஒன்றரை மணிநேரத்திலிருந்து 30 நிமிடங்களாகக் குறைக்கும். ஒட்டுமொத்தமாக, திண்டிவனத்தில் இருந்து வரும் வாகனங்கள் சுமார் ஒரு மணி நேரத்தில் கிளாம்பாக்கத்தை அடைந்துவிட முடியும். இதுமட்டுமின்றி, செங்கல்பட்டில் இருந்து திண்டிவனம் வரையிலான 67 கி.மீ தூரச் சாலையை 10 வழிச் சாலையாக (6 வழிகளுடன் 2 சேவைச் சாலைகள்) விரிவுபடுத்தவும் தேசிய நெடுஞ்சாலை ஆணையம் முன்மொழிந்துள்ளது. "பரனூருக்குப் பிறகு முக்கியமான குன்றுகள் உள்ள பகுதிகள் இருப்பதால் இத்திட்டத்திற்கு இன்னும் சுற்றுச்சூழல் அனுமதி கிடைக்கவில்லை. இந்த ஆண்டிற்குள் அனுமதி கிடைக்கும் என நம்புகிறோம். இத்திட்டங்கள் நிறைவடைந்தால், அடுத்த 30 ஆண்டுகளுக்குச் சென்னை நோக்கி வரும் போக்குவரத்து நெரிசல் பெருமளவில் குறையும்" என்று அதிகாரி ஒருவர் கூறினார்.