சென்னை: தமிழகத்தின் கிராமப்புற மற்றும் புறநகர் பகுதிகளின் போக்குவரத்து இணைப்பை அடுத்த கட்டத்திற்கு எடுத்துச் செல்லும் நோக்கில், மாநில நெடுஞ்சாலைத் துறை ஒரு பிரம்மாண்ட உள்கட்டமைப்புத் திட்டத்தை கையில் எடுத்துள்ளது.
புதிய திட்டத்தின் படி, தமிழகம் முழுவதும் உள்ள சுமார் 45,000 கிலோமீட்டர் நீளமுள்ள மாவட்ட சாலைகள் அனைத்தும் தரமான இருவழிப் பாதைகளாக தரம் உயர்த்தப்பட உள்ளன. போக்குவரத்து நெரிசலைக் குறைக்கவும், சாலை விபத்துகளைத் தடுக்கவும், கிராமப்புற பொருளாதார வளர்ச்சியை வேகப்படுத்தவும் இந்த மெகா திட்டம் வகுக்கப்பட்டுள்ளது.
தமிழக நெடுஞ்சாலைத் துறையின் நேரடி கட்டுப்பாட்டில் தற்போது சுமார் 70,000 கிலோமீட்டர் நீளமுள்ள சாலை நெட்வொர்க் பயன்பாட்டில் உள்ளது. இவை முக்கியமாக முதன்மை மாவட்ட சாலைகள் மற்றும் 'பிற மாவட்ட சாலைகள் என பிரிக்கப்பட்டுள்ளன. இதில் மிக முக்கிய அம்சமாக, மொத்த சாலைகளில் சுமார் 65 சதவீதப் பங்கு, அதாவது 45,000 கி.மீ கிராமப்புறங்களை இணைக்கும் பிற மாவட்ட சாலைகள் ஆகும். இச்சாலைகளின் பராமரிப்பு மற்றும் மேம்பாட்டுப் பணிகளை மாநிலம் முழுவதும் உள்ள 68 கோட்ட அலுவலகங்கள் ஒருங்கிணைத்து வருகின்றன. தமிழகத்தில் ஏற்பட்டுள்ள அதிவேக நகரமயமாக்கல் மற்றும் ஆண்டுக்கு சராசரியாக 10 சதவீதம் வரை அதிகரித்து வரும் வாகனப் பெருக்கம் காரணமாக இந்த விரிவாக்கத் திட்டம் தவிர்க்க முடியாததாக மாறியுள்ளது. கொரோனா பெருந்தொற்று காலத்திற்குப் பிறகு, அரசு மற்றும் தனியார் பேருந்து போக்குவரத்து முழு வீச்சில் இயங்கி வந்தாலும், சொந்தமாக இருசக்கர மற்றும் நான்கு சக்கர வாகனங்களை வாங்குவோரின் எண்ணிக்கை பன்மடங்கு உயர்ந்துள்ளது. இதனால் உள்வட்டாரச் சாலைகளில் வாகன நெரிசல் வரலாறு காணாத அளவுக்கு அதிகரித்துள்ளது. கடந்த சில ஆண்டுகளில் தேசிய நெடுஞ்சாலைகளும், முக்கிய மாவட்டச் சாலைகளும் விரைவுச் சாலைகளாக மாற்றப்பட்டு பெருமளவில் நவீனமயமாக்கப்பட்டுள்ளன. ஆனால், தொலைதூர கிராமங்கள், விவசாயப் பகுதிகள் மற்றும் சிறு நகரங்களை முதன்மை நெடுஞ்சாலைகளுடன் இணைக்கும் கிராமப்புற சாலைகள் பல இன்னும் பழைய நிலையிலேயே உள்ளன. தற்போதுள்ள 45,000 கி.மீ பிற மாவட்ட சாலைகளில் பெரும்பாலான பகுதிகள் 3.75 மீட்டர் அல்லது 5.5 மீட்டர் அகலம் கொண்ட குறுகிய பாதைகளாகவே உள்ளன. இதனால், ஒரே நேரத்தில் விவசாய டிராக்டர்கள், கனரகப் பேருந்துகள் மற்றும் கார்கள் செல்லும்போது கடுமையான போக்குவரத்து நெரிசல் ஏற்படுவதுடன், நேருக்கு நேர் மோதும் கொடிய சாலை விபத்துகளும் அடிக்கடி நிகழ்ந்து வருகின்றன. இதனை முழுமையாக மாற்றியமைக்கவே, இந்தச் சாலைகள் அனைத்தையும் போதுமான இடவசதியுடன் கூடிய இருவழிச் சாலைகளாக விரிவாக்கம் செய்ய அரசு முடிவெடுத்துள்ளது. இதன்மூலம் இரண்டு வாகனங்கள் ஒரே நேரத்தில் சிரமமின்றி கடந்து செல்ல முடியும், விபத்து அபாயம் வெகுவாகக் குறையும், பயண நேரமும் பாதியாகச் சுருங்கும். இத்திட்டத்திற்கான ஆரம்பக்கட்ட கள ஆய்வுகளை நெடுஞ்சாலைத் துறை 68 கோட்டங்களிலும் ஏற்கனவே விறுவிறுப்பாகத் தொடங்கியுள்ளது. சாலைகளின் தற்போதைய தரம், தினசரி செல்லும் வாகனங்களின் எண்ணிக்கை, நெடுஞ்சாலைத் துறைக்குச் சொந்தமான நிலத்தின் அளவு மற்றும் சாலை விரிவாக்கத்திற்குத் தேவைப்படும் கூடுதல் நிலம் கையகப்படுத்துதல் குறித்த விரிவான கள ஆய்வுகள் மேற்கொள்ளப்பட்டு வருகின்றன. மாவட்ட அளவிலான விரிவான திட்ட அறிக்கைகள் சமர்ப்பிக்கப்பட்டு ஆய்வு செய்யப்பட்டவுடன், நிதி ஒதுக்கீடு செய்யப்பட்டு பணிகள் பல்வேறு கட்டங்களாகத் தொடங்கப்படும். முதற்கட்டமாக, அதிக வாகனப் புழக்கம் கொண்ட பகுதிகள், முக்கிய விவசாய சந்தைகள், தொழிற்பேட்டைகள் மற்றும் கல்வி நிலையங்களை நெடுஞ்சாலைகளுடன் இணைக்கும் வழித்தடங்களுக்கு முன்னுரிமை வழங்கப்படும் என்று அதிகாரிகள் தெரிவித்துள்ளனர்.மாநில சாலை நெட்வொர்க் மற்றும் தற்போதைய நிலை
தீவிர வாகனப் பெருக்கம்