சென்னை: தமிழ்நாட்டில் கடந்த சில மாதங்களாகவே மின்சாரம் தொடர்பான புகார்களும், பொதுமக்களின் அதிருப்தியும் நாளுக்கு நாள் அதிகரித்து வருகின்றன. குறிப்பாக, புதிய தவெக அரசில் மின்சாரத்துறை அமைச்சர் சி.டி.ஆர். நிர்மல் குமார் பொறுப்பேற்ற பிறகு, பல பகுதிகளில் தடையில்லா மின்சாரம் கிடைப்பதில் தடங்கல் ஏற்பட்டுள்ளதாகப் பொதுமக்கள் குற்றம்சாட்டி வருகின்றனர்.
மின்சாரத்துறையின் சொதப்பல் காரணமாக மக்கள் தற்போது எதிர்கொள்ளும் முக்கிய பிரச்னைகள் குறித்து விரிவாகப் பார்ப்போம்.
சென்னை மற்றும் புறநகர்ப் பகுதிகள், திருவள்ளூர், தாம்பரம் மற்றும் கொங்கு மண்டலத்தின் பல ஊர்களில் பல நேரங்களில் திடீரென மின்சாரம் துண்டிக்கப்படுகிறது. சில மணி நேரங்கள் வரை நீடிக்கும் இந்தத் தடையால் தூக்கமின்றித் தவிக்கும் பொதுமக்கள் சாலை மறியல் போராட்டங்களில் ஈடுபடும் நிலைக்குத் தள்ளப்பட்டுள்ளனர். காற்றாலை மின் உற்பத்தி குறைந்ததாலும், தேவை அதிகரித்ததாலும் திடீர் பற்றாக்குறை ஏற்பட்டது. புதிய அரசிடம் முறையான திட்டமிடல் இல்லாததால், வெளிச்சந்தையில் இருந்து அவசர அவசரமாக 2,000 மெகாவாட் மின்சாரத்தை கூடுதல் விலைக்கு அரசு கொள்முதல் செய்தது பெரும் விமர்சனத்தை ஏற்படுத்தியுள்ளது. கடந்த இரு மாதங்களில் பல குடும்பங்களுக்கு வழக்கத்தை விட இரண்டு முதல் மூன்று மடங்கு அதிக மின்கட்டணம் வந்ததாகப் புகார்கள் எழுந்தன. ஊழியர்கள் வீடுகளுக்கு நேரில் சென்று கணக்கெடுக்காமல் அலுவலகத்தில் அமர்ந்தே 'டேபிள் ரீடிங்' எடுத்ததும், பழுதான மீட்டர்களுமே இதற்குக் காரணம் என ஆய்வில் தெரியவந்தது. தேர்தல் வாக்குறுதியான 200 யூனிட் இலவச மின்சாரத் திட்டம் உள்ளிட்ட அறிவிப்புகளால் மின்சார வாரியத்திற்கு கூடுதல் நிதிச்சுமை ஏற்பட்டுள்ளது. இதனால் கீழ்மட்டப் பராமரிப்புப் பணிகளுக்கான நிதி ஒதுக்கீட்டில் தாமதம் ஏற்படுவதாகக் கூறப்படுகிறது. புதிதாக வீடு கட்டுபவர்கள் மற்றும் வணிகக் கடைகளுக்குப் புதிய மின் இணைப்பு அல்லது ஸ்மார்ட் மீட்டர்கள் பெறுவதில் கடுமையான தட்டுப்பாடு நிலவுகிறது. விண்ணப்பித்து ஒரு மாதத்திற்கும் மேலாகியும் மீட்டர் பொருத்தப்படாமல் பொதுமக்கள் காத்திருக்க வேண்டிய சூழல் உள்ளது. பழைய டிரான்ஸ்பார்மர்களில் அதிக சுமை ஏறுவதால் அடிக்கடி வெடித்துப் பழுதாகின்றன. மேலும் பல பகுதிகளில் சீரான மின்சாரம் கிடைக்காமல் லோ-வோல்டேஜ் பிரச்னை ஏற்படுவதால் ஃபேன், ஃப்ரிட்ஜ் உள்ளிட்ட வீட்டு உபயோகப் பொருட்கள் சேதமடைகின்றன. தமிழகத்தில் சீரான மின் விநியோகத்திற்கு இன்னும் சுமார் 500-க்கும் மேற்பட்ட புதிய துணை மின்நிலையங்கள் தேவைப்படுகின்றன. ஆனால், இவற்றைக் கட்டி முடிக்கும் பணிகளில் தொடர்ந்து தொய்வு நீடிப்பதால் உள்ளூர் மின் கட்டமைப்புகள் பெரும் அழுத்தத்தைச் சந்திக்கின்றன. மின் தடை ஏற்பட்டால் புகார் அளிக்க ஏற்படுத்தப்பட்ட 24 மணி நேர 'மின்னகம்' உதவி எண் 94987 94987 மற்றும் உள்ளூர் அலுவலக எண்கள் பல நேரங்களில் தொடர்புகொள்ள முடியாத நிலையில் முடங்குவதாக மக்கள் குமுறுகின்றனர். தொலைத்தொடர்பு சேவை மாற்றத்தின்போது ஏற்பட்ட தொழில்நுட்பக் கோளாறுகளே இதற்கு முக்கியக் காரணமாகச் சொல்லப்படுகிறது. மாதாந்திரப் பராமரிப்புப் பணிகளுக்காக பகல் முழுவதும் மின்தடை செய்யப்படும் விவரங்கள் பல இடங்களில் மக்களுக்கு முன்கூட்டியே சரியாகத் தெரிவிக்கப்படுவதில்லை. இதனால் வீட்டில் இருந்து வேலை செய்வோர் மற்றும் குடிநீர் தேவைகளுக்கு மோட்டார் போடுவோர் கடுமையாகப் பாதிக்கப்படுகின்றனர். மின் கம்பிகள் மீது உரசியுள்ள மரக்கிளைகளை வெட்டுவது, தளர்ந்த ஒயர்களைச் சரிசெய்வது போன்ற அடிப்படைப் பராமரிப்புப் பணிகள் பல மாவட்டங்களில் தாமதமாக நடைபெறுகின்றன. சிறிய காற்று மற்றும் மழைக்கே பல மணி நேரம் மின்சாரம் துண்டிக்கப்படுவதற்கு இதுவே முக்கியக் காரணியாக அமைகிறது. காற்றாலை மின் உற்பத்திக் குறைவு மற்றும் முந்தைய நிர்வாகக் குறைபாடுகளே இச்சிக்கல்களுக்குக் காரணம் என்று அமைச்சர் விளக்கமளித்தாலும், சாமானிய மக்களுக்குத் தடையற்ற மின்சாரம் வழங்குவதே இப்போதைய அவசரத் தேவையாக உள்ளது. ஆனால் அதில் மிக மோசமாக தவெக அரசு சொதப்பி வருகிறது. விசில் சத்தத்தில் மின்சாரம் தயாரித்தால் வேண்டுமானால் தவெக அரசு மின்சார தடையை சமாளிக்கலாம்.. ஆனால் அதற்கும் வாய்ப்பில்ல ராஜா!1. முன்னறிவிப்பு இல்லாத மின்தடை
2. கூடுதல் விலைக்கு அவசர மின் கொள்முதல்
3. எகிறிய மின் கட்டணம் மற்றும் ரீடிங் குளறுபடிகள்
4. மின்சார வாரியத்தின் நிதிச்சுமை
5. புதிய மீட்டர்கள் கிடைப்பதில் கடும் இழுபறி
6. டிரான்ஸ்பார்மர் பழுது மற்றும் குறைந்த மின்னழுத்தம்
7. புதிய துணை மின்நிலையங்கள் அமைப்பதில் தாமதம்
8. வேலை செய்யாத 'மின்னகம்' உதவி எண்கள்
9. முறையாகத் திட்டமிடப்படாத பராமரிப்புப் பணிகள்
10. பருவமழைக்கு முந்தைய பராமரிப்பில் தொய்வு