“நீட் எதிர்ப்பு போராட்டத்துக்கு தவெக முழு ஆதரவு” - அமைச்சர் ஆதவ் அர்ஜுனா உறுதி!

எஸ்.ஆர்.எம் பல்கலைக்கழகத்தில் இன்று நடைபெற்ற நிகழ்வில் பங்கேற்ற அமைச்சர் ஆதவ் அர்ஜுனா பேசுகையில், "நீட் தேர்வு முறைகேடு தொடர்பாக டெல்லியில் நடைபெறும் மாணவர் போராட்டத்துக்கு எங்களின் முழு ஆதரவை தெரிவித்துக் கொள்கிறோம். அதற்கு ஒட்டுமொத்த தமிழகமும், எங்கள் முதல்வரும் துணை நிற்கிறோம். இன்றைக்குத்தான் டெல்லியில் இருந்து நீட் தேர்வுக்கு எதிரான போராட்ட குரல் ஒலிக்கிறது. ஆனால், சகோதரி அனிதாவில் இருந்து எண்ணற்ற சகோதர, சகோதரிகளை தமிழகம் இழந்திருக்கிறது.

நீட் விவகாரத்தில் டெல்லியின் குரலுக்கும் தமிழகத்தின் குரலுக்கும் வித்தியாசம் உண்டு. தமிழக முதல்வர், தமிழக அரசு, தவெக, தமிழக மக்கள் என எல்லோரும் ஒருமித்த குரலில் நீட் தேர்வை ஒட்டுமொத்தமாக நீக்க வேண்டும் என்பதுதான். அதில் அரசியல் ரீதியாகவும் சரி, தனியாகவும் சரி, நாங்கள் உறுதியாக இருக்கிறோம்.

நீட் தேர்வு இல்லாமலேயே திறன்மிக்க மருத்துவர்களை தமிழகம் உருவாக்கி உள்ளது. சமூக நீதியின் அடிப்படையில் அதைச் செய்தோம். நீட் எதிர்ப்பு நிலைப்பாடு வெறும் அரசியல் காரணங்களுக்கானது அல்ல. எளிய பின்புலம் கொண்ட மாணவர்களால் நீட் தேர்வு பயிற்சி வகுப்புக்கான கட்டணத்தை செலுத்த முடியாது.

ஆட்சியில் உள்ள பாஜக அரசு, வேளாண் சட்டங்களை திரும்பப் பெற்றதை போல நாடாளுமன்றத்தில் இந்த நீட் தேர்வு வாபஸ் பெறப்படும். அது உறுதியாக நடைபெறும். அதற்கு தமிழகத்தின் குரல் முக்கிய குரலாக இருக்கும்" என்று தெரிவித்துள்ளார்.

நீட் தேர்​வு வினாத்தாள் கசிவு உள்ளிட்ட முறை​கேடு​களுக்கு பொறுப்பேற்று மத்​திய கல்வி அமைச்​சர் தர்மேந்​திர பிரதான் ராஜி​னாமா செய்ய வேண்​டும் என்று வலியுறுத்தி கரப்​பான்​பூச்சி ஜனதா கட்சியினர் டெல்லி ஜந்​தர் மந்​தரில் கடந்த ஒரு மாத காலமாக போராட்டம் நடத்தி வருகின்றனர்.

கடந்த 20 ஆம் தேதி சிஜேபி கட்சியினர் சார்​பில் நாடாளு​மன்​றம் நோக்கி பேரணி நடத்​தப்​பட்​டது. இதில் ஏராளமான மாணவர்​கள் பங்​கேற்​றனர். மாணவர்களை கலைக்க டெல்லி போலீ​சார் தடியடி நடத்​தி, கண்ணீர் புகைக்​ குண்டு​களை வீசினர். இதில் பல மாணவர்கள் காயமடைந்தனர். இதைத்தொடர்ந்து நாட்​டின் பல்​வேறு மாநிலங்களிலும் நீட் தேர்​வுக்கு எதி​ராக இளைஞர்​கள், மாணவர்கள் போராட்டங்களை நடத்தி வரு​கின்​றனர்.

இந்நிலையில், நேற்று சென்னை எழும்பூரில் நீலம் பண்பாட்டு மையம் சார்பில் நடந்த ஆர்ப்பாட்டத்தின்போது பேசிய இயக்குநர் பா. ரஞ்சித் "நீங்கள் நீட் எதிர்ப்பாளர் தானே? ஏன் போராட்டத்தை ஒடுக்குகிறீர்கள்? என தவெக அரசுக்கு கேள்வி எழுப்பியிருந்தார். மேலும், பாடகர் தெருக்குரல் அறிவு இந்த ஆர்ப்பாட்டத்தில் பேசும்போது, "இந்த போராட்டம் தேவையில்லாதது. நீ ஏன் தம்பி இங்க வந்த?" என ஆதவ் அர்ஜுனா கேட்டதாக கூறியிருந்தார்.