சென்னை: தமிழகத்தில் அரசியல் களம் தற்போது மிகவும் விறுவிறுப்பாக மாறிவிட்டது. அக்டோபர் 6ஆம் தேதி நடைபெறவுள்ள மதுராந்தகம் மற்றும் தாராபுரம் ஆகிய இரண்டு சட்டமன்றத் தனித் தொகுதிகளுக்கான இடைத்தேர்தல் அறிவிக்கப்பட்டுள்ள நிலையில், அரசியல் கட்சிகள் தீவிரமான தேர்தல் வேலைகளில் இறங்கியுள்ளன.
இந்த இடைத்தேர்தலில் விஜயின் தமிழக வெற்றிக் கழகம் சார்பில் போட்டியிடும் வேட்பாளர்கள் அதிகாரப்பூர்வமாக அறிவிக்கப்பட்டுள்ளனர். நடந்து முடிந்த பொதுத்தேர்தலில் அதிமுக சார்பில் வெற்றிபெற்று, பின்னர் அந்தப் பதவிகளை ராஜினாமா செய்துவிட்டு தவெகவில் இணைந்த மரகதம் குமாரவேல் மற்றும் சத்யபாமா ஆகிய இருவருக்கே மீண்டும் வாய்ப்பு வழங்கப்பட்டுள்ளது.
மரகதம் குமாரவேல் - மதுராந்தகம் தொகுதி வேட்பாளர்
மதுராந்தகம் (தனி) தொகுதி வேட்பாளராக அறிவிக்கப்பட்டுள்ள மரகதம் குமாரவேல் அரசியலில் நீண்ட அனுபவம் கொண்டவர். இவருக்கு வயது 43. இவர் தமிழ்நாடு திறந்தநிலைப் பல்கலைக்கழகத்தில் முதுகலை (M.A.) பட்டம் பெற்றுள்ளார்.
அதிமுக கட்சியில் தனது அரசியல் பயணத்தைத் தொடங்கிய இவர், ஆரம்பத்தில் உள்ளாட்சி அமைப்புகளில் தீவிரமாகச் செயல்பட்டார். கடந்த 2006 முதல் 2011 வரை திருப்போரூர் ஒன்றியக் குழு உறுப்பினராகவும், அதன் பிறகு 2011 முதல் 2014 வரை அதே பகுதியின் ஒன்றியத் தலைவராகவும் மக்கள் சேவையாற்றினார். இவருடைய உழைப்பைக் கவனித்த மறைந்த முதலமைச்சர் ஜெயலலிதா, இவருக்கு 2014 மக்களவைத் தேர்தலில் காஞ்சிபுரம் (தனி) தொகுதி நாடாளுமன்ற உறுப்பினர் வேட்பாளராக வாய்ப்பளித்தார். அந்தத் தேர்தலில் பெருவாரியான வாக்குகள் வித்தியாசத்தில் வெற்றி பெற்று நாடாளுமன்றம் சென்றார். பின்னர் 2021 சட்டமன்றத் தேர்தலில் மதுராந்தகம் தொகுதியில் போட்டியிட்டு எம்.எல்.ஏ ஆனார். தொடர்ந்து 2026 சட்டமன்றத் தேர்தலிலும் அதே தொகுதியில் அதிமுக சார்பில் போட்டியிட்டு மீண்டும் வெற்றி பெற்றார். ஆனால், தேர்தல் முடிந்து சில மாதங்களிலேயே ஏற்பட்ட அரசியல் மாற்றங்களால், தனது எம்.எல்.ஏ பதவியை ராஜினாமா செய்துவிட்டு நடிகர் விஜய் தலைமையிலான தவெகவில் இணைந்தார். தற்பொழுது தவெக சார்பில் மதுராந்தகம் இடைத்தேர்தலில் மீண்டும் அதே தொகுதியில் களம் காண்கிறார். திருப்பூர் மாவட்டத்தைச் சேர்ந்த தாராபுரம் (தனி) தொகுதியின் தவெக வேட்பாளராக அறிவிக்கப்பட்டுள்ள சத்யபாமாவுக்கு வயது 54. இவர் அண்ணாமலைப் பல்கலைக்கழகத்தில் அரசியல் அறிவியலில் முதுகலை பட்டம் பெற்றுள்ளார். அதிமுகவின் மகளிர் அணியிலும், திருப்பூர் மாவட்ட அரசியலிலும் நீண்டகாலமாக தீவிரமாகப் பணியாற்றி வந்தவர் சத்யபாமா. இவரின் நீண்ட கால அரசியல் மற்றும் சமூகப் பணிகளை மதித்து, 2014ஆம் ஆண்டு நடைபெற்ற நாடாளுமன்றத் தேர்தலில் திருப்பூர் தொகுதி நாடாளுமன்ற உறுப்பினராக (MP) அதிமுக சார்பில் களம் இறக்கப்பட்டார். அந்தத் தேர்தலில் வெற்றி பெற்று நாடாளுமன்றத்தில் மக்கள் குரலாக ஒலிக்கத் தொடங்கினார். இதனைத் தொடர்ந்து, மாநில அரசியலில் கவனம் செலுத்திய அவர், 2026 சட்டமன்றத் தேர்தலில் தாராபுரம் தொகுதியில் அதிமுக சார்பில் போட்டியிட்டு வெற்றி பெற்று சட்டமன்றத்திற்குச் சென்றார். பின்னர், அரசியல் சூழல் காரணமாக தனது சட்டமன்ற உறுப்பினர் பதவியை ராஜினாமா செய்துவிட்டு தவெகவில் தன்னை இணைத்துக் கொண்டார். தற்போது தாராபுரம் இடைத்தேர்தலில் தவெகவின் அதிகாரப்பூர்வ வேட்பாளராகக் களமிறங்குகிறார். இந்த இரண்டு தொகுதிகளிலும் முன்பு அதிமுக சார்பில் வென்றவர்களையே, தற்போது தவெக தன் வேட்பாளர்களாக அறிவித்துள்ளது மிகப்பெரிய அரசியல் திருப்பமாகப் பார்க்கப்படுகிறது. இவர்களுக்கு அப்பகுதிகளில் ஏற்கனவே இருக்கும் தனிப்பட்ட செல்வாக்கும், தவெக கட்சியின் பலமும் தேர்தல்களில் கைகொடுக்குமா என்பதைப் பொறுத்திருந்துதான் பார்க்க வேண்டும். மறுபுறம், திமுக தரப்பில் மதுராந்தகம் தொகுதிக்கு இ. பரந்தாமனும், தாராபுரம் தொகுதிக்கு எஸ். சுகன்யாவும் வேட்பாளர்களாக அறிவிக்கப்பட்டுள்ளனர். இதனால், ஆளுங்கட்சியான தவெகவுக்கும், மற்ற கட்சிகளுக்கும் இடையே கடுமையான போட்டி நிலவும் என்பதில் எந்தச் சந்தேகமும் இல்லை. அக்டோபர் 6ஆம் தேதி நடக்கும் வாக்குப்பதிவு மற்றும் அக்டோபர் 9ஆம் தேதி வெளிவரப்போகும் தேர்தல் முடிவுகள் தமிழக அரசியலில் அடுத்த கட்ட மாற்றங்களை நிர்ணயிக்கும் முக்கியமான மைல்கல்லாக அமையும்.சத்யபாமா - தாராபுரம் தொகுதி வேட்பாளர்
இடைத்தேர்தல் களம் எப்படி இருக்கும்?