சென்னை: காஞ்சிபுரம் மாவட்டம் பரந்தூரில் புதிய விமான நிலையம் அமைப்பதற்குத் திட்டமிடப்பட்டிருந்தது. இந்த விமான நிலையம் அதிகாரப்பூர்வமாக ரத்து செய்யப்பட்டதாக எந்த அறிவிப்பும் இன்னும் வெளியாகவில்லை. அதே நேரத்தில், இதற்கான பணிகள் வேகமெடுக்கவும் இல்லை. இந்தச் சூழலில், பரந்தூர் விமான நிலையப் பணிகள் நிறுத்தப்பட்டதற்காக ஏகனாபுரம் கிராமசபைக் கூட்டத்தில் முதலமைச்சர் விஜய்க்கு நன்றி தெரிவித்துத் தீர்மானம் நிறைவேற்றப்பட்டுள்ளது.
காஞ்சிபுரம் மாவட்டம் பரந்தூர் சுற்றுவட்டாரப் பகுதியில் உள்ள வளத்தூர், நெல்வாய், தண்டலம், மேல்படவூர், நாகப்பட்டு, ஏகனாபுரம், எடையார்பாக்கம், அக்கம்மாபுரம், குணகரம்பாக்கம், சிங்கிலிபாடி, மகாதேவிமங்கலம் உள்ளிட்ட 13 கிராமங்களை உள்ளடக்கிச் சுமார் 4,791 ஏக்கர் பரப்பளவில் பசுமைவெளி விமான நிலையம் அமைப்பதற்கு மத்திய, மாநில அரசுகள் அறிவிப்புகளை வெளியிட்டிருந்தன.
இந்நிலையில், பசுமைவெளி விமான நிலையம் அமைப்பதற்கு எதிர்ப்பு தெரிவித்து ஏகனாபுரம், பரந்தூர், தண்டலம், நெல்வாய், மேலேறி உள்ளிட்ட கிராமங்களைச் சேர்ந்த மக்கள் பல்வேறு கட்டப் போராட்டங்களை நடத்தினர். தங்களின் குடியிருப்புகளையும் வாழ்வாதாரங்களையும் இழக்க நேரிடும் என்பதால், கிராம மக்கள் கிராமசபைக் கூட்டங்களில் தொடர்ச்சியாக எதிர்ப்பு தெரிவித்து வந்தனர். இதுவரை 16 முறை புதிய விமான நிலையம் அமைப்பதற்கு எதிர்ப்பு தெரிவித்தும், 7 முறை கிராமசபைக் கூட்டத்தைப் புறக்கணித்தும், 1,100 நாட்களுக்கு மேலாகப் பல்வேறு போராட்டங்களில் ஈடுபட்டனர். 5 ஆண்டுகளுக்குப் பிறகு புதிதாக அமைந்த தவெக ஆட்சியில் புதிய விமான நிலையப் பணிகள் நிறுத்தப்பட்டுள்ளன. இதனால், இன்று சுதந்திர தினத்தை முன்னிட்டு ஏகனாபுரம் கிராமத்தில் உள்ள அரசுப் பள்ளியில் நடைபெற்ற கிராமசபைக் கூட்டத்தில், பரந்தூர் பசுமைவெளி விமான நிலையப் பணிகள் நிறுத்தப்பட்டதற்காகத் தமிழ்நாடு முதலமைச்சர் விஜய் அவர்களுக்கு நன்றி தெரிவித்துத் தீர்மானம் இயற்றப்பட்டது.
மேலும், ஏகனாபுரம் கிராமச் சாலையை 'தளபதி விஜய் சாலை' எனப் பெயர் மாற்றம் செய்யக்கோரியும் கிராம மக்கள் தீர்மானம் நிறைவேற்றினர்