சென்னை: தமிழ்நாட்டின் பெருமையே மக்கள் நலத்திட்டங்கள் தான்.. அது ஒருபோதும் நிறுத்தப்படாது என்று அமைச்சர் மரிய வில்சன் தெரிவித்துள்ளார். திமுக ஆட்சியின் போது தேவையில்லாத திட்டங்கள் என்று எதுவும் இல்லை என்று கூறிய மரிய வில்சன், யாரையும் குறை சொல்ல வெள்ளை அறிக்கை வெளியிடப்படவில்லை என்று தெரிவித்துள்ளார்.
தமிழக சட்டசபைத் தேர்தலில் தவெக ஆட்சி அமைத்த பின், முதல்வர் விஜய் நிதிநிலை தொடர்பாக வெள்ளை அறிக்கை வெளியிடப்படும் என்று அறிவித்தார். அதன்படி நிதியமைச்சர் மரிய வில்சன் இன்று வெள்ளை அறிக்கையை வெளியிட்டார். அதன்படி தமிழ்நாட்டின் மொத்த கடன் அளவு ரூ.13.18 லட்சம் கோடியாகும். ரூ. 13.18 லட்சம் கோடியாக உள்ள தமிழக அரசின் மொத்த கடனளவில் ரூ. 10 லட்சம் கோடி நேரடி கடனாகும்.
எஞ்சிய ரூ. 3.18 லட்சம் கோடி அரசு பொதுத்துறை நிறுவனங்களின் கடன் தொகையாகும். 60 ஆண்டுகளில் தமிழக அரசு வாங்கிய கடன் ரூ. 5 லட்சம் கோடி ஆகும். அதில் கடந்த திமுக ஆட்சியில் 5 ஆண்டுகளில் மட்டும் ரூ. 5 லட்சம் கோடி கடன் வாங்கப்பட்டுள்ளது. தமிழ்நாட்டின் வருவாய் பற்றாக்குறை ரூ.78,324 கோடியாகும். மாநிலத்தின் மொத்த செலவுகளில் 22.8% வட்டிக்கு செல்கிறது. தமிழகத்தில் மொத்த செலவில் 64.4% கட்டாய செலவுக்கு செல்கிறது. 2020-21ஆண்டில் ரூ.67,087 ஆக இருந்த ஒவ்வொரு நபரின் கடன் பொறுப்பு, இப்போது ரூ.1,28,934 ஆக உள்ளது. ஒவ்வொரு ஆண்டுக்கும் தமிழ்நாட்டின் வட்டி செலவு ரூ.67,050 கோடியாக உள்ளது. இதன்பின் நிதித்துறை அமைச்சர் மரிய வில்சன் செய்தியாளர்களின் கேள்விகளுக்கு பதில் அளித்தார். அப்போது திமுக ஆட்சியில் தேவையில்லாத திட்டங்கள் உள்ளதா என்ற கேள்வி எழுப்பப்பட்டது. அதற்கு நிதியமைச்சர் மரிய வில்சன், நல்ல திட்டங்கள் நிச்சயமாக நிறுத்தப்படாது. தமிழ்நாட்டின் பெருமையே மக்கள் நலத் திட்டங்கள்தான். அவை நிறுத்தப்படாது. கூடுதல் நிதி ஆதாரத்திற்கான வழிகளை தான் ஆராய வேண்டும். அதற்காக தான் பணியாற்றி வருகிறோம். திமுக ஆட்சியில் தேவையில்லாத திட்டங்கள் எதுவும் இல்லை. நலத்திட்டங்கள் தான் தமிழ்நாட்டின் பெருமை.. அதில் மாற்றுகருத்தே கிடையாது. தற்போது தமிழக அரசு அறிவித்துள்ள திட்டங்களுக்கு நிதியை உருவாக்க வேண்டிய பொறுப்பு உள்ளது. யாரையும் குறை சொல்ல இந்த அறிக்கை வெளியிடப்படவில்லை. தற்போதைய நிதி சூழலை கூறவே அறிக்கை வெளியிடப்பட்டுள்ளது என்று தெரிவித்தார்.