நடுரோட்டில் போலீசை மிரட்டி ரகளையில் ஈடுபட்ட பெண்கள்.. வீடியோ வைரலான நிலையில் மன்னிப்பு!

நடுரோட்டில் வெடித்த சர்ச்சை

அம்பத்தூர் பகுதியில் வழக்கம்போல் கடுமையான வாகனப் போக்குவரத்து நிலவி வந்த நேரத்தில், இருசக்கர வாகனத்தில் வந்த இரண்டு இளம் பெண்கள் சிறிய அளவிலான விபத்து ஏற்படுத்தியதாக கூறப்படுகிறது. விபத்து நடந்த அடுத்த கணமே, வாகனத்தை சாலையின் நடுவிலேயே நிறுத்திய அப்பெண்கள், எதிரே வந்த வாகன ஓட்டிகள் மற்றும் பொதுமக்கள் மீது ஆக்ரோஷமாக வாக்குவாதத்தில் இறங்கினர்.

அவர்களில் ஒரு பெண் ஸ்கூட்டரில் அமர்ந்திருக்க, மற்றொரு பெண் நடுரோட்டில் நின்று கொண்டு அவ்வழியாகச் சென்றவர்களை நோக்கி கைகளை வீசி, கூச்சலிட்டுப் பொதுமக்களுக்கு இடையூறு விளைவித்தார். பொதுமக்கள் அவரை சமாதானப்படுத்த முயன்றபோதும், அவர் எதையும் பொருட்படுத்தாமல் தரக்குறைவான வார்த்தைகளைப் பயன்படுத்தி வாக்குவாதத்தைத் தொடர்ந்தார்.

காவலரிடம் எகத்தாளம்

வாக்குவாதம் முற்றிய நிலையில், சாலையில் வாகனங்கள் அணிவகுத்து நிற்கத் தொடங்கின. இதனால் அப்பகுதியில் கடும் போக்குவரத்து நெரிசல் ஏற்பட்டது. கூட்டத்தில் இருந்த சிலர், சாலையை அடைத்துக் கொண்டிருந்த ஸ்கூட்டரை ஓரமாக நகர்த்த முயன்றனர். இதனால் ஆத்திரமடைந்த பெண்கள், அப்பகுதியில் நின்றவர்களுடன் தள்ளுமுள்ளுவில் ஈடுபட்டனர். இதில் ஸ்கூட்டர் கீழே சாய, அந்த இடமே பெரும் போர்க்களமாக மாறியது.

போக்குவரத்து முடங்கியதையடுத்து, அங்கு பணியில் இருந்த போக்குவரத்துக் காவலர் விரைந்து வந்து பெண்களை அமைதிப்படுத்தி வாகனப் போக்குவரத்தை சீர்செய்ய முயன்றார். ஆனால், காவலரையும் மதிக்காத அப்பெண்கள், அவரை மிக நெருங்கிச் சென்று கைதட்டி ஏளனம் செய்ததோடு, தகாத வார்த்தைகளால் பேசி சவால் விட்டனர்.

பொதுமக்களுக்கும் போக்குவரத்துக்கும் பெரும் அச்சுறுத்தலாக அமைந்த இந்த முழு சம்பவத்தையும் அங்கிருந்த பொதுமக்கள் தங்கள் செல்போன்களில் பதிவு செய்தனர். காவல்துறை அதிகாரியிடம் வாக்குவாதம் செய்து பொது அமைதிக்குக் குந்தகம் விளைவித்த இந்த வீடியோ காட்சி தற்போது இணையத்தில் வைரலாகப் பரவி வருகிறது. இச்சம்பவம் தொடர்பாகப் போலீசார் விசாரணை மேற்கொண்டு வருகின்றனர்.

இந்த முழு சம்பவத்தையும் அங்கிருந்த பொதுமக்கள் வீடியோவாகப் பதிவு செய்து சமூக வலைதளங்களில் பதிவேற்றினர். இக்காட்சிகள் இணையத்தில் வெளியாகி கடும் அதிர்வலைகளை ஏற்படுத்தியதுடன், பொது அமைதியைச் சீர்குலைத்தவர்கள் மீது கடும் நடவடிக்கை எடுக்க வேண்டும் என்ற கோரிக்கையும் எழுந்தது.

மன்னிப்பு கேட்டு முற்றுப்புள்ளி

சமூக வலைதளங்களில் வீடியோ வைரலாகி பொதுமக்களிடையே கடும் விமர்சனங்கள் எழுந்ததையடுத்து, அந்தப் பெண்கள் இருவரும் தங்கள் தவறான நடத்தைக்காக பகிரங்கமாக மன்னிப்பு கோரியுள்ளனர். பதற்றத்திலும் ஆத்திரத்திலும் ஏற்பட்ட உணர்ச்சிவசத்தால் அவ்வாறு நடந்துகொண்டதாகவும், போலீசாரையோ பொதுமக்களையோ அவமதிக்கும் நோக்கம் தங்களுக்கு இல்லை என்றும் அவர்கள் தெரிவித்துள்ளனர். இந்தச் சம்பவம் தொடர்பாகக் காவல்துறையினர் தொடர்ந்து விசாரணை மேற்கொண்டு எச்சரித்து அனுப்பி வைத்துள்ளனர். அதே சமயம் இவர்கள் போதை பொருட்களுக்கு அடிமையாகி உள்ளார்களா என்று விசாரணையும் நடந்து வருகிறது.