சென்னை: இந்தியாவில் திருமணம், விவாகரத்து, சொத்து உரிமை போன்ற தனிநபர் சட்டங்களை நாடு முழுவதும் உள்ள அனைத்து மதத்தினருக்கும் ஒரே மாதிரியாக மாற்றும் "பொது சிவில் சட்டத்தை" அமல்படுத்த மத்திய அரசு தீவிரமாக செயல்பட்டு வருகிறது.
சமீபத்தில் மும்பையில் நடைபெற்ற செய்தியாளர் சந்திப்பில் பேசிய மத்திய உள்துறை அமைச்சர் அமித் ஷா, 2029-ம் ஆண்டு நாடாளுமன்றத் தேர்தலுக்கு முன்பாக, பாஜக மற்றும் என்.டி.ஏ கூட்டணி ஆட்சியில் இருக்கும் 21 மாநிலங்களிலும் பொது சிவில் சட்டம் அமல்படுத்தப்படும் என்று அதிரடியாக அறிவித்தார்.
ஏற்கனவே உத்தரகாண்ட் மாநிலத்தில் இந்தச் சட்டம் அமலுக்கு வந்துவிட்டது. குஜராத், அஸ்ஸாம் மற்றும் மத்தியப் பிரதேசம் ஆகிய மாநிலங்களிலும் இதற்கான சட்ட மசோதாக்கள் தயாராகிவிட்டன. ஆனால், அமித் ஷாவின் இந்த தற்போதைய அறிவிப்பு என்.டி.ஏ கூட்டணியில் உள்ள பல்வேறு கட்சிகளிடையே வெவ்வேறான கருத்துக்களை வெளிப்படுத்தியுள்ளது. அமித் ஷாவின் இந்த முடிவிற்கு மகாராஷ்டிராவின் முதலமைச்சர் ஏக்நாத் ஷிண்டே தலைமையிலான சிவசேனா கட்சி முழு ஆதரவு அளித்துள்ளது. பாலசாஹேப் தாக்கரேவின் கொள்கைப்படி, நாட்டில் உள்ள அனைவருக்கும் ஒரே மாதிரியான நீதி கிடைக்க பொது சிவில் சட்டம் அவசியம் என்று அவர்கள் கூறியுள்ளனர். அதேபோல், ஹெச்.ஏ.எம் கட்சியும் இத்திட்டத்தை வரவேற்றுள்ளது. ஆந்திராவின் ஆளுங்கட்சியான தெலுங்கு தேசம் நாடாளுமன்றக் குழுத் தலைவர் லவ் ஸ்ரீகிருஷ்ண தேவிகாயலு பேசுகையில், "நாங்கள் பொது சிவில் சட்டத்தை ஆதரிக்கிறோம். இந்தியாவில் பல்வேறு மதங்களும் கலாச்சாரங்களும் இருப்பதால், அனைத்துத் தரப்பு மக்களுடனும் ஆலோசித்துவிட்டு இதை மாநில அளவில் கொண்டு வருவோம்" என்று தெரிவித்துள்ளார். அதேநேரத்தில், பீகாரில் பாஜகவுடன் சேர்ந்து ஆட்சி நடத்தும் நிதிஷ் குமாரின் ஜனதா தளம் கட்சி, இந்த விவகாரத்தில் முற்றிலும் மாறுபட்ட நிலையை எடுத்துள்ளது. ஜே.டி.யு கட்சியின் மூத்த தலைவர் ஷியாம் ரஜாக் இதுகுறித்துப் பேசுகையில், "நாடாளுமன்றத்தில் இந்த மசோதா வந்தபோதே எங்கள் தலைவர் நிதிஷ் குமார் தெளிவான ஒரு கருத்தைச் சொன்னார். தேசிய அளவில் இச்சட்டத்திற்கு ஆதரவு அளித்தாலும், பீகார் மாநிலத்தில் இதனை அமல்படுத்த அனுமதிக்க மாட்டோம் என்பதில் நாங்கள் உறுதியாக இருக்கிறோம்" என்று தெரிவித்துள்ளார். பீகாரின் சமூக மற்றும் மத பன்முகத்தன்மையைக் கருத்தில் கொண்டு, இந்த விவகாரம் குறித்து அமித் ஷாவுடன் பேச்சுவார்த்தை நடத்த உள்ளதாகவும் அந்த கட்சி அறிவித்துள்ளது. மத்திய அமைச்சரும் எல்.ஜே.பி (ராம் விலாஸ்) கட்சித் தலைவருமான சிராக் பாஸ்வானும் அவசரப்பட்டு முடிவு எடுக்க முடியாது என்று கூறியுள்ளார். "இந்தியாவின் சமூகக் கட்டமைப்பு மிகவும் தனித்துவமானது. இங்குள்ள பழங்குடியின மக்களுக்கு அரசியலமைப்புச் சட்டத்திலேயே தனி உரிமைகள் வழங்கப்பட்டுள்ளன. எனவே, பொது சிவில் சட்டத்தின் முழு வரைவு வெளிவந்த பிறகே, அனைத்து மக்களின் நலன்களையும் ஆராய்ந்து எங்கள் கட்சி தனது இறுதி முடிவை அறிவிக்கும்" என்று கூறியுள்ளார். பாஜக அரசாங்கம் தேசிய அளவில் ஒரே சட்டத்தைக் கொண்டு வருவதற்குப் பதிலாக, ஒவ்வொரு மாநிலமாகச் சட்டமியற்றும் வழியைத் தேர்ந்தெடுத்துள்ளது. ஆனால், கூட்டணிக்குள் இருக்கும் ஜே.டி.யு மற்றும் எல்.ஜே.பி போன்ற கட்சிகளின் இத்தகைய எச்சரிக்கை நிலைப்பாடு, பாஜகவுக்கு அரசியல் ரீதியாகச் சில சவால்களை ஏற்படுத்தியுள்ளது. வரும் 2029 தேர்தலுக்குள் 21 மாநிலங்களில் பொது சிவில் சட்டத்தை முழுமையாக அமல்படுத்த பாஜக திட்டமிட்டுள்ள நிலையில், கூட்டணிக் கட்சிகளின் எதிர்ப்பையும் சந்தேகங்களையும் எவ்வாறு சமாளிக்கப் போகிறது என்பதைப் பொறுத்திருந்துதான் பார்க்க வேண்டும். இந்த அறிவிப்பு வெளியானதிலிருந்து, இந்தியாவின் பல்வேறு மாநிலங்களிலும், குறிப்பாகத் தமிழக அரசியலிலும் பெரும் பரபரப்பு ஏற்பட்டுள்ளது. தமிழகத்தில் தற்போது விஜய்யின் தலைமையிலான தமிழக வெற்றிக் கழகம் மற்றும் அதன் காங்கிரஸ் உள்ளிட்ட கூட்டணிக் கட்சிகள் ஆட்சியில் உள்ளன. இந்தச் சூழலில், மத்திய அரசின் இந்த அதிரடி அறிவிப்புக்கு தமிழக அரசு மற்றும் தவெகவின் நிலைப்பாடு என்னவாக இருக்கும் என்பது பொதுமக்களின் மனதில் எழுந்துள்ள மிகப்பெரிய கேள்வியாகும். அரசியல் பார்வையாளர்களும், பத்திரிகையாளர்களும் தவெக அரசின் அடுத்த கட்ட நகர்வுகள் என்னவாக இருக்கும் என்பதை உன்னிப்பாகக் கவனித்து வருகின்றனர். பொது சிவில் சட்டம் என்றால் என்ன என்பதை எளிமையாகப் புரிந்துகொள்ள வேண்டும். இந்தியாவில் இந்து, இஸ்லாமியர், கிறிஸ்தவர் மற்றும் சீக்கியர் போன்ற பல்வேறு மதங்களைச் சேர்ந்த மக்கள் வசிக்கிறார்கள். ஒவ்வொரு மதத்திற்கும் திருமணம், விவாகரத்து, தத்தெடுத்தல் மற்றும் சொத்துரிமை போன்ற தனிநபர் சட்டங்கள் தனித்தனியாக உள்ளன. பொது சிவில் சட்டம் என்பது இந்த மத ரீதியான தனிநபர் சட்டங்களை எல்லாம் நீக்கிவிட்டு, நாட்டின் அனைத்துக் குடிமக்களுக்கும் ஒரே மாதிரியான பொதுவான சட்டத்தைக் கொண்டுவருவதாகும். ஆனால், இந்தியா போன்ற பல மதங்களும், பல கலாச்சாரங்களும் கொண்ட ஒரு நாட்டில் அனைத்து மக்களுக்கும் ஒரே சட்டம் என்பது சாத்தியமா என்ற கேள்வி எழுகிறது. குறிப்பாக, சிறுபான்மை மக்கள் மத்தியில் இந்தச் சட்டம் தங்களது கலாச்சார மற்றும் மத சுதந்திரத்தைப் பறிக்கும் ஒரு நடவடிக்கையாகப் பார்க்கப்படுகிறது. இதன் காரணமாகவே எதிர்க்கட்சிகள் அனைத்தும் இதனை எதிர்த்து வருகின்றன. மத்திய அரசு திணிக்க முயலும் பொது சிவில் சட்டத்திற்கு எதிராக தவெக அரசு தனது கடுமையான எதிர்ப்பைப் பதிவு செய்யுமா என்று எதிர்பார்க்கப்படுகிறது. ஆனால் தவெக இதில் நிலைப்பாட்டை அறிவிக்காமல் அமைதியாக உள்ளது. அதோடு முஸ்லீம் லீக் கட்சி தவெக உடன் கூட்டணியில் உள்ளதால் விஜய் இந்த சட்டத்தை ஆதரிக்கவே முடியாது. இந்த விவகாரத்தில் தவெக அரசின் அதிகாரப்பூர்வமான அடுத்தடுத்த அறிவிப்புகள் தமிழக அரசியலில் மிக முக்கியமான திருப்புமுனையாக அமையும் என்பதில் ஐயமில்லை.ஆதரவு தெரிவிக்கும் சிவசேனா மற்றும் TDP
'பீகாரில் அனுமதிக்க மாட்டோம்' - நிதிஷ் குமாரின் JD(U) அதிரடி
சிராக் பாஸ்வானின் நிலைப்பாடு
ஒரே நாடு, ஒரே சட்டம் - சாத்தியமா?
விஜய் நிலைப்பாடு