சென்னை: அதிமுகவின் 4 எம்எல்ஏக்கள் பதவியை ராஜினானமா செய்துவிட்டு, தவெகவில் இணைந்தனர். இந்த சூழலில் தற்போது முன்னாள் அமைச்சர் விஜயபாஸ்கர் அதிமுகவில் இருந்து விலகி உள்ளார். ஆனால் அவர் இன்னும் தவெகவில் இணையவில்லை.. எனினும் விஜயபாஸ்கர் திமுகவில் இணையப்போவது இல்லை என்பது உதயநிதி ஸ்டாலின் வெளியிட்ட இந்த மீம்ஸ்ஸால் உறுதியாகி உள்ளது. உதயநிதி ஸ்டாலின் விஜய் தலைமையிலான அரசை சோபா மாடல் அரசு என்று விமர்சித்து வந்தார். முதலில் 4 சீட்டர் சோபாவாக இருந்த நிலையில், தற்போது ஐந்து சீட்டர் சோபாவாக மாறி உள்ளது என்று கிண்டல் செய்யும் பாணியில் உதயநிதி ஸ்டாலின் விமர்சித்துள்ளார்.
தமிழக அரசியல் களம் இப்போது டிஜிட்டல் போர்க்களமாக மாறியிருக்கிறது. அதிலும் குறிப்பாக, கோட்டையைத் தவெக கைப்பற்றியதில் இருந்தே, எதிர்க்கட்சி வரிசையில் இருக்கும் திமுக, விஜய் தலைமையிலான அரசை சும்மா விடுவதாக இல்லை. "இது மக்கள் அரசு அல்ல... வெறும் சோபா மாடல் அரசு" என்று உதயநிதி ஸ்டாலின் தொடர்ந்து விமர்சித்து வரும் சூழலில், தற்போது அவர் பகிர்ந்துள்ள சோபா மீம் அரசியல் வட்டாரத்தில் பரபரப்பை ஏற்படுத்தி உள்ளது.
தவெகவின் கொடி நிறமான சிவப்பு மற்றும் மஞ்சள் வண்ணத்தில், தவெகவின் யானை சின்னம் பொறித்த குஷன்களுடன் கூடிய இரண்டு சோபாக்கள் காட்டப்பட்டுள்ளன. மேலே இருப்பது "4 SEATER SOFA" (4 பேர் அமரக்கூடிய சோபா). நடுவே "Much bigger now" (இப்போது இன்னும் பெரிதாகிவிட்டது) என்ற வாசகத்துடன், கீழே "5 SEATER SOFA" (5 பேர் அமரக்கூடிய சோபா) வைக்கப்பட்டிருக்கிறது. திமுகவில் இருந்து விலகி ஏற்கனவே தவெகவில் இணைந்த 4 எம்.எல்.ஏ-க்களைக் குறிக்கும் விதமாகத்தான் முதலில் '4 சீட்டர் சோபா' சித்தரிக்கப்பட்டுள்ளது. தற்போது, அதிமுகவின் சீனியர் புள்ளியான முன்னாள் அமைச்சர் சி.விஜயபாஸ்கர் அக்கட்சியில் இருந்து விலகியுள்ளார். அவர் இன்னும் அதிகாரப்பூர்வமாக தவெகவில் இணையவில்லை என்றாலும், அவர் தவெகவை நோக்கித்தான் நகர்கிறார்; அந்த சோபாவின் 5-வது சீட் அவருக்காகத்தான் தயாராகிறது என்பதைத்தான் இந்த '5 சீட்டர் சோபா' மீம் எதிர்க்கட்சி தலைவர் உதயநிதி ஸ்டாலினால் பகிரப்பட்டுள்ளது. விஜயபாஸ்கர் அதிமுகவை விட்டு வெளியேறியதும், அவர் திமுகவிற்கு தாவக்கூடும் என்றும் ஒரு சில கிசுகிசுக்கள் உலா வந்தன. ஆனால், திமுக இளைஞரணி செயலாளரான உதயநிதி தரப்பில் இருந்து வந்துள்ள இந்த சோபா மீம் தாக்குதல், அந்த வதந்திகளுக்கு முற்றுப்புள்ளி வைத்துள்ளது. திமுகவில் விஜயபாஸ்கருக்கு திமுகவில் இடமில்லை, அவர் விஜய்யின் தவெக பக்கம்தான் போகப்போகிறார்" என்பதை முன்கூட்டியே கணித்து, தவெகவை 'சோபா மாடல்' என்று வம்புக்கு இழுக்கும் பாணியில் இந்த மீமை உதயநிதி பகிர்ந்துள்ளார். ஏற்கனவே 4 எம்எல்ஏக்கள் பதவியை விட்டு விலகி வந்துள்ளதால், விஜய்யின் திருச்சி கிழக்கு உள்பட ஐந்து தொகுதிக்கு இடைத்தேர்தல் நடைபெறுவதாக இருந்தது. இப்போது விஜயபாஸ்கரும் ராஜினாமா செய்துள்ளதால், அந்த எண்ணிக்கை ஆறாகஉயர்ந்துள்ளது. இன்னும் சிவி சண்முகம் என்ன முடிவு எடுக்க போகிறார் என்பது தெரியவில்லை.. அவரையும் சேர்த்தால் மொத்தம் 7 தொகுதிகள் வரை இடைத்தேர்தல் உறுதியாக நடைபெறலாம் என கூறப்படுகிறது. எனினும் 10 முதல் 12 பேர் வரை ராஜினாமா செய்து தவெகவிற்கு வர வாய்ப்பு உள்ளதாகவும், அப்படி வந்து அவர்கள் வெற்றி பெற்றால், விஜய் முழு மெஜாரிட்டி பெற்றுவிடுவார் என்றும் கூறுகிறார்கள். அதுவரை ராஜினாமாக்கள் தொடரலாம் என்றும் சில அரசியல் நிபுணர்கள் விமர்சிக்கிறார்கள்.