சென்னை: தவெக அரசின் முதல் பட்ஜெட் கூட்டத்தொடர் தொடங்கப்போகிறது. இதனால் ஒட்டுமொத்த மாநிலத்தின் பார்வையும் சென்னை செயின்ட் ஜார்ஜ் கோட்டையை நோக்கித் திரும்பியிருக்கிறது. புதிய அரசு தாக்கல் செய்யப்போகும் முதல் பட்ஜெட் என்பதால் மக்கள் மத்தியில் எக்கச்சக்கமான எதிர்பார்ப்புகள் ஏற்பட்டுள்ளன. ஆனால் அதையும் தாண்டி, இந்த முறை சட்டசபையில் அரங்கேறப்போகும் "விஜய் vs உதயநிதி" நேரடி அரசியல் யுத்தம் தான் இப்போதைய ஹாட் டாபிக்காக உள்ளது.
ஏற்கனவே தமிழக சட்டசபையில் தவெக அரசு மீதான நம்பிக்கை கோரும் வாக்கெடுப்பு நடந்தபோது, எதிர்க்கட்சித் தலைவராக உதயநிதி ஆற்றிய உரை ஆளுங்கட்சியை நிலைகுலைய செய்தது.
அதற்கு சட்டசபையிலேயே பதிலடி கொடுக்க முடியாமல், முதல்வர் விஜய் பிறகு தனது வீட்டிலிருந்து நீண்ட அறிக்கை ஒன்றை வெளியிட்டார். இது அரசியல் வட்டாரத்தில் பெரும் விவாதங்களை கிளப்பியிருந்தது.. அதனால் இந்த பட்ஜெட் கூட்டத்தொடரில் எந்தவிதமான விமர்சனத்திற்கும், உடனுக்குடன் அவையிலேயே அதிரடியாகப் பதிலடி கொடுக்க முதல்வர் விஜய் மிகத் தீவிரமாக வியூகம் வகுத்து வருகிறாராம். துறை சார்ந்த விவாதங்களின்போது எதிர்க்கட்சியினரின் கேள்விகளுக்கு புள்ளிவிவரங்களுடன் எப்படி வாயடைக்கலாம் என்பது குறித்து முதல்வர் விஜய் மும்முரமாக தயாராகி வருவதாக கோட்டை வட்டாரங்கள் தெரிவிக்கின்றன. அதிலும், கடந்த முறை நேர்ந்த சுணக்கத்தை தவிர்த்து, இந்த முறை எதிர்க்கட்சித் தலைவரின் அத்தனை அஸ்திரங்களையும் முறியடிக்க முதல்வர் தரப்பில் முழுவீச்சில் ஆயத்த பணிகள் நடந்து கொண்டிருப்பதாக தகவல்கள் உலா வருகின்றன. இன்னொருபக்கம், ஆளுங்கட்சியின் இந்த வியூகத்தை முன்கூட்டியே கணித்துள்ள எதிர்க்கட்சித் தலைவர் உதயநிதியும் கொஞ்சமும் சளைக்காமல் களம் காணத் துடித்து கொண்டிருக்கிறாராம். இந்த பட்ஜெட் கூட்டத்தொடரில் தவெக அரசை மிகக் கடுமையான கேள்விகளால் திணறடிக்கப் பல முக்கியப் பிரச்சனைகளை உதயநிதி கையில் எடுக்க உள்ளதாக தெரிகிறது. தமிழகத்தின் வாழ்வாதார பிரச்சனையான மேகதாது அணை விவகாரம், மாநிலம் முழுவதும் பரவலாக பேசப்படும் மின் வெட்டுப் பிரச்சனை மற்றும் சட்டம்-ஒழுங்கு நிலைமை போன்றவற்றை மையமாக வைத்து, சட்டசபையில் கவன ஈர்ப்பு தீர்மானம் கொண்டு வரத் திமுக திட்டமிட்டுள்ளது. இந்த விவாதங்களின் போது ஆளுங்கட்சிக்கு கடுமையான முட்டுக்கட்டை போடுவதற்காக, காவேரி விவகாரம் கடந்து வந்த நீண்ட பாதை குறித்து முன்னாள் அமைச்சர்கள் மற்றும் ஓய்வுபெற்ற அரசு அதிகாரிகளின் ஆலோசனைகளை பெற்று, வலுவான தரவுகளை உதயநிதி சேகரித்து வைத்திருக்கிறாராம்.. அதுமட்டுமல்ல, மின் வாரியத்தின் நிலவரங்கள் மற்றும் கடந்த 5 வருட சட்டம்-ஒழுங்கு புள்ளிவிவரங்களையும் விரல் நுனியில் வைத்திருக்கிறாராம். சட்டசபை விவாதங்களில் நீண்ட அனுபவம் வாய்ந்த வல்லுநர்களைச் சந்தித்து, தினந்தோறும் பல மணி நேரங்களை இதற்காகவே அவர் செலவழித்தும் வருவதாக கூறப்படுகிறது. ஒருபக்கம் முதல் பட்ஜெட் மூலம் மக்கள் செல்வாக்கை நிலைநிறுத்த முதல்வர் விஜய்யும், மறுபக்கம் மக்கள் பிரச்சினைகளை முன்வைத்து ஆளுங்கட்சியைத் திணறடிக்க எதிர்க்கட்சித் தலைவர் உதயநிதியும் சம பலத்துடன் மோதுகிறார்கள்.. ஜூன் 18 அன்று தொடங்கவிருக்கும் இந்த பட்ஜெட் கூட்டத்தொடரில், உதய் & விஜய் இவர்களில் யார் கை ஓங்கும் என தெரியவில்லை.. பொறுத்திருந்து பார்ப்போம்..!!ஜூன் 18 பட்ஜெட்
உதயநிதி ஸ்டாலின் கையில் லிஸ்ட்
சட்டசபை விவாதங்கள்