CM 2031 திருமாவளவன் வாகனத்தின் எண்ணும்.. வன்மத்தைக் கக்கும் எண்ணமும்.. நடந்தது என்ன? விசிக விளக்கம்

தமிழர் எழுச்சி நாள்

சாதி ஒழிப்பையும், தமிழ்த்தேசியத்தையும் மூச்சுக்காற்றாய் முன்நிறுத்தி, உழைக்கும் தமிழ் மக்களையும் அரசியல் சக்தியாக அணிதிரட்டுவதற்காகவே தன் ஒட்டுமொத்த வாழ்வையும் ஒப்படைத்துக் கொண்டவர் தலைவர் முனைவர் தொல். திருமாவளவன் அவர்கள். ஆகவேதான், சூதும் சூழ்ச்சியும் சூழ்ந்துகவ்வும் அண்மைகால அரசியல் களத்தில், அவருடைய பிறந்த நாளை "தலித் எழுச்சி நாள்" என்று கொண்டாடாமல் "தமிழர் எழுச்சி நாள்" என்று ஆண்டுதோறும் ஆகஸ்ட் 17 அன்று சிறுத்தைகள் கொண்டாடி வருகிறோம்.

அந்தக் கொண்டாட்டத்தின் அடுத்த பரிணாமமாக தலைவரின் பொதுவாழ்வு குறித்த தமிழ் மக்களின் நம்பிக்கையை வலிமைப்படுத்தும் எண்ணவோட்டத்தில்தான் 2008 ஆண்டின் பிறந்த நாளை "களப்பணியில் கால்நூற்றாண்டு" என்கிற குறியீட்டைக் கொண்டு கொண்டாடினோம். 2012 இல் "எழுச்சித்தமிழரின் பொன்விழா" ஆண்டையும் அரசியல் கருப்பொருள் ஏந்தி நடத்தி முடித்தோம்.

தமிழ்ச் சமூகத்தின் மீட்சிக்காகவும் தமிழ்நிலத்தின் தலைநிமிர்வுக்காகவும் எழுச்சித்தமிழர் முன்னெடுத்த, பங்கெடுத்த போராட்டங்களின் தொகுப்பாக இவ்விழாக்கள் வடிவம் பெற்றன. மாறாக, அரசியல் தளத்தைத் தாண்டி தனிநபர் கொண்டாட்ட களமாக இவை எள்ளளவும் எண்ணம் ஏந்தியவை இல்லை. சாதியச் சமூகத்தின் பொதுப்புத்தியைச் சாம்பலாக்கும் "சனநாயக திருவிழா"வாகவே இவை நடந்தேறின.

படப்பிடிப்பின் ஒரு பகுதியாக

தமிழக அரசியல் களத்தில் முன்னெப்போதும் நிகழ்த்தாத பேரதிர்வை சிறுத்தைகளின் அரசியல் சீற்றத்துடன் விதைத்தன. இத்தகை கருப்பொருளை உட்கொண்டுதான் 'எழுச்சித்தமிழர்' அவர்கள் பொதுவாழ்வில் 35 ஆண்டுகள் நிறைவு செய்ததை வெளிப்படுத்தி வாழ்த்திடும் நிகழ்ச்சி ஒன்றை வடிவமைத்திட நாங்கள் திட்டமிட்டு இருந்தோம்.

இந்நிலையில்தான், தலைவரின் அரசியல் நகர்வின் பேரெழுச்சியால் பெரிதும் ஈர்க்கப்பட்ட "இந்தியா மீடியா வொர்க்ஸ்" எனும் நிறுவனத்தை நடத்தி வரும் திரு. ஜான் அமலன் அவர்கள் தனது நிறுவனத்தின் சார்பில் "திருமா 35: சமூகநீதியின் சகாப்தம்" என்கிற தலைப்பில் நிகழ்ச்சி ஒன்றை ஒருங்கிணைத்திட விருப்பத்தை வெளிப்படுத்தினார். கட்சியின் தலைமை பொறுப்பாளர்கள் இந்நிகழ்வின் பொருண்மை புரிந்து இதற்கு இசைவளித்தோம். அதனடிப்படையில், கடந்த 19.09.2026 அன்று சென்னை பூந்தமல்லியில் இந்நிகழ்வு நடைபெற்றது.

"நிகழ்ச்சி நிரல், கலந்துகொள்ளும் விருந்தினர்களை முடிவு செய்வது" மற்றும் சில அடிப்படைக் கூறுகளைக் கொண்டு தலைவர் அவர்களை வைத்து படப்பிடிப்பு நடத்துவதற்கும் "இந்தியா மீடியா வொர்க்ஸ்" நிறுவனத்தின் திரு. ஜான் அமலன் திட்டமிட்டு இருந்தார். படப்பிடிப்பின் ஒரு பகுதியாக கூரை திறக்கப்பட்ட வாகனத்தில் தலைவர் வரும் போது படம் எடுக்கப்பட்டது. அந்தக் காட்சியும் வாகன எண்ணும் சமூக ஊடகங்களில் வியப்பிற்குரிய எண்ணிக்கையில் பகிரப்பட்டது.

ஏற்றுக்கொள்ள மனமில்லாமல்

படப்பிடிப்புத் தளத்தில் படம் பிடிக்கப்பட்ட அந்த வாகன எண் குறித்து வன்மத்தை நெஞ்சில் நிறுத்தி அவரவர் மலிவு அரசியல் மனநிலையோடு காழ்ப்புணர்ச்சிகளைக் கக்குகின்றனர். இது அவரவரின் அரசியல் தகுதியை தரநிர்ணயம் செய்கிறது. தலைவர் அவர்களை வைத்து படம் பிடிக்கப்பட்ட அந்த விலை உயர்ந்த கார் படப்பிடிப்புகளுக்கு வாடகை விடப்படும் கார்.

மேலும் "ஆளும் கட்சியாக விசிக" என்கிற எதிர்கால திசைப்புள்ளியை வெளிப்படுத்த படப்பிடிப்பு குழுவினர் டிஎன் 07 சிஎம் 2031 என வாகன எண்ணை வடிவமைத்திருந்தனர். இப்படப்பிடிப்பு 'பிலிம் சிட்டி' என்கிற தனியார் உள்ளரங்கில் நடைபெற்றது. உள்ளரங்கப் படப்பிடிப்புகளுக்கு விரும்பிய எண்ணைப் பதித்து படமெடுப்பது இயல்பாக நடக்க கூடிய ஒன்று.

தலைவர் அவர்களுக்கு "படப்பிடிப்பில் இடம்பெறும் காட்சிகள், படப்பிடிப்பில் பயன்படுத்திய காரின் ரகம், அதனுடைய எண் ஆகியவற்றை கலந்தாய்வு மேற்கொள்ள நேரமின்மை சூழ்ந்ததால் நிகழ்ச்சி நெறியாளுகைக் குழுவே இறுதி செய்தது. இதனை ஏற்றுக்கொள்ள உள்ளமில்லாமல் உளறிக்கதறும் அர்ப்பர்களின் புலம்பல் ஊடகங்களை உலுக்குகிறது.

எழுச்சித் தமிழர் மீதும் விடுதலைச் சிறுத்தைகள் கட்சியின் மீதும் நாள்தோறும் அவதூறை அள்ளி வீசுபவர்கள் இன்று தலைவர் எழுச்சித்தமிழர் அவர்கள் 'சிஎம்' என பதித்த காரில் வருவதையே தாங்கிக்கொள்ள முடியாமல் வழக்கம்போல் வன்மத்தைச் சிந்துகின்றனர். சிதறிக்கிடந்த ஒடுக்கப்பட்ட மக்களை அமைப்பாக்கி, அரசியல்படுத்தி, அங்கீகாரத்தையும் பெற்று அரசியல் களத்தில் அதிகார எல்லையும் தொட்டவர் எழுச்சித்தமிழர் அவர்கள்.

இன்று தீர்மானித்ததுபோல் நாளைய தமிழகத்தின் அரசியல் திசைவழியை மக்கள் தீர்மானிக்கும் அதை உளப்பூர்வமாக உள்வாங்குபவர்தான் எழுச்சித்தமிழர். காலத்தின் தீர்ப்பை பெருமகிழ்வோடு வரவேற்று சிறுத்தைகள் காத்திருப்போமே தவிர; எரிச்சலோடு வெறுப்பு அரசியலில் வெந்து போபவர்கள் அல்ல சிறுத்தைகள்.