சென்னை: தவெக தலைமையிலான அமைச்சரவையில் விசிகவும் பங்கு பெறுவதாக திருமாவளவன் அறிவித்துள்ளார். அமைச்சரவை பதவிக்காக வன்னியரசு பெயரை பரிந்துரைத்துள்ளதாகவும் அவர் தெரிவித்துள்ளார். இந்திய யூனியூன் முஸ்லீம் லீக் கட்சியை தொடர்ந்து தவெக அமைச்சரவையில் விசிகவும் இணைகிறது.
விஜய் தலைமையிலான தமிழக வெற்றிக் கழக அரசின் அமைச்சரவையில் விசிக பங்கேற்கும் என்று திருமாவளவன் அறிவித்துள்ளார். கட்சி நிர்வாகிகள் பெரும்பாலானோர் எடுத்த முடிவின் அடிப்படையில் இந்த முடிவு எடுக்கப்பட்டுள்ளதாகவும் வன்னியரசு அமைச்சரவையில் இடம் பெறுவார் எனவும் திருமாவளவன் அறிவித்துள்ளார்.
தமிழக சட்டசபை தேர்தலில் தனிப்பெரும் கட்சியாக தவெக வென்றது. 108 இடங்கள் மட்டுமே கிடைத்ததால், ஆட்சி அமைக்க திமுக கூட்டணி கட்சியின் ஆதரவை தவெக நாடியது. திமுக கூட்டணியில் போட்டியிட்டு 5 இடங்களில் வென்ற காங்கிரஸ் முதல் கட்சியாக அக்கூட்டணியை கைகழுவிவிட்டு தவெகவுடன் கை கோர்த்தது. இதையடுத்து, கம்யூனிஸ்ட்கள், விசிக, இந்திய யூனியன் முஸ்லிம் லீக் ஆகிய கட்சிகள் வெளியில் இருந்து ஆதரவு தருவதாக அறிவித்தன. எனினும், அமைச்சரவையில் விசிக உள்ளிட்ட கட்சிகள் இடம் பெற வேண்டும் என்பது முதல்வர் விஜய்யின் விருப்பமாக இருந்தது. இது குறித்த தனது விருப்பத்தை விசிக மற்றும் இந்திய யூனியன் முஸ்லிம் லீக் கட்சிகளிடம் விஜய் கூறியிருந்தார். நேற்று தவெக அமைச்சர் ஆதவ் அர்ஜுனா வெளிப்படையாகவே இந்த அழைப்பை விடுத்தார். இதையடுத்து, கட்சியின் தேசிய தலைமையிடம் ஆலோசித்துவிட்டு சொல்வதாக கூறிய இந்திய யூனியன் முஸ்லீம் லீக், தவெக அமைச்சரவையில் இடம் பெற சம்மதம் தெரிவித்தது. பாபநாசம் தொகுதி எம்.எல்.ஏ ஷாஜஹான் அமைச்சரவையில் இடம் பெறுவார் என்று அறிவிக்கப்பட்ட நிலையில், விசிக என்ன முடிவு எடுக்கும் என்ற எதிர்பார்ப்பு அரசியல் வட்டாரத்தில் அதிகரித்தது. விசிகவின் நிலைப்பாட்டை மொத்த தமிழகமும் உற்று நோக்கிய நிலையில் இன்று கட்சி நிர்வாகிகளுடன் ஆலோசித்து அறிவிப்பதாக திருமாவளவன் கூறினார். இதன்படி கட்சியினருடனான ஆலோசனைக்கு பிறகு செய்தியாளர்களிடம் பேசிய திருமாவளவன், தவெக அமைச்சரவையில் விசிக இடம் பெறும் என்றார். வன்னியரசு, தமிழக அமைச்சரவையில் இடம் பெறுவார் என்றும் கூறினார். வன்னியரசுக்கு ஆதிதிராவிடர் நலத்துறை அமைச்சர் பொறுப்பு வழங்கப்படும் என்று எதிர்பார்க்கப்படுகிறது. புதிய அமைச்சர்கள் பதவியேற்பு விழா நாளை நடைபெறுகிறது. இதுகுறித்து ஆளுநர் மாளிகையில் இருந்து அதிகாரப்பூர்வ அறிவிப்பு வெளியாகி உள்ளது. திமுக கூட்டணியில் இடம் பெற்று வெற்றி பெற்ற காங்கிரஸ், விசிக, இந்திய யூனியன் முஸ்லிம் லீக் ஆகிய கட்சிகள் தவெக அமைச்சரவையில் இடம் பெறுவது தமிழக அரசியல் வட்டரத்திலும் பெரும் முக்கியத்துவம் பெற்றுள்ளது. திமுக கூட்டணியை விட்டு காங்கிரஸ் ஏற்கனவே வெளியேறிய நிலையில், இதர கூட்டணிகட்சிகளும் தவெகவை நோக்கி நகர்ந்து வந்துள்ளதற்கான அறிகுறியாகவே இது பார்க்கப்படுகிறது என்று அரசியல் விமர்சகர்கள் கூறியுள்ளனர்.முஸ்லீம் லீக், விசிக முடிவு
வன்னியரசு அமைச்சர் ஆகிறார் - திருமாவளவன்
உறுதிப்படுத்திய ஆளுநர் அர்லேகர்