சென்னை: உங்கள் அப்பாவை எங்கே காணோம் என்று கொளத்தூர் தொகுதியில் முன்னாள் முதல்வர் ஸ்டாலின் தோல்வி அடைந்ததை நக்கல் செய்து முதல்வர் விஜய் சட்டசபையில் சொன்ன குட்டிக் கதையை கேட்டு அதிமுக பொதுச்செயலாளர் எடப்பாடி பழனிசாமி உற்சாகமாக சிரித்த வீடியோ டிரெண்டாகி உள்ளது.
முதல்வர் விஜய் தலைமையிலான தவெக அரசின் முதல் சட்டசபை கூட்டம் ஜூன் 18ஆம் தேதி ஆளுநர் உரையுடன் தொடங்கியது. அதன்பின் ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் தொடங்கியது. பின்னர் திமுக மற்றும் தவெக எம்எல்ஏ-க்கள் இடையே கடுமையான விவாதம் நடந்தன. இந்த நிலையில் ஆளுநர் உரைக்கு நன்றி தெரிவிக்கும் தீர்மானம் மீதான விவாதத்திற்கு முதல்வர் விஜய் பதில் உரை வழங்கினார்.
அந்த பதிலுரையின் போது விஜய் சொன்ன குட்டிக்கதையை ரசித்து கேட்ட எடப்பாடி பழனிசாமி, ஜாலியாக சிரிக்க தொடங்கினார். விஜய் பேசுகையில், ஒரு ஊரில் ஒரு பெரியவர்.. வெயில் அதிகமாக இருக்கிறது என்று கண்ணுக்கு மேல் கை வைத்து கொண்டு சுத்தி தேடி கொண்டிருந்தாராம்.. அப்போது கூட நின்ற சின்னப் பையன் என்ன தேடிட்டு இருந்தீங்க என்று கேட்டானாம்.. அதற்கு அவர், ஒன்னுமில்லைடா தம்பி.. உங்க அப்பா இங்கதான் இருப்பாருனு சொன்னாங்க.. எங்க உங்க அப்பாவையே காணோம்.. என்றாராம்.. இவ்வாறு பேசும்போது விஜய் தனது கண்களுக்கு மேலே கையை வைத்துக் கொண்டு வெயிலில் ஆளை தேடுவது போல தேடினார். அதாவது, உதயநிதியின் அப்பாவான, ஸ்டாலினை சட்டசபையில் காணவில்லை, அவர் தோற்றுவிட்டு சட்டசபைக்கு வர முடியாமல் உள்ளார் என்பதை கேலி தொனியில் செய்து காட்டினார் விஜய். மேலும் அவர் பேச்சை தொடர்கையில், எங்களுக்கும் இப்படி நக்கலாக, நய்யாண்டியாக பேச தெரியும்.. அந்த கதையில் பெரியவர் அப்படி கேட்டாராம்.. யாரும் டென்ஷனாக வேண்டாம்.. 5 நிமிடம் பேசியதற்கே கொளத்தூர் இந்த ஆட்டம் ஆடிருச்சு.. பேசு பேசுனா என்ன பண்றது என்று தெரிவித்தார். கொளத்தூர் தொகுதியில் ஸ்டாலின் அடைந்த தோல்வியை சுட்டிக்காட்டி விஜய் பேசியதோடு, ஃபினிஷ்டு என்று ஆக்ஷனில் காட்டினார். இது அங்கிருந்த தவெக உறுப்பினர்கள் மத்தியில் உற்சாகத்தை கொடுத்தது. அதேபோல் விஜய்யின் குட்டிக் கதையில், உங்க அப்பாவை காணோம் என்று சொன்ன போது, எதிரில் அமர்ந்திருந்த எடப்பாடி பழனிசாமி ஜாலியாக சிரித்து கொண்டிருந்தார். இந்த வீடியோ சோசியல் மீடியாவில் டிரெண்டாகி வருகிறது. விஜய் நேரடியாக திமுகவை அட்டாக் செய்ததும், ஸ்டாலினை நக்கல் செய்ததோடு, உதயநிதி ஸ்டாலினுக்கும் பதில் அளித்தது எடப்பாடி பழனிசாமிக்கும் உற்சாகத்தை கொடுத்துள்ளதாக பார்க்கப்படுகிறது. இதன் மூலமாக திமுக மீதான விஜய்யின் அட்டாக், அதிமுகவினரும் ரசிக்கும் வகையில் உள்ளதாக புரிந்து கொள்ள முடிகிறது.