சென்னை: தமிழ்நாடு லஞ்ச ஒழிப்பு மற்றும் ஊழல் தடுப்புத் துறையை மறுசீரமைக்கவும், அதற்கென முழுநேர இயக்குநரை உடனடியாக நியமிக்கவும் சென்னை உயர்நீதிமன்ற மதுரை கிளை அதிரடி உத்தரவிட்டுள்ளது. இதனைத் தொடர்ந்து, லஞ்ச ஒழிப்புத் துறையில் பெரும் மாற்றங்களைச் செய்வதற்கான தீவிர நடவடிக்கைகளில் தமிழக அரசு இறங்கியுள்ளது.
ரேஷன் அரிசி கடத்தல் தொடர்பான வழக்கின் விசாரணையின்போது, உயர்நீதிமன்ற மதுரை கிளை நீதிபதி, லஞ்ச ஒழிப்புத் துறையின் தற்போதைய செயல்பாடுகள் குறித்து கடுமையான கவலைகளைத் தெரிவித்தார். துறையில் உள்ள கட்டமைப்பு சார்ந்த குறைபாடுகள், புலன் விசாரணைகளில் ஏற்படும் காலதாமதம் மற்றும் தொடர்ச்சியாகக் கூடுதல் பொறுப்பில் இயக்குநர்கள் நியமிக்கப்படுவது ஆகியவை லஞ்ச ஒழிப்புத் துறையின் செயலையும் வேகத்தையும் சீர்குலைப்பதாக நீதிமன்றம் சுட்டிக்காட்டியது. லஞ்ச ஒழிப்புத் துறையில் விரிவான நிர்வாக சீர்திருத்தங்களை மேற்கொள்ளும் பொருட்டு, தலைமைச் செயலாளர் தலைமையில் 4 நபர்கள் கொண்ட உயர்நிலைக் குழுவை நான்கு வாரங்களுக்குள் அமைக்க வேண்டும் என்று தமிழக அரசுக்கு உயர்நீதிமன்றம் உத்தரவிட்டுள்ளது. இக்குழு, லஞ்ச ஒழிப்புத் துறையின் முழுமையான செயல்பாடுகள், கட்டமைப்பு தேவைகள் மற்றும் புலனாய்வு முறைகள் குறித்து விரிவாக ஆய்வு செய்து அறிக்கையைச் சமர்ப்பிக்க உள்ளது. நீதிமன்றத்தின் வழிகாட்டுதலின்படி அமைக்கப்படும் இந்த உயர்நிலைக் குழு, பல்வேறு முக்கிய அம்சங்களில் கவனம் செலுத்தும். லஞ்ச ஒழிப்புத் துறைக்கு நிலையான தலைமையை உருவாக்கி, அடிக்கடி ஏற்படும் நிர்வாக முடக்கங்களைத் தவிர்ப்பது முதன்மை இலக்காகும். மேலும், நவீன தொழில்நுட்பங்களை ஒருங்கிணைத்தல், தடயவியல் ஆய்வகங்களை தரம் உயர்த்துதல் மற்றும் விசாரணை அமைப்பை வலுப்படுத்துதல் ஆகிய பணிகளும் மேற்கொள்ளப்படும். அரசுத் துறைகளில் தொடக்க நிலையிலேயே ஊழலைத் தடுப்பதற்கான வலுவான உள்கட்டமைப்பை உருவாக்குவதற்கும் முக்கியத்துவம் அளிக்கப்படும். கூடுதல் பொறுப்பு அல்லது தற்காலிகப் பொறுப்பில் இயக்குநர்களை நியமிப்பது, துறையின் சுதந்திரமான செயல்பாட்டைப் பாதிக்கும் என்று திட்டவட்டமாகக் குறிப்பிட்ட உயர்நீதிமன்றம், உடனடியாக முழுநேர இயக்குநரை நியமிக்க வேண்டும் எனத் தெளிவான உத்தரவைப் பிறப்பித்துள்ளது. கடந்த சில மாதங்களாக லஞ்ச ஒழிப்புத் துறையின் தலைமைப் பொறுப்பில் நிலவிவரும் நிலையற்ற தன்மையே நீதிமன்றத்தின் இந்த அதிரடி உத்தரவுக்கு முக்கிய பின்னணியாகும். லஞ்ச ஒழிப்புத் துறை இயக்குநராக நியமிக்கப்பட்ட மூத்த ஐபிஎஸ் அதிகாரி ஏ. அருண், பொறுப்பேற்ற 50 நாட்களிலேயே அதிரடியாக மாற்றப்பட்டார். அவர் தமிழ்நாடு காவல் அகாடமிக்கு மாற்றப்பட்டதைத் தொடர்ந்து, லஞ்ச ஒழிப்புத் துறையின் கூடுதல் பொறுப்பு ஐபிஎஸ் அதிகாரி சி. மகேஸ்வரிடம் ஒப்படைக்கப்பட்டது. ஊழலுக்கு எதிரான மிக முக்கியமான அமைப்பான லஞ்ச ஒழிப்புத் துறையைக் கூடுதல் பொறுப்பாகக் கவனிப்பது, முக்கிய வழக்குகளின் விசாரணையைத் தாமதப்படுத்தும் என்றும் அமைப்பின் சுதந்திரமான செயல்பாட்டைப் பாதிக்கும் என்றும் சட்ட வல்லுநர்களும் சமூக ஆர்வலர்களும் தொடர்ந்து சுட்டிக்காட்டி வந்தனர். தற்போது நீதிமன்றம் கண்டிப்பான கெடு விதித்துள்ளதால், தமிழ்நாடு கேடரைச் சேர்ந்த மூத்த ஐபிஎஸ் அதிகாரி ஒருவரை முழுநேர இயக்குநராக நியமிக்க அரசு முடிவு செய்துள்ளது. லஞ்ச ஒழிப்புத் துறையின் புதிய இயக்குநராக நியமிக்கப்படும் பரிசீலனைப் பட்டியலில், மத்திய அரசுப் பணியில் இருந்து மீண்டும் தமிழ்நாடு கேடருக்குத் திரும்பியுள்ள மூத்த ஐபிஎஸ் அதிகாரி ஆனந்த் குமார் சோமானி முதலிடத்தில் உள்ளார். 1999-ஆம் ஆண்டு பேட்ச் ஐபிஎஸ் அதிகாரியான ஆனந்த் குமார் சோமானி, மத்திய மண்டலம் உட்பட தமிழகத்தின் பல்வேறு பகுதிகளில் காவல் அதிகாரியாகச் சிறப்பான சேவையாற்றியுள்ளார். மதுரை சரக டிஐஜியாகச் செயல்பட்டபோது சட்ட ஒழுங்கு பராமரிப்பு மற்றும் குற்றப் புலனாய்வில் மிகச் சிறந்த நிர்வாகத் திறனை வெளிப்படுத்தியதற்காக, 2015-ஆம் ஆண்டு குடியரசுத் தலைவரின் காவல் பதக்கத்தைப் பெற்றார். மேலும் மத்திய அரசின் பணியாளர்கள் மற்றும் பயிற்சித் துறையின் இணைச் செயலாளர் பதவிக்கான தகுதியையும் பெற்றுள்ளார். சட்டம்-ஒழுங்கு மற்றும் நுட்பமான விசாரணைகளில் இவருக்கு உள்ள நீண்ட அனுபவம் காரணமாக, லஞ்ச ஒழிப்புத் துறையின் முழுநேர இயக்குநராக இவரை நியமிப்பது குறித்து அரசு தீவிரமாக ஆலோசித்து வருகிறது. நீதிமன்றத்தின் கெடு முடிவதற்குள் புதிய இயக்குநரின் நியமனம் மற்றும் மறுசீரமைப்பு குறித்த அதிகாரப்பூர்வ அறிவிப்புகள் வெளியாகும் என எதிர்பார்க்கப்படுகிறது.நீதிமன்றத்தின் தலையீடும் சீர்திருத்த உத்தரவும்
உயர்நிலைக் குழுவின் முக்கியக் கவனம்
தலைமை நிர்வாகத்தில் நிலவும் முடக்கம்
முன்னணியில் ஆனந்த் குமார் சோமானி ஐபிஎஸ்