பாரதிராஜா யார்? ஸ்டூடியோக்களில் முடங்கிய திரையுலகை கிராமத்து மண்வாசனைக்கு கூட்டிச்சென்ற கலை வித்தகன்

பாரதிராஜா யார்

சினிமா மீது கொண்ட தீராக் காதலால் சென்னைக்கு வந்த இவர், பல முன்னணி இயக்குனர்களிடம் உதவி இயக்குனராகப் பணிபுரிந்து சினிமாவின் நுணுக்கங்களைக் கற்றுக்கொண்டார். அந்த ஆரம்பகாலப் போராட்டங்களும், வறுமையும், அனுபவங்களுமே பிற்காலத்தில் தமிழ் சினிமாவை உலுக்கியெடுத்த ஆகச்சிறந்த படைப்புகளை உருவாக்குவதற்குக் அடித்தளமாக அமைந்தன.

1977ம் ஆண்டு வெளியான '16 வயதினிலே' திரைப்படத்தின் மூலம் இயக்குனராக அறிமுகமான பாரதிராஜா, அதுவரை செட்டிங்குகளுக்குள் முடங்கிக் கிடந்த தமிழ் சினிமாவைத் திறந்தவெளிக்கு, குறிப்பாக கிராமத்து மண் வாசனைக்குக் கூட்டிச் சென்றார்.

கலாச்சாரமும், வாழ்வியல் ஆழமும்

தமிழ் சினிமாவின் போக்கையே மாற்றியமைத்த பெருமை இவருக்கு உண்டு. அதனைத் தொடர்ந்து இவர் இயக்கிய கிழக்கே போகும் ரயில், சிகப்பு ரோஜாக்கள், அலைகள் ஓய்வதில்லை, முதல் மரியாதை, கடலோரக் கவிதைகள், புதிய வார்ப்புகள், கருத்தம்மா, கல்லுக்குள் ஈரம், மண்வாசனை, டிக் டிக் டிக், காதல் ஓவியம், வேதம் புதிது போன்ற திரைப்படங்கள் வெறும் வணிகப் படங்கள் கிடையாது, அவை தமிழர்களின் கலாச்சாரத்தையும், வாழ்வியலின் ஆழத்தையும், சமூக அவலங்களையும் பேசிய மிகமுக்கியமான காவியங்கள் ஆகும்.

தன் தாயின் நினைவாக அவர் எடுத்த 'கருத்தம்மா' திரைப்படம் பெண் சிசுக்கொலைக்கு எதிரான மிகச்சிறந்த சமுதாயப் பதிவாக மாறியது அவரது பெருமைகளில் ஒன்றாகும்.

பட்டை தீட்டிய வைரங்கள்

பாரதிராஜாவின் ஆகச்சிறந்த சாதனைகளில் ஒன்று, தமிழ் சினிமாவிற்கு அவர் தாராளமாக வாரி வழங்கிய மனிதவளமாகும். ராதிகா, ராதா, ரேவதி, ரஞ்சிதா போன்ற முன்னணி கதாநாயகிகளையும், கார்த்திக், நெப்போலியன் போன்ற உன்னதமான கதாநாயகர்களையும் திரையுலகிற்கு அறிமுகப்படுத்தி, அவர்களைப் பட்டை தீட்டிய வைரங்களாக மாற்றிய பெருமை இவரையே சாரும்.

இயக்குனராகப் புகழின் உச்சியை அடைந்தவர், பிற்காலத்தில் ஒரு முதிர்ச்சியான நடிகராகவும் தன் முத்திரையைப் பதித்தார். சமீபத்தில் வெளியான திருச்சிற்றம்பலம், மகாராஜா போன்ற திரைப்படங்களில் இவரது எதார்த்தமான, உணர்வுப்பூர்வமான நடிப்பு ஒட்டுமொத்த ரசிகர்களின் இதயங்களையும் உருகச் செய்தது. இந்தியத் திரையுலகிற்கு அவர் ஆற்றிய இந்த ஈடு இணையற்ற பங்களிப்பைப் பாராட்டி, கடந்த 2004 ஆம் ஆண்டு இந்திய அரசு இவருக்கு உயரிய 'பத்மஸ்ரீ' விருதை வழங்கி கௌரவித்தது.

காவியங்கள் தந்த இயக்குனர் இமயம்

இத்தனை புகழும் பெருமைகளும் கொண்ட இந்த மாபெரும் கலைஞனின் சொந்த வாழ்க்கை, ஒரு தத்துவார்த்தமான சோகத்தை உள்ளடக்கியது. இவருக்கு மனோஜ், ஜனனி என்ற இரு பிள்ளைகள் பிறந்த நிலையில், கடந்த ஆண்டு மார்ச் 25ம் தேதி இவரது மகன் உடல்நலக் குறைவால் காலமானார்.

தன்னுடைய முதுமைக் காலத்தில் மகனைப் பறிகொடுத்த அந்தப் பாசமுள்ள தந்தையின் சோகம், உலகிற்குப் பல உணர்ச்சிகரமான காவியங்களைத் தந்த ஒரு படைப்பாளியின் வாழ்வில் நேர்ந்த ஆகப்பெரிய துயரமாகும். கோடிக்கணக்கான ரசிகர்களின் இதயங்களை வசியப்படுத்திய அந்த இயக்குனர் இமயம், தன் வாழ்வின் இழப்புகளையும் தாண்டி, தமிழ் சினிமாவின் வரலாற்றில் என்றும் அழியாத, பெருமைக்குரிய ஒரு சகாப்தமாக வீற்றிருக்கிறார்...!