இது எங்க பஸ் நீங்க ஏன் ஏறுறீங்க? 'வெற்றி பயணம்' பேருந்துகளில் ஆண்களுடன் பெண்கள் தொடர் வாக்குவாதம்!

இதன் விளைவாக, டிக்கெட் எடுத்துப் பயணிக்கும் ஆண் பயணிகளிடம் பெண்கள் வாக்குவாதத்தில் ஈடுபடுவதும், அவர்களை வண்டியை விட்டு இறங்கச் சொல்வதும், இருக்கைகளுக்காகக் கடுமையான சண்டைகள் வெடிப்பதும் எனப் பேருந்துகள் போர்க்களமாக மாறி வருகின்றன.

விழிப்புணர்வு இல்லாமை: உருவான தவறான பிம்பம்

வழக்கமாக அரசு குறிப்பிட்ட சில நேரங்களில் மகளிர் சிறப்புப் பேருந்து இயக்கும். அதில் ஆண்கள் ஏற அனுமதி கிடையாது.

ஆனால், தற்போதைய 'வெற்றி பயணம்' திட்டம் என்பது:

இது அனைத்துப் பயணிகளுக்குமான பொதுப் பேருந்து, இதில் பயணிக்கும் பெண்களுக்கு மட்டும் கட்டணமில்லை. ஆண்களுக்கு வழக்கம் போல் பயணச்சீட்டு உண்டு. முன்பகுதியில் பெண்களுக்கு ஒதுக்கப்பட்ட இருக்கைகள் போக, மற்ற இடங்களில் யார் வேண்டுமானாலும் அமரலாம்.

இருப்பினும், திட்டம் தொடங்கப்பட்ட வேகத்தில் பொதுமக்களுக்கு இதுபற்றிய தெளிவான வழிகாட்டுதல்கள் போய்ச் சேரவில்லை. "அரசாங்கம் எங்களுக்குத்தான் இந்த பஸ்ஸை இலவசமாக விட்டிருக்கு.. இதில் ஆண்கள் வந்து கூட்ட நெரிசலை ஏற்படுத்தக் கூடாது" என்ற தவறான எண்ணம் சில பெண் பயணிகளிடையே உருவாகியுள்ளது. இதனால், அலுவலகம் மற்றும் கூலி வேலைகளுக்குச் செல்லும் சாதாரண ஆண் பயணிகள், பேருந்துக்குள் ஏறும்போதே குற்றவாளிகளைப் போலப் பார்க்கப்படும் சூழல் ஏற்பட்டுள்ளது.

நடுவழியில் திண்டாடும் நடத்துநர்கள்

இந்தத் தவறான புரிதலால் அதிகம் பாதிக்கப்படுவது நடத்துநர்களும் ஓட்டுநர்களும்தான்.

ஆண்களுக்கு டிக்கெட் கொடுக்க நடத்துநர் செல்லும்போது, "அவங்களை எதுக்கு வண்டில ஏத்துனீங்க? முதல்ல அவங்களை இறக்கி விடுங்க" என்று சில பெண் பயணிகள் நடத்துநர்களிடம் எகிறுகின்றனர். மறுபுறம், காசு கொடுத்து டிக்கெட் வாங்கும் ஆண்கள், "நாங்க காசு கொடுத்துதான் போறோம்... எங்களை இறங்கச் சொல்ல நீங்க யாரு?" என்று திருப்பிக் கேட்கும்போது நிலைமை கைகலப்பாக மாறுகிறது.

பேருந்து நிலையங்களிலும் சிக்னல்களிலும் வண்டியை நிறுத்திவிட்டு, பயணிகளைச் சமாதானப்படுத்துவதிலேயே ஊழியர்களின் நேரம் வீணாகிறது. ஒரு சில இடங்களில் வாக்குவாதம் முற்றி பயணிகள் ஒருவரையொருவர் தாக்கிக்கொள்ளும் வீடியோக்களும் சமூக வலைதளங்களில் வெளியாகிப் பொதுமக்களிடையே அதிர்ச்சியை ஏற்படுத்தியுள்ளன.

கர்நாடகா, ஆந்திரா வரிசையில் தமிழ்நாடும்!

இத்தகைய காட்சிகள் கர்நாடகாவில் 'சக்தி' திட்டம் அமலானபோதும், அண்டை மாநிலங்களில் இலவசப் பயணம் வந்தபோதும் அரங்கேறின. ஆந்திராவின் விஜயநகரத்தில் இருக்கைக்காக ஆணும் பெண்ணும் பேருந்துக்குள் கடுமையாக மோதிக்கொண்ட சம்பவங்கள் பெரும் சலசலப்பை ஏற்படுத்தின. அந்தப் படிப்பினைகளை உணராமல், கள அளவில் முறையான அறிவிப்புப் பலகைகளோ, தெளிவுபடுத்தும் பிரச்சாரங்களோ இன்றித் தமிழ்நாட்டில் இத்திட்டம் திடீரென எக்ஸ்பிரஸ் பஸ்களுக்கும் நீட்டிக்கப்பட்டதே தற்போதைய குழப்பத்திற்குக் காரணம்.

அரசு செய்ய வேண்டிய உடனடி தீர்வு என்ன?

'இது பொதுப் பேருந்து; பெண்களுக்கு மட்டுமே கட்டண விலக்கு, அனைவருக்கும் பொதுவானது' என்பதைப் பேருந்து முகப்பிலும், படிக்கட்டுகளுக்கு அருகிலும் பெரிய எழுத்துகளில் அச்சிட்டு ஒட்ட வேண்டும். குறும்படங்கள், பேருந்து நிலைய ஒலிபெருக்கிகள் மூலம் இது பெண்களுக்கு மட்டுமேயான பிரத்யேக பேருந்து அல்ல என்ற விழிப்புணர்வைப் பரப்ப வேண்டும். தகராறுகளைக் கையாள நடத்துநர்களுக்குத் தெளிவான வழிகாட்டு நெறிமுறைகள் வழங்கப்பட வேண்டும்.

பெண்களுக்குக் கட்டணமில்லா பயணம் வழங்குவது வரவேற்கத்தக்க சமூக முன்னெடுப்பு. ஆனால், முறையான விழிப்புணர்வு இல்லாமல் அது சக பயணிகளுக்கு இடையேயான பகையாகவும், பொது அமைதியைச் சீர்குலைக்கும் களமாகவும் மாறுவதைத் தடுக்க அரசு உடனடி நடவடிக்கை எடுக்க வேண்டும்.