இந்தியா கூட்டணியில் இணையுங்கள்.. அழைத்த ராகுல்.. நோ சொன்ன தவெக விஜய்.. என்ன காரணம்?

திமுக கூட்டணியிலிருந்து விலகி முதல்வர் விஜய் தலைமையிலான கூட்டணி ஆட்சியில் பங்கெடுத்துள்ள காங்கிரஸ் கட்சிக்கு, தங்களுக்கு கிடைத்த முதல் ராஜ்யசபா சீட் வாய்ப்பை தாரை வார்த்தார் முதல்வர் விஜய். மத்திய பாஜக அரசின் நாடாளுமன்ற நடவடிக்கைகளில் தவெகவின் நிலைப்பாட்டை தெரிவிக்க வேண்டிய கட்டாயம் ஏற்படும் போது, பாஜகவை எதிர்த்துத்தான் வாக்களிக்க வேண்டும் என்கிற எழும் சூழலை தவிர்க்கவே, ராஜ்யசபா சீட்டை காங்கிரஸுக்கு கொடுத்து விட்டார் என்கிற ஒரு காரணம் தவெக தரப்பி லேயே சொல்லப்பட்டது.

இந்தியா கூட்டணி- விஜய் முடிவு

அதே பாணியை இந்தியா கூட்டணி விவகாரத்தில் விஜய் பின்பற்றுவதாகச் சொல்லப்படுகிறது. இது குறித்து நம்மிடம் பேசும் உளவு வட்டாரங்கள், '' நிதி பற்றாக்குறையில் நெருக்கடிகளை சந்தித்துக் கொண்டிருக்கும் விஜய் அரசு, அதனை சமாளிப்பதற்கான பல்வேறு வழிகளை ஆராய்ந்து வருகிறது. இந்த நிலையில் தான், மத்திய அரசிடமிருந்து கிடைக்க வேண்டிய நிதி ஒதுக்கீடுகள் தடையின்றியும் தாமதமின்றியும் கிடைத்தால், நிதி நெருக்கடியில் பெரிய சுமை குறையும். அதற்கு மத்திய அரசுடன் இணக்கமான போக்கினை கையாள வேண்டும்.

காங்கிரஸ் கட்சியை கூட்டணியில் சேர்த்துக் கொண்ட தால் மத்திய அரசுக்கு நம்மீது கோபம். ஆட்சி அமைப்பதற்காக இந்த முடிவை நீங்கள் எடுத்ததாக சொல்லி மத்திய அரசின் கோபத்தை நாம் தணித்து வருகிறோம். இருப்பினும் மத்திய அரசு முழுமையாக நமக்கு சாதகமாக வர மறுக்கிறது.

இந்தியா கூட்டணியில் இணைய காங்கிரஸ் கோரிக்கை

இப்படியிருக்கும் நிலையில், இந்தியா கூட்டணியில் இணைய காங்கிரஸ் தரப்பில் வைக்கப்பட்ட கோரிக்கையை ஏற்க வேண்டாம் என அதிகாரிகள் தரப்பில் முதல்வருக்கு சொல்லப்பட்டுள்ளது. முதல்வரின் ஆலோசகர்களும் இதே கருத்தில் உடன்பட்டதால், இந்தியா கூட்டணியில் இணைவதை பிறகு பார்த்துக்கொள்ளலாம். இப்போதைக்கு வேண்டாம் என முதல்வர் முடிவெடுத்தார் '' என்று உளவு வட்டாரங்கள் சொல்கின்றன்.

அரசியல் நோக்கர்களின் கூற்றுப்படி, தவெக தலைமை ஆரம்பக் கட்டத்திலேயே பாஜகவுக்கு எதிரான நேரடி முத்திரையை தன்மீது பதிய விரும்பவில்லை. மத்தியில் ஆட்சி பீடத்தில் இருக்கும் பா.ஜ.க. அரசை முழுமையாக எதிர்த்தால், தமிழக அரசின் நிர்வாகப் பணிகள், நிதி ஒதுக்கீடு, மத்திய திட்டங்கள் மற்றும் பல்வேறு அனுமதிகள் ஆகியவற்றில் முட்டுக்கட்டை ஏற்படும் என தவெக தலைமை அஞ்சுவதாகக் கூறப்படுகிறது.

தமிழகத்தின் பல்வேறு அரசியல் கட்சிகள் ஆரம்பத்தில் இருந்தே மத்திய அரசுடன் மோதல் போக்கை கடைப்பிடித்து பின்னர் சிரமங்களை சந்தித்துள்ள நிலையில், விஜய் அதே பாதையை பின்பற்ற விரும்பவில்லை என்பது தெளிவாகிறது. தவெகவின் டெல்லி பிரதிநிதிகள், "பாஜகவை நேரடியாக சவாலுக்கு அழைப்பது தற்போது தேவையில்லை" என்று தலைமைக்கு எச்சரிக்கை விடுத்ததாகவும் தகவல்கள் வெளியாகியுள்ளன.

- சிறப்பு நிருபர் எழில்