கொத்து கொத்தாக.. பழைய தங்க நகைகளை மாற்றும் இந்தியர்கள்.. காரணத்தை கேட்டா ஷாக் ஆகிடுவீங்க!

புதிய பணத்தைப் போட்டு நகை வாங்குவதற்குப் பதிலாக, வீட்டில் இருக்கும் பழைய தங்க நகைகளைக் கொடுத்துவிட்டுப் புதிய நகைகளை மாற்றிக்கொள்ளும் முறை மக்களிடையே பெருமளவில் அதிகரித்துள்ளது.

முன்னணி நகைக்கடைகளில் சரிந்த சேமிப்புத் தொகை

தங்கத்தின் அதீத விலை உயர்வால் இந்தியாவின் முன்னணி நகைக்கடைகளில் மக்கள் செலுத்தும் முன்பண டெபாசிட் தொகை தொடர்ந்து இரண்டாவது ஆண்டாகக் குறைந்துள்ளது.

நாட்டின் மிகப்பெரிய நகை நிறுவனமான டைட்டனின் 'தனிஷ்க்' கடைகளில், மக்கள் செலுத்திய மாதாந்திரத் திட்ட டெபாசிட் தொகை 39% சரிந்து ₹2,116 கோடியாகக் குறைந்துள்ளது. இதற்கு முந்தைய ஆண்டில் இந்தச் சரிவு 19%-ஆக மட்டுமே இருந்தது.

ரிலையன்ஸ் ரீடெய்ல் நிறுவனத்தின் நகை விற்பனைப் பிரிவில் சேர்ந்த டெபாசிட் தொகை 25% சரிந்து ₹250 கோடியாகக் குறைந்துள்ளது.

தென்னிந்தியாவில் 67 கிளைகளைக் கொண்டுள்ள முன்னணி நிறுவனமான 'ஜாய் ஆலுக்காஸ்' நிறுவனத்திலும் வாடிக்கையாளர்கள் செலுத்திய முன்பணத் தொகை 25% வீழ்ச்சியடைந்துள்ளது.

பழைய நகை மாற்றத்திற்கு எகிறிய மவுசு

மக்கள் புதிய தங்க நகைகளில் தனியாகப் பணத்தைப் போடுவதை விட, வீட்டில் சும்மா இருக்கும் பழைய நகைகளைப் பணமாக்குவதையே சிறந்த வழியாகக் கருதுகிறார்கள். இதனால் பழைய நகைகளைக் கொடுத்துப் புதிய நகை வாங்கும் எக்ஸ்சேஞ்ச் விற்பனை பல கடைகளில் 35% வரை அதிகரித்துள்ளது.

தங்கத்தின் விலை தாறுமாறாக உயர்ந்தது இந்தியர்களின் நகை வாங்கும் பழக்கத்தையே தலைகீழாக மாற்றிவிட்டது. அவர்களின் மொத்த நகை விற்பனையில், பழைய நகைகளை மாற்றியதன் பங்கு இதற்கு முன்பு 45 சதவீதமாக இருந்தது. ஆனால், கடந்த நிதியாண்டில் அது 65 சதவீதமாக உயர்ந்திருக்கிறது. வீடுகளில் முடங்கிக் கிடக்கும் பழைய தங்கம் சந்தைக்குள் வருவதால், வெளிநாடுகளில் இருந்து இந்தியா தங்கம் இறக்குமதி செய்வதும் குறையும், நாட்டின் பொருளாதாரத்திற்கும் இது நன்மை தரும் என்று தங்க நகை கடை வல்லுனர்கள் தெரிவிக்கின்றனர்.

தங்கம் விலை உயர்ந்தது ஏன்?

நகைச் சேமிப்புத் திட்டங்கள் எப்போதும் நடுத்தரக் குடும்பங்களின் முக்கிய சேமிப்புத் தேர்வாக இருந்து வந்தன. ஆனால், 2024-25 நிதியாண்டில் தங்கம் விலை சுமார் 20% உயர்ந்தது. அதைத் தொடர்ந்து, கடந்த 2025-26 நிதியாண்டில் மேலும் 56% வரை ராக்கெட் வேகத்தில் உயர்ந்தது.

உலக நாடுகளின் மத்திய வங்கிகள் அதிக அளவில் தங்கத்தை வாங்கி குவித்தது, சர்வதேச அளவில் நிலவும் போர் மற்றும் பதற்றமான சூழல்கள், மற்றும் அமெரிக்க டாலருக்கு நிகரான இந்திய ரூபாயின் மதிப்பு குறைந்தது போன்ற காரணங்களால் தங்கம் விலை தொடர்ந்து உயர்ந்து வருகிறது.

முன்பெல்லாம் கையில் இருக்கும் சேமிப்புப் பணத்தைக் கொண்டு சென்று நகைக்கடைகளில் மாதாந்திரச் சீட்டு போட்ட குடும்பங்கள், இப்போது விண்ணை முட்டும் விலை காரணமாகத் தங்கள் சேமிப்பில் இருக்கும் பழைய நகைகளை உருக்கி, புதிய நகைகளாக மாற்றிக் கொள்வதையே புத்திசாலித்தனமான வழியாகத் தேர்ந்தெடுத்து வருகின்றன.