சென்னை: தமிழ்நாட்டில் சமீபகாலமாக அரங்கேறி வரும் தொடர் வன்முறைச் சம்பவங்கள், பட்டப்பகலில் நடக்கும் பழிவாங்கும் கொலைகள் மற்றும் ரவுடிகளின் அட்டகாசங்கள் பொதுமக்கள் மத்தியில் கடுமையான அச்சத்தை உருவாக்கியுள்ளன. விஜய் தலைமையில் தமிழக வெற்றிக் கழகம் ஆட்சி அமைத்து சில மாதங்களே ஆகியுள்ள சூழலில், இந்த புதிய அரசுக்கு மிகப்பெரிய தலைவலியாக மாறியிருப்பது மாநிலத்தின் சட்டம் ஒழுங்குதான்.
எதிர்க்கட்சிகள் மட்டுமின்றி, நடுநிலையான அரசியல் நோக்கர்களும் ஓய்வுபெற்ற காவல்துறை அதிகாரிகளும் கூட தற்போதைய ஆட்சி காவல்துறையை வழிநடத்துவதில் அனுபவமின்மையைக் காட்டுகிறதோ என்ற சந்தேகத்தை வெளிப்படையாகவே எழுப்பத் தொடங்கியுள்ளனர். ஒரு மாநிலத்தில் சட்டம் ஒழுங்கு என்பது ஒரே இரவில் கெட்டுப்போய்விடுவதில்லை. ஆனால், ஆட்சிப் பொறுப்பில் இருப்பவர்கள் செய்யும் நிர்வாகத் தவறுகளும் முடிவெடுப்பதில் உள்ள தயக்கங்களுமே இத்தகைய வீழ்ச்சிக்கு வழிகோலுகின்றன. முதல்வர் விஜய் தலைமையிலான அரசு சட்டம் ஒழுங்கைக் கட்டுப்படுத்துவதில் எங்கெல்லாம் சறுக்குகிறது என்பதைப் பின்வரும் காரணங்கள் தெளிவாக விளக்குகின்றன.
தமிழ்நாடு அரசியலில் வழக்கமாக முதலமைச்சரே உள்துறை மற்றும் காவல்துறையைத் தன் நேரடிக் கட்டுப்பாட்டில் வைத்திருப்பது வழக்கம். இதற்கு முன் ஆட்சி செய்த முதல்வர்கள் பல தசாப்த கால சட்டமன்ற மற்றும் அரசு நிர்வாக அனுபவம் கொண்டவர்களாக இருந்ததால், காவல்துறையின் ரகசிய உளவுத்துறை அறிக்கைகளைதினமும் படித்து, உடனடியாக கள அதிகாரிகளைக் கட்டுப்படுத்தும் திறன் பெற்றிருந்தனர். ஆனால், முதல்வர் விஜய் அரசியல் களத்திற்குப் புதியவர். அவருக்கு அரசு இயந்திரத்தை, குறிப்பாக ஒரு லட்சத்திற்கும் அதிகமான காவலர்களைக் கொண்ட ஒரு பெரும் படையை எப்படி முடுக்கிவிடுவது என்பதில் நடைமுறை அனுபவம் குறைவாக உள்ளது. இதனால், அரசு இயந்திரம் முன்னெச்சரிக்கையாகச் செயல்படாமல், ஒரு குற்றம் நடந்து அது சமூக வலைதளங்களில் வைரலான பிறகு மட்டுமே அவசர ஆலோசனை நடத்துவது, அறிக்கை விடுவது போன்ற வெறும் ரியாக்டிவ் அரசாகவே செயல்படுகிறது. கோட்டைக்கும் களத்தில் உள்ள மாவட்ட எஸ்பி-க்களுக்கும் இடையே சரியான ஒருங்கிணைப்பு இல்லாததே குற்றவாளிகளுக்குத் தைரியத்தைக் கொடுக்கிறது. புதிய ஆட்சி பொறுப்பேற்றவுடன் காவல்துறை ஆணையர்கள், எஸ்பி-க்கள் மற்றும் காவல் நிலைய ஆய்வாளர்கள் என ஒட்டுமொத்தமாக மாநிலம் முழுவதும் மிகப்பெரிய அளவில் இடமாற்றங்கள் செய்யப்பட்டன. வழக்கமாக ஆட்சி மாறும்போது இது நடப்பதுதான் என்றாலும், அடிமட்ட அளவில் உள்ள இன்ஸ்பெக்டர்களை அவசர அவசரமாக மாற்றியது கள உளவுப்பிரிவை முற்றிலுமாக முடக்கிவிட்டது. ஒரு பகுதியில் பல ஆண்டுகளாகப் பணியாற்றி, அங்குள்ள ஏரியா நிலவரம், ஜாமீனில் வெளியே சுற்றும் ரவுடிகள், ரியல் எஸ்டேட் கட்டப்பஞ்சாயத்து செய்பவர்கள் யார் என்பதைத் துல்லியமாக அறிந்த அதிகாரிகள் திடீரென மாற்றப்பட்டனர். புதிதாக வந்த அதிகாரிகளுக்கு அந்தந்தப் பகுதியின் குற்றப் பின்னணியைப் புரிந்துகொள்ளவே பல மாதங்கள் பிடிக்கிறது. இதனால், காவல் நிலையக் கண்காணிப்பில் இருக்க வேண்டிய பழைய குற்றவாளிகள் எங்கு இருக்கிறார்கள், என்ன திட்டம் போடுகிறார்கள் என்பதைக் கண்டறிய முடியாமல் போலீசார் திணறி வருகின்றனர். தவெக அரசு ஆட்சிக்கு வந்தபோது 'மனித உரிமைகளைப் பாதுகாப்போம், அதிகார துஷ்பிரயோகம் இல்லாத ஆட்சியைத் தருவோம்' என்று உறுதி அளித்தது. ஆனால், இது களத்தில் உள்ள காவல் துறை அதிகாரிகளுக்கு ஒருவித தயக்கத்தை உருவாக்கியுள்ளது. இதற்கு முந்தைய ஆட்சிகளில் ரவுடிகள் தலைதூக்கினால் குண்டர் சட்டம் என்கவுண்டர் எச்சரிக்கைகள் மற்றும் நள்ளிரவு 'ஸ்டார்மிங் ஆபரேஷன்' மூலம் போலீசார் கடுமையான அடக்குமுறையைக் கையாண்டு ரவுடிகளை ஒடுக்குவர். ஆனால் தற்போதைய சூழலில், ஏதாவது அதிரடி நடவடிக்கை எடுத்தால் மனித உரிமை அமைப்புகளின் விமர்சனத்திற்கு ஆளாக நேரிடுமோ, அரசே நம்மைக் கைவிட்டுவிடுமோ அல்லது தற்காலிகப் பணிநீக்கம் செய்துவிடுமோ என்ற பயம் கள அதிகாரிகளிடம் நிலவுகிறது. அரசின் இந்தத் தெளிவற்ற அணுகுமுறையும் மென்மையான போக்கும் சமூக விரோதிகளுக்குப் பயமில்லாமல் போக வழிவகுத்துள்ளது. சட்டம் ஒழுங்கு சீர்குலைவுக்கு மற்றொரு முக்கிய காரணம், காவலர்களைத் தவறான பணிகளுக்குப் பயன்படுத்துவதுதான். மாநிலத்தில் புதிய அரசு அமைந்ததில் இருந்து எதிர்க்கட்சிகள் நடத்தும் தொடர் போராட்டங்கள், ஆர்ப்பாட்டங்கள் மற்றும் ஆளும் தரப்பு நடத்தும் மாநாடுகள், பொதுக்கூட்டங்களுக்குப் பாதுகாப்புப் போடவே காவல் நிலையங்களில் உள்ள பெரும்பாலான காவலர்கள் அனுப்பப்படுகிறார்கள். காவல் நிலையங்களில் ஏற்கனவே கடுமையான ஆட்கள் பற்றாக்குறை நிலவி வருகிறது. இருக்கும் சொற்ப காவலர்களும் டிராபிக் டியூட்டி, விஐபி பாதுகாப்பு, நீதிமன்றப் பணிகளுக்குச் சென்றுவிடுவதால், உள்ளூர் பகுதிகளில் இரவில் ரோந்து செல்வது முற்றிலும் குறைந்துவிட்டது. பழைய குற்றவாளிகளை நேரில் சென்று சோதனையிடும் வழக்கமான 'பீட்' முறை வெறும் காகிதக் கணக்காக மாறிவிட்டது. போலீசார் கண்காணிக்க வரமாட்டார்கள் என்ற தைரியத்தில், ரவுடிகள் பட்டப்பகலில் தைரியமாக ஆயுதங்களைத் தூக்குகின்றனர். இன்றைய குற்றங்கள் பழைய காலத்தைப் போல வெறும் நிலத் தகராறுக்காக மட்டும் நடப்பதில்லை. கஞ்சா மற்றும் சிந்தெடிக் போதைப்பொருட்களான மெத்தபெட்டமைன், வலி நிவாரணி மாத்திரைகள் ஆகியவற்றின் புழக்கம் தமிழ்நாட்டின் சிறிய நகரங்கள் வரை மிக வேகமாகப் பரவியுள்ளது. பழைய ரவுடிகள் தாங்கள் நேரடியாகக் களத்தில் இறங்காமல், போதைக்கு அடிமையான பள்ளி, கல்லூரி இளைஞர்களைப் பயன்படுத்தி வாடகைக்குக் கொலை செய்ய வைக்கின்றனர். போதையில் நடக்கும் குற்றங்களை உள்ளூர் போலீசாரால் முன்கூட்டியே கணிக்க முடிவதில்லை. தெருவில் கஞ்சா விற்பவர்களைப் பிடிப்பதோடு நிறுத்திக்கொள்ளும் காவல்துறை, இதற்குப் பின்னணியில் இருந்து போதைப்பொருட்களை மாநிலத்திற்குள் கடத்தி வரும் பெரும் நெட்வொர்க்குகளை உடைக்கத் தவறிவிட்டது. குற்றங்கள் நடந்த பிறகு, தனிப்படை அமைத்து 48 மணி நேரத்தில் குற்றவாளிகளைக் கைது செய்வதை மட்டுமே பெரிய சாதனையாகக் கருத முடியாது. குற்றம் நடப்பதற்கு முன்பே அதைத் தடுப்பதுதான் திறமையான அரசுக்கு அடையாளம். முதல்வர் விஜய் வெறும் சினிமா பாணி எச்சரிக்கைகளோடு நின்றுவிடாமல், கள எதார்த்தத்தை உணர்ந்து உடனடியாகச் செயல்பட வேண்டும்: உள்ளூர் காவல் நிலைய ஆய்வாளர்களுக்கு அரசியல் தலையீடின்றி செயல்படும் அதிகாரத்தையும் தேவையான கால அவகாசத்தையும் வழங்க வேண்டும். பழைய குற்றவாளிகளைக் கண்காணிக்கப் பழைய பதிவேடுகளுக்குப் பதிலாக டிஜிட்டல் மற்றும் பயோமெட்ரிக் முறைகளைக் கட்டாயமாக்க வேண்டும். காவலர்களைத் தேவையில்லாத விஐபி பாதுகாப்புப் பணிகளில் இருந்து விடுவித்து, தெருக்களில் ரோந்து செல்வதையும் மக்கள் பாதுகாப்பையும் உறுதி செய்ய வேண்டும். இந்தக் குறைபாடுகளை முதல்வர் விரைந்து சரிசெய்யாவிட்டால், சட்டம் ஒழுங்கு விவகாரம் தவெக அரசின் நிர்வாகத் திறமை மீது நிரந்தரக் கறையாகப் படிந்துவிடும்.1. உள்துறை நிர்வாகத்தில் அனுபவமின்மை
2. தொடர் இடமாற்றங்களும் உடைந்துபோன உள்ளூர் உளவுப்பிரிவும்
3. தயக்கமும் குழப்பமான உத்தரவுகளும்
4. எல்லை மீறும் விஐபி பாதுகாப்பு - முடங்கிய ரோந்துப் பணிகள்
5. கட்டுக்கடங்காத போதைப்பொருள் வலைப்பின்னல்
முதலமைச்சர் செய்ய வேண்டிய உடனடி மாற்றங்கள் என்ன?