சென்னை: கணினி விசைப்பலகைகளில் (Keyboards) ஏன் எழுத்துக்கள் வரிசையாக (A, B, C, D...) இருக்கக் கூடாது? என்பது உங்களில் எத்தனை பேருக்கு தெரியும். அகரவரிசைப்படி கீபோர்டில் எழுத்துகள் இருந்தால் என்ன தவறு என்பதை தெரிந்து கொல்வோம்.
நாம் தினமும் பயன்படுத்தும் கம்ப்யூட்டர் விசைப்பலகைகளில் ஏன் எழுத்துக்கள் 'A, B, C' என்று நேர் வரிசையில் இல்லாமல், 'Q, W, E, R, T, Y' என கண்டபடி கலைந்து கிடக்கின்றன? என்பதை கண்டிப்பாக யாராவது நமக்குள்ளேயே கேட்டிருப்போம்.
இதற்கான விடை நாம் நினைப்பது போல சாஃப்ட்வேர் உலகத்தில் இல்லை; மாறாக, 150 ஆண்டுகள் பழமையான டைப்ரைட்டர் (Typewriter) வரலாற்றில் ஒளிந்திருக்கிறது! இன்று உலகளவில் அதிகம் பயன்படுத்தப்படும் QWERTY கீ-போர்ட் வடிவமைப்பு, 1870-களில் கிறிஸ்டோபர் லாதம் ஷோல்ஸ் (Christopher Latham Sholes) என்பவரால் உருவாக்கப்பட்டது. டைப்ரைட்டர்களின் ஆரம்பக் காலத்தில், விசைகள் அனைத்தும் அகரவரிசையில்தான் (Alphabetical order) அமைக்கப்பட்டிருந்தன. ஆனால், அதில் ஒரு பெரிய சிக்கல் எழுந்தது. வேக வேகமாக டைப் செய்யும் போது, அடுத்தடுத்து வரும் எழுத்துக்களின் இயந்திரக் கைகள் (Mechanical arms) ஒன்றுடன் ஒன்று மோதி, சிக்கிக் கொள்ளத் (Jamming) தொடங்கின. இயந்திர கைகள் (டைப் ரைட்டரில் எழுத்துகளை டைப் செய்யும் சிறிய உலோக கரங்கள்- type bars) சிக்கிக் கொள்வதைத் தடுக்க, கிறிஸ்டோபர் ஷோல்ஸ், அவரது சக ஊழியர் கார்லோஸ் கிளிடன் மற்றும் கல்வியாளர் அமோஸ் டென்ஸ்மோர் ஆகியோருடன் கைகோர்த்தார். அவர்கள் ஒரு தந்திரத்தைக் கையாண்டனர். ஆங்கிலத்தில் அடிக்கடி பயன்படுத்தப்படும் எழுத்துக்களை (உதாரணமாக T, H, E போன்றவை) விசைப்பலகையின் வெவ்வேறு திசைகளில் பிரித்து வைத்தனர். இதனால் ஒரு எழுத்தை தட்டும்போது, அதற்கு அடுத்த எழுத்துக்கான இயந்திரக் கை தூரத்திலிருந்து நகர்வதால், அவற்றுக்கிடையேயான மோதல் முற்றிலும் தவிர்க்கப்பட்டது. இப்படி உருவானதுதான் 'QWERTY' வடிவமைப்பு. இது 1878-ல் காப்புரிமையும் பெற்றது. ரெமிங்டன் நம்பர் 2 (Remington No. 2) என்ற வணிகரீதியான முதல் வெற்றிகரமான டைப்ரைட்டரில் இந்த முறை பயன்படுத்தப்பட்டதால், இதுவே உலகளாவிய தரநிலையாக மாறியது. கம்ப்யூட்டர்கள் வந்த பிறகு, இயந்திரக் கைகள் மோதும் சிக்கல் தீர்ந்துவிட்டதே, அப்புறம் ஏன் இந்த பழைய முறையைத் தொடர வேண்டும்? காரணம் ஒன்றுதான்-பழக்கவழக்கம்! மக்கள் ஏற்கனவே QWERTY முறையில் டைப் செய்யப் பழகிவிட்டதால், கம்ப்யூட்டர் கீ-போர்டுகளிலும் அதே முறையே நீடித்தது. காலப்போக்கில், இதனுடன் ஃபங்க்ஷன் கீகள், அம்புக்குறிகள் மற்றும் எண்களுக்கான விசைகள் மட்டுமே கூடுதலாக இணைக்கப்பட்டன. இதற்கு மாற்றாக, விரல்களின் சோர்வைக் குறைத்து, டைப்பிங் வேகத்தைக் கூட்டும் நோக்கில் டுவோராக் (Dvorak Simplified Keyboard) மற்றும் கோல்மேக் (Colemak) போன்ற பல புதிய வடிவமைப்புகள் அறிமுகப்படுத்தப்பட்ட போதிலும், QWERTY-யின் ஆதிக்கத்தை யாராலும் அசைக்க முடியவில்லை. சுருக்கமாகச் சொன்னால், அன்றைய மெக்கானிக்கல் சிக்கலைத் தீர்க்கப் பிறந்த QWERTY, இன்று நமது விரல்களின் பிரிக்க முடியாத பழக்கமாக மாறி சிம்மாசனம் போட்டு அமர்ந்திருக்கிறது! இந்த கீபோர்டில் A-Z, 0-9, ஸ்பெஷல் கேரக்டர்கள் என சொல்லப்படும் @,$,% உள்ளிட்டவை இருக்கும். அது போல் எஃப் 1 முதல் எஃப் 12 வரை பட்டன்கள் இருக்கும். மேலும் Ctrl, Alt, Esc உள்ளிட்டவைகளும் இருக்கும். அது போல் Home, End, Up, Down, Right, Left, Delete உள்ளிட்டவை இருக்கும்.டைப்ரைட்டர்களின் காலம் முடிந்த பிறகு இது ஏன் மாறவில்லை?