சென்னை: மத்திய அரசில் நடைபெற்றுள்ள மிக முக்கியமான அமைச்சரவை மாற்றம், இந்திய அரசியல் தளத்தில் மட்டுமின்றி, தமிழ்நாட்டின் கல்வித்துறை சார்ந்த நிதி ஒதுக்கீட்டிலும் பெரும் எதிர்பார்ப்பை ஏற்படுத்தியுள்ளது.
காக்கரோச் ஜனதா கட்சி நடத்திய தீவிர போராட்டங்கள் மற்றும் நாடு தழுவிய மாணவர் கொந்தளிப்பைத் தொடர்ந்து, மத்திய கல்வி அமைச்சர் பதவியிலிருந்து தர்மேந்திர பிரதான் தனது ராஜினாமா கடிதத்தை சமர்ப்பித்துள்ளார். இதனைத் தொடர்ந்து, மத்திய அமைச்சர் பிரஹலாத் ஜோஷிக்கு கல்வித்துறையின் கூடுதல் பொறுப்பு வழங்கப்பட்டுள்ளது.
இந்த அரசியல் திருப்பம், ஒருங்கிணைந்த பள்ளி கல்வித் திட்டமான 'சமக்ர சிக்ஷா அபியான்' நிதிக்காக நீண்டகாலமாகக் காத்திருக்கும் தமிழ்நாட்டிற்கு ஒரு புதிய பேச்சுவார்த்தைக்கான கதவைத் திறந்துவிட்டுள்ளது. தற்போதைய தமிழக முதல்வர் விஜய் தலைமையிலான தமிழக வெற்றி கழக அரசு, மத்திய புதிய அமைச்சரிடம் மாநில உரிமைகளுக்காகப் பேச்சுவார்த்தை நடத்தி நிலுவை நிதியைப் பெற இது ஒரு மிகச் சிறந்த ராஜதந்திர வாய்ப்பாகப் பார்க்கப்படுகிறது. கடந்த சில ஆண்டுகளாகவே மத்திய அரசுக்கும் தமிழ்நாட்டிற்கும் இடையே நிலவி வந்த மிக முக்கிய மோதல் போக்காக 'சமக்ர சிக்ஷா அபியான்' நிதி விவகாரம் இருந்து வந்தது. மத்திய அரசு கொண்டு வந்த தேசிய கல்விக் கொள்கை 2020 மற்றும் அதில் உள்ள மும்மொழிக் கொள்கையைத் தமிழ்நாடு அரசு கடுமையாக எதிர்த்து வருகிறது. இருமொழிக் கொள்கையே (தமிழ் மற்றும் ஆங்கிலம்) மாநிலத்தின் முதன்மை அடையாளம் என்றும், மும்மொழிக் கொள்கை வழியாக இந்தியைத் திணிக்க முயல்வதாகத் தமிழ்நாடு தொடர்ந்து குற்றம் சாட்டி வந்தது. ஆனால், முன்னாள் கல்வி அமைச்சர் தர்மேந்திர பிரதான், தேசிய கல்விக் கொள்கையையும், PM-SHRI பள்ளி ஒப்பந்தத்தையும் ஏற்றுக் கொண்டால் மட்டுமே சமக்ர சிக்ஷா திட்டத்தின் கீழ் ஒதுக்கப்பட வேண்டிய ரூ. 2,000 கோடிக்கும் அதிகமான நிதியை விடுவிக்க முடியும் என திட்டவட்டமாக மறுத்து வந்தார். முந்தைய ஸ்டாலின் தலைமையிலான திமுக ஆட்சிக் காலத்திலும், அதனைத் தொடர்ந்து அமைந்துள்ள தற்போதைய தவெக ஆட்சிக் காலத்திலும் இந்த நிதிப் பிரச்சனை தீர்க்கப்படாமல் முடங்கிக் கிடந்தது. இதனால் அரசுப் பள்ளி ஆசிரியர்களின் சம்பளம், உள்கட்டமைப்பு மேம்பாடு மற்றும் மாணவர்களுக்கான நலத்திட்டங்கள் பெருமளவில் பாதிக்கப்பட்டடன. அமைச்சர் தர்மேந்திர பிரதானின் விலகல் மற்றும் பிரஹலாத் ஜோஷியின் வருகை, இந்த முட்டுக்கட்டையை உடைப்பதற்கான சூழலை உருவாக்கியுள்ளது. புதிய கல்வி அமைச்சராகப் பொறுப்பேற்றுள்ள பிரஹலாத் ஜோஷியிடம் தமிழ்நாடு அரசு மீண்டும் வலுவான அழுத்தம் கொடுக்க முடியும். முதல்வர் விஜய், தமிழ்நாட்டின் இருமொழிக் கொள்கை மற்றும் மாநிலக் கல்வி உரிமைகளில் எந்தவித சமாதானமும் செய்யாமல், அதேவேளையில் மாநிலத்திற்கு வர வேண்டிய சட்டப்பூர்வமான கல்வி நிதியைப் பெறுவதற்கு நேரடியாக டெல்லியுடன் பேச்சுவார்த்தை நடத்த வாய்ப்புகள் பிரகாசமாகியுள்ளன. மத்திய அரசின் நிபந்தனைகளான PM-SHRI மற்றும் தேசிய கல்விக் கொள்கை விவகாரங்களில், தமிழ்நாட்டின் பிரத்யேக சூழலை விளக்கி, மாநில கல்வி நிர்வாகத்தின் தன்னாட்சியைப் பாதுகாக்கும் வகையில் மாற்று உடன்பாடுகளை எட்டுவது முதல்வர் விஜயின் பணியாக இருக்கும் எனக் கருதப்படுகிறது. தமிழக அரசின் கல்வித்துறை அதிகாரிகள் மற்றும் முதல்வர் விஜய், புதிய மத்திய கல்வி அமைச்சர் பிரஹலாத் ஜோஷியை நேரில் சந்தித்து நிலுவை நிதியை உடனடியாக விடுவிக்கக் கோரி அதிகாரப்பூர்வ மனு அளிக்க வாய்ப்புள்ளது. மும்மொழிக் கொள்கை எதிர்ப்பில் உறுதியாக நின்று கொண்டே, கூட்டாட்சி தத்துவத்தின் அடிப்படையில் பள்ளி மாணவர்களின் நலன் கருதி நிதியைப் பெறுவது தவெக அரசின் முக்கிய அரசியல் சோதனையாக அமையும். மத்திய அரசுடனான உறவை சுமூகமாக்கி, முடக்கப்பட்ட ஆயிரக்கணக்கான கோடி ரூபாய் நிதியை மாநிலத்திற்கு கொண்டு வருவதன் மூலம், நிர்வாக ரீதியாகத் தனது ஆளுமையை நிரூபிக்க முதல்வர் விஜய்க்கு இது ஒரு முக்கிய வாய்ப்பாகும். மத்திய அமைச்சரவையில் ஏற்பட்டுள்ள இந்த மாற்றம், முடக்கப்பட்ட தமிழ்நாடு பள்ளி கல்வித்துறை நிதியை மீட்பதற்கான புதிய நம்பிக்கையை ஏற்படுத்தியுள்ளது.தர்மேந்திர பிரதான் முட்டுக்கட்டை
முதல்வர் விஜய்க்கு கிடைத்துள்ள புதிய வாய்ப்பு
அடுத்தகட்ட நகர்வுகள் என்னவாக இருக்கும்?