125 நாள் வேலை திட்டம்: தமிழகத்திற்கு ரூ.7,585 கோடி ஒதுக்கீடு - மத்திய அரசு அதிரடி!

* உத்தரப்பிரதேசம்: ரூ.9,721.48 கோடி (அதிகபட்ச ஒதுக்கீடு)
* மேற்கு வங்காளம்: ரூ.8,508 கோடி
* ஆந்திரப் பிரதேசம்: ரூ.7,707.21 கோடி
* தமிழ்நாடு: ரூ.7,585.49 கோடி
* ராஜஸ்தான்: ரூ.7,581.87 கோடி
* பீகார்: ரூ.6,715.83 கோடி

மாநிலங்களுக்கான மொத்த ஒதுக்கீடு ரூ.92,550.17 கோடியாகவும், யூனியன் பிரதேசங்களுக்கு ரூ.1,291.52 கோடியாகவும் நிர்ணயிக்கப்பட்டுள்ளது. இது தவிர, நிர்வாகச் செலவுகள் மற்றும் சமூகத் தணிக்கைக்காக ரூ.1,850.62 கோடி ஒதுக்கப்பட்டுள்ளது. மாநிலங்களின் கட்டாயப் பங்களிப்பையும் சேர்த்தால், இந்தத் திட்டத்தின் மொத்த ஆண்டுச் செலவு சுமார் ரூ.1.51 லட்சம் கோடியாக இருக்கும் என்று கணக்கிடப்பட்டுள்ளது.

100 நாளில் இருந்து 125 நாட்களாக உயர்வு

காங்கிரஸ் ஆட்சிக் காலத்தில் கொண்டு வரப்பட்ட மகாத்மா காந்தி தேசிய ஊரக வேலை உறுதித் திட்டம் (100 நாள் வேலைத் திட்டம்), கடந்த ஆண்டு பா.ஜனதா அரசால் மாற்றியமைக்கப்பட்டது. 'விக்சித் பாரத் வேலை வாய்ப்பு மற்றும் வாழ்வாதார உத்தரவாத திட்டம்' (VP-GRAM-G) என்ற பெயரில் புதிய சட்டமாகக் கொண்டு வரப்பட்ட இத்திட்டத்தில், வேலை நாட்களின் எண்ணிக்கை 100-லிருந்து 125 நாட்களாக உயர்த்தப்பட்டது.

தடையின்றித் தொடரும் பணிகள்

இது தொடர்பாக அனைத்து மாநில ஊரக வளர்ச்சித் துறை மந்திரிகளுடன் ஆன்லைன் வாயிலாக ஆலோசனை நடத்திய மந்திரி சிவராஜ் சிங் சவுகான் கூறுகையில், "புதிய திட்டத்திற்கான விதிகள் இன்னும் இறுதி வடிவம் பெறவில்லை. இருப்பினும், ஜூன் 30-ம் தேதிக்குப் பிறகும் கிராமப்புறப் பணிகள் எவ்விதத் தடையுமின்றித் தொடர வேண்டும் என்பதற்காகவே இந்த இடைக்கால நிதி ஒதுக்கப்பட்டுள்ளது. புதிய திட்டத்தில் வேலை கிடைப்பதில் ஒரு நாள் கூட இடைவெளி இருக்காது. வறட்சி போன்ற அவசர காலங்களில் கூடுதல் வேலை வழங்கும் பழைய நடைமுறைகளும் இதிலும் தொடரும்" என்றார்.

மேற்கு வங்கத்தின் நிலைப்பாடு

மத்திய அரசுடன் நீண்ட நாட்களாக நிதி விவகாரத்தில் மோதல் போக்கைக் கடைப்பிடித்து வந்த மேற்கு வங்காளம், தற்போது அங்கு அமைந்துள்ள புதிய அரசு (பா.ஜனதா) மத்திய அரசின் அனைத்து நிபந்தனைகளுக்கும் இணங்கத் தயாராக இருப்பதாக எழுத்துப்பூர்வமாகத் தெரிவித்துள்ளது. இதன் காரணமாக அந்த மாநிலத்திற்கும் நிதி விடுவிக்கப்பட்டுள்ளது குறிப்பிடத்தக்கது.