கண் முன் தெரிந்த தோல்வி.. மொத்த டீமையும் தூக்கிய மோடி.. இப்படியே போன சோளி முடிஞ்சிடும்!

இன்ஸ்டாகிராம் ரீல்ஸ் மற்றும் சமூக வலைத்தளங்கள் வழியாக அரசுக்கு எதிராக உருவான பெரும் கொந்தளிப்பு, பிரதமர் நரேந்திர மோடியின் பிம்பத்திற்கும் கட்சிக்கும் ஏற்படுத்திய சவாலை உணர்ந்தே, பாஜக தலைமை தற்போது தேசிய அளவில் மிகப்பெரிய நிர்வாக மாற்றங்களை மேற்கொண்டுள்ளதாக அரசியல் வட்டாரங்களில் பேசப்படுகிறது.

டிஜிட்டல் களத்தில் உருவான புயல்

நீட் விவகாரத்தை முன்னிறுத்தித் தொடங்கிய மாணவர்கள் போராட்டத்தில், சமூக ஊடகங்கள் மிக முக்கிய ஆயுதமாக மாறின. டெல்லி வீதிகளில் மாணவர்கள் மீது நடத்தப்பட்ட நடவடிக்கைகள் மற்றும் அவர்களின் கோரிக்கைகள் குறித்த குறும்படங்களும் ரீல்ஸ்களும் இன்ஸ்டாகிராம் மற்றும் எக்ஸ் தளங்களில் மில்லியன்கணக்கான பார்வைகளைக் கடந்து நாடு முழுவதும் வைரலாகின.

எப்போதும் சமூக வலைத்தள விவாதங்களை தங்கள் கட்டுப்பாட்டில் வைத்திருக்கும் பாஜகவின் டிஜிட்டல் டீமிற்கு, இந்த இளம் தலைமுறையின் தாக்கம் பெரும் சவாலாக அமைந்தது. இளைஞர்களின் தன்னிச்சையான கோபமும், அரசுக்கு எதிரான ஆக்கப்பூர்வமான டிஜிட்டல் ட்ரோல்களும் பொதுவெளியில் பெரும் விவாதப் பொருளாக மாறின. இது அரசு மற்றும் கட்சியின் பிம்பத்திற்குப் பின்னடைவாகக் கருதப்பட்ட நிலையில், அமைச்சர் தர்மேந்திர பிரதான் தனது பதவியை ராஜினாமா செய்யும் அளவுக்கு அழுத்தம் தீவிரமடைந்தது.

தலைமை மாற்றம்

இளைஞர்களின் மனநிலையிலும் டிஜிட்டல் களத்திலும் ஏற்பட்ட இந்த மாற்றங்களை உணர்ந்த கட்சி மேலிடம், இனி பழைய பாணி அணுகுமுறைகள் எடுபடாது என்ற முடிவுக்கு வந்தது. குறிப்பாக, அடிமட்ட அளவிலும் இளைஞர்கள் மத்தியிலும் ஏற்பட்ட சலசலப்பிற்குப் பதிலளிக்கும் வகையிலேயே, 46 வயதான நிதின் நபீன் தலைமையில் முற்றிலும் புதிய நிர்வாகிகள் பட்டியல் உருவாக்கப்பட்டுள்ளது.

நீண்ட காலமாக டிஜிட்டல் பிரிவை வழிநடத்தி வந்த அமித் மால்வியா நீக்கப்பட்டு, சத்தீஸ்கரைச் சேர்ந்த தீபக் மஸ்கேவுக்குப் பொறுப்பு வழங்கப்பட்டதன் பின்னணியிலும் இதுவே முதன்மைக் காரணமாகப் பார்க்கப்படுகிறது. அண்மைக்கால தேர்தல் களங்களில் எதிர்க்கட்சிகள் சமூக வலைத்தளங்களில் முன்னெடுத்த தீவிரமான மக்கள் நலப் பிரச்சாரங்களுக்கு இணையான தாக்கத்தை பாஜக ஐடி விங் ஏற்படுத்தத் தவறியதாகக் கட்சிக்குள் அதிருப்தி நிலவியது.

முக்கியமாக நீட் எதிர்ப்பு ஜென் ஜி போராட்டத்தில் பாஜக படுதோல்வி அடைந்தது. பாஜக ஆன்லைன் டீம் பெரிதாக சோபிக்கவில்லை. பாஜகவின் வளர்ச்சிக்கு காரணமான இணையம் அதே பாஜகவின் வீழ்ச்சிக்கும் டெல்லியில் காரணமாக அமைந்தது. குறிப்பாக, வெறும் ஆக்ரோஷமான எதிர்வினைகளை மட்டுமே நம்பியிராமல், அடிமட்டப் பிரச்சினைகளை மையமாகக் கொண்டு டிஜிட்டல் உத்திகளை மாற்றியமைக்க வேண்டும் என்ற கோரிக்கை தீவிரமடைந்தது. முக்கியமாக இந்த போராட்டம் மோடி கண் முன்னே தோல்வியை காட்டியது. இந்த சூழலில், பாஜக தலைமை இந்த அதிரடி முடிவை எடுத்துள்ளது

ஆக்ரோஷமான பழைய பாணி டிஜிட்டல் பிரச்சாரங்களைக் கடந்து, புதிய தலைமுறையின் எதிர்பார்ப்புகளுக்கு ஏற்ப நவீன அணுகுமுறையைக் கையாள புதிய அணிக்கு உத்தரவிடப்பட்டுள்ளது.

2027 தேர்தல்களுக்கான எச்சரிக்கை மணி

வரவிருக்கும் 2027 சட்டமன்றத் தேர்தல்களில் இளம் வாக்காளர்களின் பங்கு மிக முக்கியமானதாக இருக்கும் சூழலில், டெல்லி போராட்டமும் அதன் டிஜிட்டல் தாக்கமும் பாஜக தலைமைக்கு ஒரு நேரடி எச்சரிக்கை மணியாகவே அமைந்துள்ளது.

ஸ்மிருதி இரானி, ராம் மாதவ் போன்ற அனுபவம் வாய்ந்த நிர்வாகிகளை மீண்டும் முன்னிறுத்துவதும், அதே வேளையில் இளைய தலைமுறைக்கு ஏற்ப அமைப்பை மறுசீரமைப்பதும் பாஜக எடுத்துள்ள தற்காப்பு மற்றும் தாக்குதல் வியூகத்தின் ஒரு பகுதியாகப் பார்க்கப்படுகிறது. இன்ஸ்டாகிராம் மற்றும் இணையம் வழியே வெளிப்பட்ட இளைஞர்களின் அதிருப்தியைச் சரிசெய்து, இழந்த பிம்பத்தை மீட்டெடுப்பதே இந்த அதிரடி மாற்றங்களின் பிரதான நோக்கமாக அமைந்திருக்கிறது.