புதுடெல்லி: ஜார்க்கண்ட் மாநிலம், ராஞ்சியைச் சேர்ந்த சிபிஎஸ்இ பிளஸ் 2 மாணவியான அவ்னி கெஜ்ரிவால், விடைத்தாள் மறுமதிப்பீட்டிற்குப் பிறகு 500-க்கு 500 முழு மதிப்பெண்களையும் பெற்று அசத்தியுள்ளார். இதன் மூலம் அவர் அகில இந்திய அளவில் முதலிடத்தைப் பிடித்திருக்கலாம் என எதிர்பார்க்கப்படுகிறது.
கடந்த மே 13 அன்று சிபிஎஸ்இ பிளஸ் 2 தேர்வுகள் வெளியானபோது, அவ்னி 95.2 சதவீத மதிப்பெண்கள் பெற்றிருந்தார். ஆனால், சில பாடங்களில் தனது உழைப்பிற்கு ஏற்ற மதிப்பெண்கள் கிடைக்கவில்லை என்று அவர் நம்பினார். இதனால், உடனடியாக விடைத்தாள்களை மறுமதிப்பீடு செய்ய விண்ணப்பித்தார்.
"மறுமதிப்பீட்டிற்கு முன்பு நான் 95.2% மதிப்பெண்கள் எடுத்திருந்தேன். எனக்கு ஆங்கிலத்தில் 81 மதிப்பெண்களும், வணிகவியலில் (Business Studies) 95 மதிப்பெண்களும் கிடைத்திருந்தன. பள்ளியில் நான் எப்போதும் ஆங்கிலத்தில் நன்றாகப் படிப்பேன் என்பதால், இந்த மதிப்பெண்களை நிச்சயம் மறுபரிசீலனை செய்ய வேண்டும் என்பதில் நாங்கள் உறுதியாக இருந்தோம்," என்கிறார் அவ்னி. அவர் எதிர்பார்த்தபடியே, மறுமதிப்பீட்டு முடிவுகள் வெளியானபோது, அவர் தேர்வு எழுதிய ஐந்து பாடங்களிலுமே 100-க்கு 100 மதிப்பெண்கள் பெற்று, மொத்தமாக 500-க்கு 500 என்ற வரலாற்றுச் சாதனையைப் படைத்துள்ளார். "என் குடும்பத்தினர் முதலில் எடுத்த மதிப்பெண்களைப் பார்த்து திருப்தியடைந்தனர், ஆனால் எனக்கு அதில் உடன்பாடில்லை. சிபிஎஸ்இ இணையதளத்தில் மறுமதிப்பீட்டிற்கான பக்கம் எப்போது திறக்கும் என்று காத்திருந்து விண்ணப்பித்தேன். இப்போது 500-க்கு 500 மதிப்பெண்கள் கிடைத்துள்ளது. இந்த முடிவு எனக்கு எல்லையற்ற மகிழ்ச்சியைத் தந்துள்ளது," என நெகிழ்ச்சியோடு கூறுகிறார் அவ்னி. ராஞ்சி டிபிஎஸ் (DPS Ranchi) பள்ளி மாணவியான அவ்னி, தினமும் இத்தனை மணி நேரம் படிக்க வேண்டும் என்ற கணக்கையெல்லாம் நம்புவதில்லை. அதற்குப் பதிலாக, அன்றைய நாளுக்கான இலக்குகளை முடிப்பதில்தான் கவனம் செலுத்துவாராம். "ஒரு நாளைக்கு இரண்டு அல்லது மூன்று சாப்டர்களைப் படித்து முடிக்க வேண்டும் என்று இலக்கு வைத்தால், அதை நிச்சயம் முடித்துவிடுவேன். அதற்கு எவ்வளவு மணி நேரம் ஆகிறது என்பது முக்கியமல்ல" என்கிறார் இந்த இளம் சாதனையாளர். மேலும், மாணவர்கள் சமூக ஊடகங்களை ஒரு குறிப்பிட்ட எல்லைக்குள், கட்டுப்பாட்டுடன் பயன்படுத்த வேண்டும் என்றும், அது தங்களின் படிப்பைப் பாதிக்காதவாறு பார்த்துக் கொள்ள வேண்டும் என்றும் அவர் ஆலோசனைக் கூறுகிறார். எதிர்காலக் கனவு குறித்துப் பேசிய அவ்னி, உயர்கல்வியைத் தொடர்ந்து சொந்தமாக ஒரு தொழிலைத் தொடங்க விரும்புவதாகத் தெரிவித்தார். "எதிர்காலத்தில் ஒரு சொந்தத் தொழிலை உருவாக்க வேண்டும் என்பதே என் ஆசை. அதற்கேற்பவே எனது மேல்படிப்பை திட்டமிட உள்ளேன்," என்றார். அவ்னியின் இந்த அசாத்திய சாதனையைக் கொண்டாடும் டிபிஎஸ் ராஞ்சி பள்ளியின் முதல்வர் டாக்டர் ஜெயா சௌஹான் கூறுகையில், "அவ்னியின் இந்த அபார சாதனை அவரது மன உறுதி, அர்ப்பணிப்பு மற்றும் தொடர் முயற்சிக்குக் கிடைத்த வெற்றி. சரியான வழிகாட்டுதலும், விடாமுயற்சியும் இருந்தால் எதையும் சாதிக்கலாம் என்பதற்கு அவர் ஒரு சிறந்த உதாரணம். அவரது இந்த வெற்றி எங்கள் பள்ளிக்குப் பெருமை சேர்த்ததோடு, பல மாணவர்களுக்கும் ஒரு தூண்டுகோலாக அமைந்துள்ளது. அவரை எண்ணி நாங்கள் பெருமைப்படுகிறோம்" என்று வாழ்த்தியுள்ளார். பிளஸ் 2 மறுமதிப்பீட்டுக்காக விண்ணப்பித்த மாணவர்களுக்கு மறுமதிப்பீடு முடிவுகள் கிடைப்பதில் தாமதம் ஏற்பட்டது. இதையடுத்து அரசியல் கட்சியினர் பலர் கண்டனங்களை தெரிவித்தனர். பிளஸ் 2 தேர்வின் மறுமதிப்பீட்டு மதிப்பெண்களை பெற மாணவர்கள் கலக்கத்துடன் காத்திருந்தனர். இந்த நிலையில் கடந்த 2 தினங்களுக்கு முன்பு மறுமதிப்பீட்டு முடிவுகள் வெளியானது. 85 சதவீத மாணவர்களின் முடிவுகள் வெளியானதாக சொல்லப்பட்டது.