டெல்லி முழுதும் பேரிகார்டுகளை உடனே அகற்றணும் .. மத்திய அரசுக்கு உச்சநீதிமன்றம் போட்ட அதிரடி உத்தரவு

குறிப்பாக டெல்லிக்குள் மெயில், எக்ஸ்பிரஸ் ரயில் வர தடை விதிக்கப்பட்டது. 57 மெட்ரோ ரயில் நிலையங்களை மூடவும், ஹோட்டல்கள், விடுதிகளில் புதிய புக்கிங் எடுக்க கூடாது, இணையதள சேவை என்று பல்வேறு அதிரடி நடவடிக்கைகளை மேற்கொண்டது.

இந்த கட்டுப்பாடுகளை எதிர்த்து மார்க்சிஸ்ட் கம்யூனிஸ்ட் கட்சியின் பொதுச்செயலாளர் பேபி உச்சநீதிமன்றத்தில் மனுத்தாக்கல் செய்தார். இந்த மனுவை தலைமை நீதிபதி சூர்யகாந்த் அமர்வு நேற்று முன்தினம் விசாரித்தது.

அப்போது நீதிமன்றம், ''ஈயை கொல்ல பெரிய சுத்தியலை பயன்படுத்த முடியாது. இளைஞர்கள், முதியவர்கள் என அனைவரும் ரயில்களில் பயணம் செய்கிறார்கள். பயணிகளுக்கு அடிப்படை வசதிகளை பெறுவதற்கான உரிமை உள்ளது. இதனால் மூடப்பட்ட மெட்ரோ நிலையங்களின் எண்ணிக்கையை குறைக்க வேண்டும். கட்டுப்பாட்டிற்கும் முழுமையான முடக்கத்திற்கும் வித்தியாசம் உள்ளது.

அதேவேளையில் கட்டுப்பாடுகள் விதிக்க காவல்துறைக்கு முழு அதிகாரம் நிச்சயமாக உண்டு. அதில் சந்தேகம் இல்லை. இருப்பினும் அதற்காக எல்லாவற்றையும் முடக்கிவிட்டு மக்களைப் போக்குவரத்து வசதி ஏதுமின்றி தவிக்கவிட முடியாது. இதனால் மக்கள் பாதிக்காத வகையில் கட்டுப்பாடுகளை விதிக்க வேண்டும். தற்போதைய கடடுப்பாடுகளை தளர்த்த வேண்டும்'' என உத்தரவிட்டது.

இதற்கு மத்திய அரசின் சொலிசிட்டர் ஜெனரல் துஷார் மேத்தா, ''இதுபற்றி அரசுடன் கலந்தாலோசித்து நிலைமைக்கு ஏற்ப நடவடிக்கை எடுக்கப்படும்'' என்று வாக்குறுதி அளித்தார். ஆனால் நேற்றைய தினம் டெல்லியில் மெயில், எக்ஸ்பிரஸ், பயணிகள் ரயில் என்று மொத்தம் 245 ரயில்கள் ரத்து செய்யப்பட்டன. 47 மெட்ரோ ரயில் நிலையங்கள் மூடப்பட்டன. பல சாலைகளில் போக்குவரத்து தடை செய்யப்பட்டதோடு, ஜந்தர் மந்தரை சுற்றிய 4 கிலோமீட்டர் சுற்றளவில் இணைய வசதிகள் துண்டிக்கப்பட்டது. இதனால் பொதுமக்கள் பெரிய அளவில் பாதிக்கப்பட்டனர்.

இதனால் வழக்கறிஞர் சைலேந்திர மணி திரிபாதி என்பவர் மத்திய அரசுக்கு எதிராக உச்சநீதிமன்றத்தில் நீதிமன்ற அவமதிப்பு மனு தாக்கல் செய்தார். உச்சநீதிமன்றத்தின் உத்தரவுப்படி கட்டுப்பாடுகள் தளர்த்தப்படவில்லை. பல்வேறு கட்டுப்பாடுகள் நடைமுறையில் இருந்ததால் பொதுமக்கள் பாதிக்கப்பட்டனர் எனக்கூறி நீதிமன்ற அவமதிப்பு மனுவை தாக்கல் செய்தார்.

அதேபோல் திரிணாமுல் காங்கிரஸ் சார்பில் வழக்கறிஞர் மேனகா குருசாமி தலைவர்கள் கைதுக்கு எதிராகவும், ஆர்ஜேடி எம்பி மனோஜ் குமார் ஜா தலைவர்கள் கைது மற்றும் அதிகப்படியான கட்டுப்பாடுகள் தொடர்பாகவும், வழக்கறிஞர் அமன் பிரசாத் வழககறிஞர்கள் மீதான தாக்குதல் தொடர்பாகவும் மனுத்தாக்கல் செய்திருந்தனர். இந்த மனுக்கள் அனைத்தும் இன்று அவசரமாக சிறப்பு அமர்வில் விசாரணைக்கு வந்தது.

உச்சநீதிமன்ற நீதிபதிகள் ஜாய்மால்யா பாக்சி மற்றும் நீதிபதி மோகனா அமர்வில் இன்று விசாரணை நடந்தது. இந்த வழக்கின் விசாரணையின்போது உச்சநீதிமன்றம், ''டெல்லி முழுவதும் இரும்பு தடுப்புகளை அகற்ற வேண்டும். தடையற்ற போக்கவரத்தை உறுதி செய்ய வேண்டும். சட்டம் ஒழுங்கு பாதுகாப்பு தொடர்பான அம்சங்களுக்கு உட்பட்டு மக்கள் நகருக்குள் நடமாக அனுமதிக்கப்பட வேண்டும். இணையதள சேவைகளை மீண்டும் வழங்க வேண்டும். வழக்கறிஞர்கள் தங்களின் தொழில் சார்ந்த கடமைகளை இடையூறு இன்றி மேற்கொள்ள வேண்டும். இதற்கு எந்த தடையும் விதிக்கப்படக்கூடாது'' என்று அதிரடியாக உத்தரவிட்டது.

சட்டம் ஒழுங்கு தொடர்பாக அசாதாரண சூழல் ஏற்படாத பட்சத்தில் மெட்ரோ ரயில் வழக்கம்போல் சேவைகள் தொடங்கப்படும் என்று மத்திய அரசு சார்பில் சொலிசிட்டர் ஜெனரல் துஷார் மேத்தா வாதம் வைத்தார். அதனை உச்சநீதிமன்றம் ஏற்றுக்கொண்டது.

பொதுவாக ஞாயிற்றுக்கிழமை என்பது உச்சநீதிமன்றத்திற்கு விடுமுறை தினமாகும். ஆனால் தற்போது டெல்லியில் நடக்கும் போராட்டத்தின் தீவிரவத்தன்மையை கருத்தில் கொண்டு உச்சநீதிமன்றத்தின் சிறப்பு நீதிமன்றம் இந்த வழக்கை விசாரித்து உத்தரவிட்டுள்ளது என்பது குறிப்பிடத்தக்கது.