Delimitation: வெறும் 6 எம்பிக்கள் போதும்.. பாஜகவின் மெகா பிளான்! திமுக கையில் துருப்பு சீட்டு.. பரபரக்கும் டெல்லி

இன்னும் 6 எம்.எல்.ஏக்களே தேவை

தற்போது 5 மாநில சட்டமன்ற தேர்தல்கள் முடிந்துள்ள நிலையில் பல்வேறு அரசியல் திருப்பங்கள் நடைபெற்றுள்ளன. மேற்கு வங்கம், மகாரஷ்டிராவில் எதிர்க்கட்சிகளுக்குள் குழப்பமும் ஏற்பட்டு வருகிறது. இந்த அரசியல் அதிரடி திருப்பங்களால் பாஜக அரசுக்கு மூன்றில் இரண்டு பங்கு பெரும்பான்மையை எட்ட இன்னும் 6 எம் எல் ஏக்களே தேவை என்ற நிலை ஏற்பட்டுள்ளது. இது பற்றிய விவரங்களை விரிவாக பார்க்கலாம்.

கடந்த இரண்டு வாரங்களில் இந்திய அரசியலில் எதிர்பாராத திருப்பங்கள் ஏற்பட்டுள்ளன. இதனால் அரசியல் களம் இதுவரை இல்லாத புதிய சூழ்நிலையை நோக்கி நகர்ந்து வருகிறது. ஒரு மாதத்திற்கு முன்பு வரை யாரும் எதிர்பார்க்காத வகையில் அரசியல் சூழல்கள் மாறியுள்ளன. கடந்த ஏப்ரல் மாதத்தில், மகளிர் இடஒதுக்கீட்டு மசோதாவின் ஒரு பகுதியாக கொண்டு வரப்பட்ட, தொகுதி மறுவரையறை (Delimitation) அரசியலமைப்புச் சட்டத் திருத்த மசோதா எதிர்க்கட்சிகளின் எதிர்ப்பால் நிறைவேறாமல் போனது.

மேற்கு வங்கம், மகாராஷ்டிராவில் அரசியல் மாற்றம்

மக்களவையில் அந்த மசோதா 54 வாக்குகள் வித்தியாசத்தில் தோல்வியடைந்தது. ஆனால் தற்போது அதே மசோதா மீண்டும் மக்களவையில் தாக்கல் செய்யப்பட்டால், அது நிறைவேறும் வாய்ப்பு இருப்பதாக தகவல்கள் தெரிவிக்கின்றன. மேற்கு வங்கத்தில் ஏற்பட்டுள்ள பெரிய அரசியல் மாற்றமும், மகாராஷ்டிராவில் உருவாகி வரும் அரசியல் பரபரப்பும் இதற்கான முக்கிய காரணங்களாகக் கூறப்படுகின்றன.

திரிணாமுல் காங்கிரஸின் 28 மக்களவை எம்.பி.க்களில் 20 பேர் கட்சியிலிருந்து பிரிந்து, என்.சி.பி.ஐ கட்சியில் தங்கள் அணியை இணைத்துள்ளதாக கூறுகிறார்கள்.. மேற்கு வங்கத்தில் பதிவு செய்யப்பட்டுள்ள இந்தக் கட்சி, திரிபுராவில் தனது முதல் தேர்தல் முயற்சியில் தோல்வியடைந்தது. ஆனால் தற்போது திரிணாமுல் காங்கிரஸ் எம்.பி.க்கள் இணைவதன் மூலம் நேரடியாக நாடாளுமன்றத்தில் பிரதிநிதித்துவம் பெறுவதுடன், தேசிய ஜனநாயக கூட்டணியில் முக்கிய இடத்தைப் பெறும் சூழல் உருவாகியுள்ளது.

என்.டி.ஏவில் 318 எம்பிக்கள்

மகாராஷ்டிராவிலும் உத்தவ் தாக்கரே தலைமையிலான சிவசேனா (UBT) இதேபோன்ற நெருக்கடியை எதிர்கொண்டு வருவதாகக் கூறப்படுகிறது. அக்கட்சியின் 9 மக்களவை எம்.பி.க்களில் 6 பேர் வெளியேறத் தயாராக இருப்பதாக தகவல்கள் வெளியாகியுள்ளன. அவர்கள் ஏக்நாதி ஷிண்டே தலைமையிலான சிவசேனா அணியில் இணையக்கூடும் என அறிக்கைகள் தெரிவிக்கின்றன. இந்த அரசியல் மாற்றங்களால் மிகப்பெரிய பலனைப் பெறும் கூட்டணியாக தேசிய ஜனநாயகக் கூட்டணி உருவெடுக்கலாம்.

மேற்கு வங்கம் மற்றும் மகாராஷ்டிராவில் நடைபெற்று வரும் இந்த அரசியல் பரபரப்புகள் தொடர்ந்தால், நாடாளுமன்ற மழைக்கால கூட்டத்தொடர் தொடங்கும் முன்பே தேசிய ஜனநாயக கூட்டணிக்கு மக்களவையில் மூன்றில் இரண்டு பங்கு பெரும்பான்மை என்ற இலக்கை எட்டும் நிலைக்கு நெருங்கக்கூடும் எனக் கூறப்படுகிறது. இந்த மூன்றில் இரண்டு பங்கு பெரும்பான்மை மிகவும் முக்கியமானதாகும். ஏனெனில், அரசியலமைப்புச் சட்டத் திருத்த மசோதாக்களை நிறைவேற்றுவதற்கு இந்த அளவிலான ஆதரவு அவசியமாகும்.

எனவே, தற்போது நடைபெற்று வரும் கட்சி தாவல்கள் மற்றும் அரசியல் மாற்றங்கள், மத்திய அரசின் திட்டங்களுக்கு பெரிய பிளஸ் ஆக அமையக்கூடும் என அரசியல் வட்டாரங்கள் கருதுகின்றன. மக்களவையின் மொத்த உறுப்பினர் எண்ணிக்கை 543. இதில் மூன்றில் இரண்டு பங்கு பெரும்பான்மை பெற 362 உறுப்பினர்களின் ஆதரவு தேவை. ஆனால் தற்போது 3 இடங்கள் காலியாக இருப்பதால், அந்த எண்ணிக்கை 360 ஆகக் குறைகிறது. தற்போது, திரிணாமுல் காங்கிரஸில் இருந்து பிரிந்த அணியையும் சேர்த்து தேசிய ஜனநாயக கூட்டணிக்கு மக்களவையில் 318 எம்.பி.க்கள் உள்ளனர்.

எதிர்க்கட்சிகளுக்கு 184 எம்.பி.க்கள் உள்ளனர். மேலும் எந்தக் கூட்டணியிலும் சேராத 38 எம்.பி.க்கள் உள்ளனர். எனவே, அரசியலமைப்புச் சட்டத் திருத்த மசோதாக்களை நிறைவேற்றுவதற்கு தேசிய ஜனநாயக கூட்டணிக்கு கூடுதலாக 42 எம்.பி.க்களின் ஆதரவு தேவைப்படுகிறது. இது மொத்த எண்ணிக்கையில் வைத்து கணக்கிடப்படுகிறது. ஆனால் வாக்கெடுப்பு நடைபெறும் போது அவைக்குள் இருக்கும் மொத்த உறுப்பினர்களில் 3ல் இரண்டு பங்கு போதும். உதாரணமாக, மகளிர் இடஒதுக்கீட்டு மசோதா மற்றும் அரசியலமைப்புச் சட்டத் திருத்த மசோதா மீது பட்ஜெட் கூட்டத்தொடரில் வாக்கெடுப்பு நடைபெற்றபோது, 540 உறுப்பினர்களில் 528 பேர் மட்டுமே அவையில் இருந்தனர்.

திமுக எடுக்கப் போகும் நிலைப்பாடு என்ன?

அப்போது மூன்றில் இரண்டு பங்கு பெரும்பான்மை பெற 352 வாக்குகள் தேவைப்பட்டன. அந்த வாக்கெடுப்பில் அரசுக்கு ஆதரவாக 298 வாக்குகள் மட்டுமே கிடைத்ததால், மசோதா 54 வாக்குகள் வித்தியாசத்தில் மக்களவையில் தோல்வியடைந்தது. அந்தச் சூழ்நிலையை அடிப்படையாகக் கொண்டால், அரசுக்கு மேலும் 54 எம்.பி.க்களின் ஆதரவு தேவைப்படும். இந்த 54 பேரில், திரிணாமுல் காங்கிரஸில் இருந்து பிரிந்து தற்போது NCPI-யில் இணைந்துள்ள 20 எம்.பி.க்கள் தேசிய ஜனநாயக கூட்டணிக்கு ஆதரவு அளிப்பார்கள் என்று கூறப்படுகிறது.

மேலும், சிவசேனா (UBT) அணியில் இருந்து வெளியேற உள்ளதாகக் கூறப்படும் 6 எம்.பி.க்களும் இணைந்தால், அந்த எண்ணிக்கை 26 ஆக உயரும். இதனால், அரசியலமைப்புச் சட்டத் திருத்த மசோதாக்களை நிறைவேற்ற தேவையான எண்ணிக்கையை தேசிய ஜனநாயக கூட்டணி நெருங்கிவிடும். காங்கிரஸ் கட்சியுடன் ஏற்பட்ட மோதலால், இந்தியா கூட்டணி கூட்டத்தில் திமுக பங்கேற்காமல் புறக்கணித்தது. இதனால், திமுகவின் முடிவே முக்கிய துருப்பு சீட்டாக பார்க்கப்படுகிறது.

மத்திய அரசு திமுகவுடன் பேச்சுவார்த்தை நடத்தி வருவதாகவும், திமுக முன்வைக்கும் கோரிக்கைகளை ஏற்றுக்கொண்டால் அக்கட்சியின் 22 மக்களவை எம்.பி.க்களின் ஆதரவு கிடைக்கலாம் என்றும் முன்னணி ஆங்கில ஊடகம் செய்தி வெளியிட்டுள்ளது. இது நடந்தால் தேசிய ஜனநாயக கூட்டணியின் பலம் 348 ஆக உயரும். அப்போது தேவையான பெரும்பான்மைக்கு வெறும் 6 உறுப்பினர்களின் ஆதரவு மட்டுமே குறைவாக இருக்கும். இதனால், இந்தியா கூட்டணியில் உள்ள சிறிய கட்சிகள் மீது பாஜக கவனம் செலுத்தி வருவதாக தகவல்கள் தெரிவிக்கின்றன.

கணக்குகள் எல்லாம் சரியாக நடந்தால்!

குறிப்பாக மகாராஷ்டிராவைச் சேர்ந்த ஒரு சிறிய கட்சியுடன் உட்பட சில கூட்டணிக் கட்சிகளுடன் பாஜகவுடன் தொடர்பில் இருப்பதாகவும் கூறப்படுகிறது. மாநிலங்களவையைப் பொறுத்தவரை, மூன்றில் இரண்டு பங்கு பெரும்பான்மைக்கு 164 உறுப்பினர்களின் ஆதரவு தேவைப்படுகிறது. மாநிலங்களவையின் அதிகபட்ச உறுப்பினர் எண்ணிக்கை 250 என்றாலும், தற்போது 245 உறுப்பினர்கள் மட்டுமே உள்ளனர். தற்போது தேசிய ஜனநாயக கூட்டணிக்கு 150 மாநிலங்களவை உறுப்பினர்கள் உள்ளனர்.

திமுகவின் 8 மாநிலங்களவை உறுப்பினர்களின் ஆதரவு கிடைத்தால், அந்த எண்ணிக்கை 158 ஆக உயரும். அப்போது மேலும் 6 உறுப்பினர்களின் ஆதரவு மட்டுமே தேவைப்படும். திரிணாமுல் காங்கிரஸ் கட்சியின் 3 மாநிலங்களவை உறுப்பினர்கள் ராஜினாமா செய்ததையடுத்து நடைபெறவுள்ள இடைத்தேர்தல்களும், சில சிறிய கட்சிகளின் ஆதரவும் கிடைத்தால், தேசிய ஜனநாயக கூட்டணி தேவையான எண்ணிக்கையை எட்டும் வாய்ப்பு இருப்பதாக கூறப்படுகிறது.

மேலே சொன்ன கணக்குகள் எல்லாம் சரியாக நடந்தால், மகளிர் இடஒதுக்கீட்டு மசோதாவும், தொகுதி மறுவரையறை மசோதாவும் மீண்டும் நாடாளுமன்றத்தில் தாக்கல் செய்யப்படலாம். அடுத்த மாதம் தொடங்கவுள்ள மழைக்கால கூட்டத்தொடரிலேயே இந்த மசோதாக்கள் கொண்டு வரப்படலாம் என்றும் கூறப்படுகிறது. மேலும், "ஒரே நாடு - ஒரே தேர்தல்" (One Nation, One Election) திட்டத்தை நடைமுறைப்படுத்தும் மசோதாவும் அதன்பின் வரலாம் என்ற பேச்சு டெல்லியில் அதிகம் எழுந்துள்ளது.