டெல்லி: தமிழகத்திற்கு 3,500 கன அடி காவிரி நீரைத் திறந்துவிடுமாறு காவிரி நீர் ஒழுங்காற்றுக் குழு (CWRC) பிறப்பித்த உத்தரவை எதிர்த்து, காவிரி நீர் மேலாண்மை ஆணையத்திடம் (CWMA) மேல்முறையீடு செய்ய கர்நாடக அரசு முடிவு செய்துள்ளதாக கர்நாடக முதல்வர் டி.கே. சிவகுமார் தெரிவித்துள்ளார்.
டெல்லியில் உள்ள கர்நாடக பவனில் இன்று செய்தியாளர்களிடம் பேசிய கர்நாடக முதலமைச்சர் டி.கே.சிவகுமார், "CWRC-யின் உத்தரவு குறித்து தலைமை வழக்கறிஞர், சட்ட நிபுணர்கள் மற்றும் உயர் அதிகாரிகளுடன் ஆலோசனை நடத்தப்பட்டுள்ளது. CWMA-விடம் மேல்முறையீடு செய்வதற்கான ஏற்பாடுகள் நடைபெற்று வருகின்றன," என்று கூறினார்.
CWRC-யின் உத்தரவு குறித்த கேள்விக்கு பதிலளித்த அவர், "இந்தப் பிரச்சனை குறித்து நாங்கள் விரிவாக விவாதித்துள்ளோம். இந்த முறை மழை எங்களுக்குக் கைகொடுக்கவில்லை. முன்னதாக, காவிரி நீரைத் திறந்துவிடுமாறு தமிழ்நாடு விடுத்த கோரிக்கையை அக்குழு இருமுறை நிராகரித்திருந்தது. ஆனால், இம்முறை கர்நாடகா நீரைத் திறந்துவிட உத்தரவிட்டுள்ளது. அமைச்சர் ராமலிங்க ரெட்டி மற்றும் சம்பந்தப்பட்ட அதிகாரிகளுடன் சட்டரீதியான வழிமுறைகள் குறித்து நாங்கள் விவாதித்துள்ளோம்," என்று தெரிவித்தார். மேலும் பேசிய அவர், "பெங்களூர் திரும்பிய பிறகு, எதிர்க்கட்சித் தலைவர்களுடனும் இதுகுறித்து விவாதிப்போம். இதற்கிடையில், தமிழக முதல்வர் விஜய் என்னைச் சந்திக்க விருப்பம் தெரிவித்துள்ளார். அவர் தலைமைச் செயலாளருக்குக் கடிதம் எழுதியதுடன், என்னிடமும் தொலைபேசியில் பேசியுள்ளார். அவருக்கு அளிக்க வேண்டிய மரியாதையை அளித்து, அவரைச் சந்திப்பிற்கு அழைத்துள்ளேன். எங்கள் மாநிலத்திற்கு வரும் விருந்தினர்களை உரிய மரியாதையுடன் வரவேற்பது எங்கள் கடமை. அதற்கான அனைத்து ஏற்பாடுகளும் செய்யப்பட்டுள்ளன" எனத் தெரிவித்துள்ளார். "காவிரிப் படுகையில் நிலவும் சூழலை நேரில் ஆய்வு செய்யுமாறு தமிழக முதல்வர் விஜய்யிடம் கேட்டுக்கொண்டுள்ளோம். அவரது வருகைக்காக தேவையான ஹெலிகாப்டர் ஏற்பாடுகளை அரசு செய்து தரும் என்றும் அவரிடம் தெரிவித்துள்ளேன். கள நிலவரத்தை அவர் நேரில் காண வேண்டும். அவர் என்ன முடிவெடுக்கிறார் என்பதைப் பொறுத்திருந்து பார்ப்போம்," என்று அவர் கூறினார். டெல்லியில் நடந்த போராட்டம் குறித்துப் பேசிய டிகே சிவகுமார், "மாணவர்கள் மீது பெல்லட் குண்டுகளைப் பயன்படுத்த யார் அனுமதி அளித்தது? டெல்லி காவல்துறை மத்திய அரசின் கட்டுப்பாட்டின் கீழ் இயங்குகிறது. எனவே, இத்தகைய சம்பவம் எப்படி நடந்தது என்பது குறித்து விளக்கமளிக்க வேண்டிய பொறுப்பு மத்திய உள்துறை அமைச்சருக்கு உள்ளது. மாணவர்கள் மீது பெல்லட் துப்பாக்கிகள் பயன்படுத்தப்படுவதை எனது அரசியல் வாழ்க்கையில் நான் காண்பது இதுவே முதல் முறை," என்று கூறினார். அமைச்சரவை விரிவாக்கம் குறித்துப் பேசிய கர்நாடக முதலமைச்சர் டிகே சிவகுமார், "இது தொடர்பாக ஆலோசனைகள் நடத்தப்பட்டுள்ளன. கட்சியின் மேலிடத்துடன் இறுதி கட்ட ஆலோசனைகள் இன்னும் நடைபெற வேண்டியுள்ளது. மேலும் விவாதிப்பதற்காக விரைவில் ஒரு கூட்டத்தைக் கூட்டுவதாக எங்கள் தலைவர்கள் தெரிவித்துள்ளனர்" எனத் தெரிவித்தார்.