டெல்லி: நாடு முழுவதும் மின்சாரக் கட்டண அமைப்பில் ஒரு பெரிய மாற்றத்தைக் கொண்டு வர மத்திய மின்சார ஆணையம் (CEA) பரிந்துரை செய்துள்ளது. இதன் படி, பொதுமக்கள் மற்றும் நிறுவனங்கள் தங்களின் மாதாந்திர மின் கட்டணத்தில் செலுத்தும் 'நிலையான கட்டணம்' (Fixed Charges) கணிசமாக உயரக்கூடும். நுகர்வோர் எவ்வளவு மின்சாரத்தைப் பயன்படுத்துகிறார்கள் என்பதைக் கடந்து, இந்த கட்டாய மாதாந்திரக் கட்டணத்தை அதிகமாகச் செலுத்த வேண்டிய நிலை விரைவில் ஏற்படலாம்.
தற்போது மின் விநியோக நிறுவனங்கள் (Discoms) சந்தித்து வரும் கடுமையான நிதி நெருக்கடியைச் சமாளிக்கும் நோக்கில் இந்த அதிரடி அறிக்கை தயாரிக்கப்பட்டுள்ளது. இந்த அறிக்கை விரைவில் மின்சார ஒழுங்குமுறை ஆணையங்களின் கூட்டமைப்பின் (Forum of Regulators) ஒப்புதலுக்காகவும், அதைத் தொடர்ந்து நாடு முழுவதும் செயல்படுத்துவதற்காகவும் சமர்ப்பிக்கப்பட உள்ளது.
மத்திய மின்சார ஆணையத்தின் (CEA) ஆய்வின்படி, மின் விநியோக நிறுவனங்களுக்கு ஏற்படும் ஒட்டுமொத்த செலவில், மின்சாரக் கடத்தல் (Transmission), ஊழியர்களின் சம்பளம், உள்கட்டமைப்பு பராமரிப்பு மற்றும் மின் உற்பத்தி நிலையங்களுக்குச் செலுத்தப்படும் தொகைகள் ஆகியவை மட்டுமே சுமார் 38% முதல் 56% வரை பங்களிக்கின்றன. ஆனால், இந்த நிலையான செலவுகளுக்குப் ஈடாக, நுகர்வோரிடமிருந்து வசூலிக்கப்படும் 'நிலையான கட்டணம்' (Fixed Charges) மூலம் மின் நிறுவனங்களுக்குக் கிடைக்கும் வருவாய் வெறும் 9% முதல் 20% வரை மட்டுமே உள்ளது. பெரும்பாலான நிலையான செலவுகளை, நாம் பயன்படுத்தும் ஒவ்வொரு யூனிட் மின்சாரத்திற்கான கட்டணத்தில் சேர்த்தே மின் நிறுவனங்கள் இதுவரை வசூலித்து வருகின்றன. இதன் காரணமாக, மின்சாரப் பயன்பாடு குறையும் போதெல்லாம் மின் நிறுவனங்களின் வருவாய் கடுமையாகப் பாதிக்கப்பட்டு, நிதிப் பற்றாக்குறை ஏற்படுகிறது. சமீபகாலமாக, வசதி படைத்த நுகர்வோர்களும் பெரும் தொழிற்சாலைகளும் தங்களின் சொந்தப் பயன்பாட்டிற்காக 'ரூஃப்டாப் சோலார்' (Rooftop Solar) மற்றும் இதர மாற்று மின் திட்டங்களுக்கு வேகமாக மாறி வருகின்றனர். இதனால் அவர்கள் மின் வாரியத்திடம் இருந்து வாங்கும் மின்சாரத்தின் அளவு பெருமளவு குறைந்துள்ளது. இருப்பினும், சூரிய ஒளி இல்லாத நேரங்களிலும், அவசரக் காலங்களிலும் அவர்கள் மின் வாரியத்தின் கட்டமைப்பையே (Grid) இன்னும் நம்பியிருக்கிறார்கள். இந்தச் சூழலில், அவர்கள் பயன்படுத்தும் யூனிட்களின் அளவு குறைவதால் மின் நிறுவனங்களுக்குப் பெரிய அளவில் நுகர்வோர் கட்டணம் கிடைப்பதில்லை. ஆனால், அவர்களுக்கான மின் கட்டமைப்பு உள்கட்டமைப்பைத் தொடர்ந்து பராமரிக்க மின் நிறுவனங்கள் செலவு செய்ய வேண்டியுள்ளது. இந்த இலாப இழப்பைச் சமன் செய்ய, அடுத்த சில ஆண்டுகளில் படிப்படியாக நிலையான கட்டணங்களை உயர்த்த CEA திட்டமிட்டுள்ளது: வீட்டு உபயோகம் மற்றும் விவசாயம்: இந்த நுகர்வோர் பிரிவினரிடமிருந்து வசூலிக்கப்படும் நிலையான கட்டண வருவாயை, மின் நிறுவனங்களின் நிலையான செலவில் 25% வரை ஈடுசெய்யும் அளவுக்குப் படிப்படியாக உயர்த்தப் பரிந்துரைக்கப்பட்டுள்ளது. தொழிற்சாலைகள் மற்றும் வணிக வளாகங்கள்: தொழில்முறை, வணிகம் மற்றும் நிறுவனப் பிரிவினருக்கான நிலையான கட்டண உத்தேசத்தை, 2030 ஆம் ஆண்டிற்குள் 100% முழுமையாக மீட்டெடுக்கும் வகையில் உயர்த்தத் திட்டமிடப்பட்டுள்ளது. தனித்துவமான கட்டண முறை: ரூஃப்டாப் சோலார் மற்றும் நெட்-மீட்டரிங் (Net-metering) நுகர்வோருக்கு எனத் தனியான மின் கட்டண முறையை உருவாக்கவும் இந்த அறிக்கை பரிந்துரைக்கிறது. பொதுமக்களுக்குப் பெரிய அளவில் சுமை ஏற்படாத வண்ணம், இந்த மாற்றங்களை ஒரே நேரத்தில் அமல்படுத்தாமல், முறையான மற்றும் படிப்படியான அணுகுமுறை (Calibrated and Phased Approach) மூலம் செயல்படுத்த வேண்டும் என்றும் மத்திய மின்சார ஆணையம் தெளிவுபடுத்தியுள்ளது. இந்த புதிய பரிந்துரைகள் மாநில ஒழுங்குமுறை ஆணையங்களால் ஏற்றுக்கொள்ளப்பட்டால், வரும் காலங்களில் நுகர்வோரின் மின் கட்டணப் பட்டியல் கணிசமாக மாறக்கூடும்.நிதி நெருக்கடியில் மின் நிறுவனங்கள்: காரணம் என்ன?
சோலார் பயன்பாடும், கட்டண மாற்றத்திற்கான அவசியமும்
CEA பரிந்துரைத்துள்ள புதிய இலக்குகள் (2030-க்குள் மாற்றம்)