டெல்லி: தமிழகத்தில் விஜய் தலைமையிலான தமிழக வெற்றிக் கழகத்துடன் காங்கிரஸ் ஏற்கனவே அதிகாரப்பூர்வமாக கைகோர்த்து செயல்பட்டு வரும் நிலையில், தேசிய அளவில் அதன் தாக்கம் காங்கிரஸ் தலைமைக்கு பெரும் தலைவலியை உருவாக்கியுள்ளது.
தமிழகத்தில் திமுகவுடனான உறவை முறித்துவிட்டு தவெக கூட்டணியில் காங்கிரஸ் இணைந்தது, தேசிய அளவில் 'இந்தியா' கூட்டணியின் அடித்தளத்தையே ஆட்டிப்படைத்துள்ளது. இந்நிலையில், அகில இந்திய அளவில் திமுகவை சமாதானப்படுத்தாவிட்டால் இந்தியா கூட்டணி அடியோடு உடைந்துவிடும் என்று காங்கிரஸ் தலைவர் மல்லிகார்ஜுன கார்கே முகாம் சோனியா காந்திக்கு அவசர ஆலோசனை வழங்கியுள்ளது.
கார்கே தரப்பினர் சோனியா காந்தியைச் சந்தித்து நிலவரத்தின் தீவிரத்தை விளக்கியுள்ளனர்: கூட்டணி உடையும் அபாயம்: தமிழகத்தில் தவெகவுடன் கூட்டணி அமைத்ததால் திமுக கடும் கோபத்தில் உள்ளது. தேசிய அளவில் திமுக வெளியேறினால், அது 'இந்தியா' கூட்டணியின் இருப்பையே கேள்விக்குறியாக்கிவிடும். 3-வது அணிக்கு திமுக திட்டம்: காங்கிரஸ் தங்களை ஒதுக்கிவிட்டதாகக் கருதும் திமுக தலைமை, திரிணாமுல் காங்கிரஸ் (TMC), ஆம் ஆத்மி (AAP), சமாஜ்வாதி கட்சி (SP) உள்ளிட்ட பலம் வாய்ந்த மாநிலக் கட்சிகளைத் திரட்டி தனியாக 'மூன்றாவது அணி' (Third Front) ஒன்றை உருவாக்கத் திட்டமிடுகிறது. ராகுல் காந்தியின் பிரதமர் கனவுக்கு ஆபத்து: மாநிலக் கட்சிகள் தனி அணியாகத் திரண்டால், வாக்குகள் சிதறி ராகுல் காந்தியைப் பிரதமர் வேட்பாளராக முன்னிறுத்தும் காங்கிரஸின் முயற்சிக்கு முற்றுப்புள்ளி வைக்கப்பட்டுவிடும். எனவே, தமிழகத்தில் தவெக கூட்டணியில் இருந்தாலும், தேசிய அளவில் திமுகவுடன் எப்பாடு பட்டாவது ஒரு சுமுக உறவைப் பேண வேண்டும் என்று கார்கே தரப்பு வலியுறுத்தியுள்ளது. இதன் எதிரொலியாக, காங்கிரஸ் மேலிடம் ஒரு விசித்திரமான உத்தியைக் கையாளத் தொடங்கியுள்ளது: திமுகவுக்கு சமாதானத் தூது: தமிழக காங்கிரஸ் தலைவர் செல்வப்பெருந்தகை உள்ளிட்ட சில தலைவர்கள், திமுகவின் கோபத்தைத் தணிக்கவும், தேசிய உறவை மீட்டெடுக்கவும் தவெகவின் சில நிலைப்பாடுகளை மேடைகளில் விமர்சிக்கத் தொடங்கியுள்ளனர். இரு தலைக் கொள்ளி எறும்பு நிலை: தமிழகத்தில் தவெக கூட்டணியில் இருந்துகொண்டே, டெல்லி அரசியலுக்காக திமுகவை வளைக்கப் பார்ப்பது காங்கிரஸின் பலவீனமான இரட்டை வேடத்தையே காட்டுகிறது என்று அரசியல் நோக்கர்கள் சுட்டிக்காட்டுகின்றனர். காங்கிரசின் இந்த சமாதான முயற்சிகளையும், தவெக மீதான போலியான விமர்சனங்களையும் திமுக தலைமை கொஞ்சமும் கண்டுகொள்ளவில்லை. ஒட்டுப்போட முடியாது: "தமிழகத்தில் எங்களைக் கழற்றிவிட்டு தவெகவுடன் கைகோர்த்த காங்கிரஸ், இப்போது டெல்லியில் மட்டும் வந்து கெஞ்சுவதை ஏற்க முடியாது. முடிந்தது முடிந்ததுதான், இனி ஒட்ட வைக்க முடியாது" என்று திமுக தரப்பில் திட்டவட்டமாகக் கூறப்பட்டுவிட்டது. போராட்டங்களுக்கு மட்டுமே ஆதரவு: ஜனநாயக விரோத பாஜக அரசுக்கு எதிரான களப் போராட்டங்களில் மட்டுமே காங்கிரஸுக்கு வெளியில் இருந்து ஆதரவு தரப்படுமே தவிர, தேர்தல் கூட்டணிக்கோ அல்லது 'இந்தியா' கூட்டணிக் கூட்டங்களுக்கோ இடமில்லை என திமுக கதவை அடைத்துவிட்டது. காங்கிரஸ் தவெகவுடன் அதிகாரப்பூர்வமாகச் சென்றுவிட்டதால், இனி காங்கிரஸை நம்பிப் பயனில்லை என்ற முடிவுக்கு வந்த திமுக, 'இந்தியா' கூட்டணியை உடைத்துவிட்டு மாநில சுயாட்சிக் கட்சிகளுடன் இணைந்து 'மூன்றாவது அணி' அமைப்பதில் தீவிரமாக இறங்கியுள்ளது. காங்கிரஸ் தலைமை இவ்வளவு சமாதான முயற்சிகளையும், தவெக மீதான தாக்குதல்களையும் முன்னெடுத்த போதிலும், திமுக தலைமை தனது முடிவில் மிகவும் கறாராக இருப்பதாகக் கூறப்படுகிறது. 'இந்தியா' கூட்டணியில் இருந்து விலகி, மாநில சுயாட்சியை முன்னிறுத்தும் வலுவான மாநிலக் கட்சிகளைத் திரட்டி மாற்று சக்தியாக மூன்றாவது அணியை அமைப்பதில் திமுக தலைமை உறுதியான நிலைப்பாட்டில் இருப்பதாகக் கூறப்படுகிறது.சோனியா காந்தியிடம் கார்கே முகாம் சொன்ன ரகசிய ரிப்போர்ட்
காங்கிரஸின் முரண்பாடான இரட்டை வியூகம்
"முடிந்தது முடிந்ததுதான்!" - திமுகவின் உறுதியான நிலைப்பாடு