ரேஷன் விநியோகத்தில் புரட்சி.. மொத்தமாக இனி டிஜிட்டல்தான்.. ரூ.25,530 கோடியில் மத்திய அரசு திட்டம்

இந்தத் திட்டம், முன்பு தனித்தனியே இயங்கி வந்த 'ஸ்மார்ட் பிடிஎஸ்' (SMART PDS) மற்றும் மாநிலங்களுக்குள் உணவு தானியங்கள் கொண்டு செல்லும் திட்டம், நியாயவிலைக் கடை முகவர்களின் கமிஷன் உதவித் திட்டம் ஆகியவற்றை ஒரே நிர்வாகக் குடையின் கீழ் கொண்டு வருகிறது. இதன் மூலம் நிர்வாகச் செலவுகள் கணிசமாகக் குறையும், நிதி விநியோகம் சீராகும் என மத்திய அரசு தெரிவித்துள்ளது.

தேசிய உணவுப் பாதுகாப்புச் சட்டத்தின் (NFSA) கீழ் சுமார் 81.35 கோடி பயனாளிகள் பயனடையும் இந்தத் திட்டம், உணவு தானியங்கள் தகுதியானவர்களுக்கு தங்கு தடையின்றி சென்றடைவதை உறுதி செய்யும். மாநிலங்களுக்கான போக்குவரத்து மற்றும் கையாளுதல் செலவுகளை மத்திய அரசே ஏற்பதால், மாநில அரசுகளின் நிதிச் சுமை பெருமளவு குறையும். இத்திட்டம் மார்ச் 31, 2031 வரை செயல்படும்.

ரேஷன் கடை முகவர்களுக்கு பெரும் மகிழ்ச்சி

இத்திட்டத்தின் முக்கிய அம்சமாக, நியாயவிலைக் கடை (FPS) முகவர்களின் கமிஷன் தொகை மற்றும் லாப வரம்பு (Dealer Margin) உயர்த்தப்பட உள்ளது. இதனால் உள்ளூர் ரேஷன் கடை ஊழியர்களின் பொருளாதார நிலை மேம்படும். எடை மோசடி, கசிவு போன்ற பிரச்னைகள் குறையும் என எதிர்பார்க்கப்படுகிறது.

அதிநவீன தொழில்நுட்பங்கள் புகுத்தப்படும்

'சார்தக்-பிடிஎஸ்' திட்டத்தின் மிகப் பெரிய சிறப்பு அதில் இணைக்கப்பட்டுள்ள அதிநவீன தொழில்நுட்பங்கள்தான்.

செயற்கை நுண்ணறிவு (AI) & மெஷின் லேர்னிங்: தானியத் தேவையை முன்கூட்டியே கணித்து, முறைகேடுகளைக் கண்டறியும்.

பிளாக்செயின் தொழில்நுட்பம்: உணவு தானியங்கள் கிடங்கில் இருந்து ரேஷன் கடை வரை மாற்றமின்றி செல்வதை உறுதி செய்யும்.

இயற்கை மொழி செயலாக்கம் (NLP): பொதுமக்கள் தங்கள் தாய்மொழியில் வாட்ஸ்அப் மற்றும் சாட்பாட்கள் மூலம் புகார் அளிக்கும் 'ஆஷா' தளம்.

வாகன கண்காணிப்பு & QR கோடு: 'சக்ஷம்' தளம் மூலம் லாரிகள் நிகழ்நேரத்தில் கண்காணிக்கப்படும். இதன் மூலம் போக்குவரத்து தூரம் 15 முதல் 50 சதவீதம் வரை குறையும் என்றும், ஆண்டுக்கு ₹280 கோடி வரை சேமிக்க முடியும் என்றும் மதிப்பிடப்பட்டுள்ளது.

இத்திட்டம் ரேஷன் கார்டு டிஜிட்டல் மயமாக்கல், பயோமெட்ரிக் அங்கீகாரம், ஒரே நாடு ஒரே ரேஷன் கார்டு (ONORC) ஆகியவற்றை மேலும் வலுப்படுத்தும்.

இதன் மூலம் பல திட்டங்களை ஒருங்கிணைத்து நிதி விரயத்தைத் தவிர்க்கும் இந்த அணுகுமுறை, இந்திய அரசின் திட்டச் செயல்பாட்டில் புதிய முன்னோடியாக அமையும் என்று கருதப்படுகிறது.

இருப்பினும், கிராமப்புற மக்களுக்கு டிஜிட்டல் தொழில்நுட்பங்களை எளிதாகப் புரியும் வகையில் பயிற்றுவிப்பது, உள்ளூர் ரேஷன் கடை ஊழியர்களுக்கு தேவையான ஆதரவு அளிப்பது ஆகியவை இனி வரும் காலத்தில் முக்கிய சவால்களாக இருக்கும்.

இந்தப் புதிய திட்டம் இந்தியாவின் உணவுப் பாதுகாப்பு அமைப்பை வலுப்படுத்தி, ஏழை மற்றும் நடுத்தர மக்களின் வாழ்வாதாரத்தை மேம்படுத்தும் என்று எதிர்பார்க்கப்படுகிறது.