டெல்லி: இன்றைய சூழலில் நம் அன்றாட வாழ்வில் UPI டிஜிட்டல் பணப்பரிவர்த்தனை என்பது மிக முக்கியமான ஒன்றாக மாறிவிட்டது. கடையில் டீ குடிப்பது முதல் பெரிய பொருட்கள் வாங்குவது வரை அனைத்துக்கும் மொபைலில் 'க்யூஆர் கோடு' ஸ்கேன் செய்து UPI மூலமே பணம் செலுத்துகிறோம்.
ஆனால், இனி UPI பரிவர்த்தனைகளுக்குக் கட்டணம் வசூலிக்கப்படுமா? என்ற கேள்வி பொதுமக்கள் மத்தியில் நீண்ட நாட்களாக இருந்து வருகிறது. அதற்கு முற்றுப்புள்ளி வைக்கும் வகையில் மத்திய அரசு ஒரு முக்கிய அறிவிப்பை வெளியிட்டுள்ளது.
மத்திய நிதியமைச்சகம் வெளியிட்டுள்ள புதிய அறிவிப்பின்படி, ரூ.2,000 வரை செய்யப்படும் UPI பரிவர்த்தனைகளுக்கு வங்கிகளோ அல்லது சேவை வழங்கும் நிறுவனங்களோ நேரடியாகவோ அல்லது மறைமுகமாகவோ எந்தவொரு கட்டணமும் வசூலிக்கக் கூடாது. அதேபோல, ரூபே டெபிட் கார்டுகளைப் பயன்படுத்திச் செய்யப்படும் பணப்பரிவர்த்தனைகளுக்கும் இந்த விலக்கு பொருந்தும். இதனால் சாமானிய மக்கள் ரூ.2,000 வரை பணப்பரிமாற்றம் செய்யும்போது எந்தவொரு கூடுதல் கட்டணமும் செலுத்த வேண்டியதில்லை. பலருக்கு எழும் பெரிய சந்தேகம் இதுதான்.. அப்படியானால் ரூ.2,500, ரூ.5,000 அல்லது ரூ.20,000 அனுப்பினால் பணம் பிடிக்கப்படுமா? இதற்கு பதில்: இல்லை. ரூ.2,000-க்கு மேல் அனுப்பினால் உடனடியாகக் கட்டணம் பிடிப்பார்கள் என்று அரசோ அல்லது வங்கிகளோ சொல்லவில்லை. அரசு தற்போது வெளியிட்டுள்ள விதியின்படி, ரூ.2,000 வரையிலான பரிவர்த்தனைகளுக்குக் கட்டணம் வசூலிக்க சட்டப்பூர்வமாக முழு தடை விதிக்கப்பட்டுள்ளது. ஆனால், அதற்கு மேற்பட்ட தொகைகளுக்கு எதிர்காலத்தில் ஏதேனும் சிறிய அளவிலான கட்டமைப்புச் செலவுக் கட்டணம் கொண்டுவர வேண்டிய நிலை வந்தால், அதற்கு வழிவகை செய்யும் சட்டச் சட்டகத்தை மட்டுமே அரசு உருவாக்கியுள்ளது. நிதியமைச்சர் நிர்மலா சீதாராமன் ஏற்கெனவே தெளிவுபடுத்தியது போல, பொதுமக்கள் அல்லது வாடிக்கையாளர்களிடம் இருந்து எந்தக் கட்டணமும் வசூலிக்கப்படாது. ஒருவேளை கட்டணம் கொண்டுவரப்பட்டாலும், அது பெரிய வியாபாரிகளுக்கு மட்டுமே பொருந்தக்கூடும். இந்தியாவில் UPI பயன்பாடு மிக வேகமாக வளர்ந்து வருகிறது. 2016-17 ஆம் ஆண்டில் வெறும் 44 வங்கிகள் மட்டுமே இதில் இணைந்திருந்தன. ஆனால், தற்போது 740-க்கும் மேற்பட்ட வங்கிகள் இணைந்துள்ளன. மாதம் ஒன்றுக்கு சுமார் 2,366 கோடிக்கும் அதிகமான பரிவர்த்தனைகள் UPI மூலம் நடைபெறுகின்றன. இவ்வளவு பெரிய டிஜிட்டல் கட்டமைப்பைத் தொடர்ந்து சீராகப் பராமரிக்கவும், பாதுகாப்பு வசதிகளை மேம்படுத்தவும் வங்கிகளுக்கு அதிக செலவாகிறது. இதற்காகவே வியாபாரிகளுக்கான கட்டணம் பற்றிய விவாதங்கள் நடைபெற்று வருகின்றன. மற்றொரு சுவாரசியமான விஷயம் என்னவென்றால், இன்டர்நெட் வசதி சரியாக இல்லாத சிறிய நகரங்கள் மற்றும் கிராமப்புற மக்களுக்காக UPI Tap & Pay போன்ற ஆஃப்லைன் வசதிகளும் மேம்படுத்தப்பட்டு வருகின்றன. இதன் மூலம் மொபைல் நெட்வொர்க் குறைவாக இருக்கும் இடங்களிலும், மிக எளிதாகப் பணம் செலுத்த முடியும். நீங்கள் வழக்கம்போல ரூ.500, ரூ.1,500 அல்லது ரூ.2,000 வரை UPI மூலம் அனுப்பினால் அது எப்போதும்போல முழுமையாக இலவசம். .2,000-க்கு மேல் அனுப்பினால் உங்களுடைய வங்கிக் கணக்கிலிருந்து கூடுதல் கட்டணம் எதுவும் தானாகப் பிடிக்கப்படாது. ஆனால் வரும் காலங்களில் இதற்கு கட்டணம் விதிக்க தடை இல்லை. தற்போதைய சூழ்நிலையில் பொதுமக்கள் பயன்படுத்தும் UPI பரிவர்த்தனைகள் தொடர்ந்து இலவசமாகவே இருக்கும் என்று அரசு உறுதியளித்துள்ளது. எனவே, UPI பயனர்கள் கட்டணம் பற்றிய தேவையற்ற பயமோ அல்லது குழப்பமோ அடையத் தேவையில்லை.அரசு வெளியிட்ட புதிய உத்தரவு என்ன?
ரூ.2,000-க்கு மேல் பணம் அனுப்பினால் கட்டணம் வசூலிக்கப்படுமா?
ஏன் இந்த ₹2,000 அளவு முக்கியமானது?
இணையம் இல்லாமலும் இனி UPI பயன்பாடு!
பொதுமக்கள் புரிந்து கொள்ள வேண்டியது