தர்மபுரி: தருமபுரி - மொரப்பூர் ரயில் திட்டம் தருமபுரி மாவட்ட மக்களின் 84 ஆண்டு கனவு திட்டம். 2019 ஆம் ஆண்டு அன்புமணி ராமதாஸ் நாடாளுமன்ற உறுப்பினராக இருந்தபோது கொண்டு வரப்பட்ட மிக முக்கியமான திட்டம். ஐந்து ஆண்டுகளாக இந்த திட்டம் ஆமை வேகத்தில் நடந்து கொண்டிருந்தது. இந்த திட்டத்திற்கான நில அளவை உள்ளிட்ட எந்த ஒரு பணியும் நடைபெறாமல் இருந்தன. ஆனால், கடந்த ஒன்றரை ஆண்டுகளில் தருமபுரி - மொரப்பூர் ரயில் திட்டத்தின் 60 சதவீத பணிகள் முடிவடைந்துள்ளது. இந்த ரயில் திட்டம் இரண்டு ஆண்டுகளில் முடிவடையும் என சௌமியா அன்புமணி எம்எல்ஏ கூறினார்.
தருமபுரி மொரப்பூர் ரயில்வே திட்ட பணிகள் குறித்து தருமபுரி ரயில்வே நிலையத்தில் தர்மபுரி சட்டமன்ற உறுப்பினர் சௌமியா அன்புமணி திடீர் ஆய்வு மேற்கொண்டார். தொடர்ந்து ரயில்வே துறை அதிகாரியிடம் தற்போதைய பணிகள் குறித்து கேட்டு அறிந்தார். தொடர்ந்து செய்தியாளர்களை சந்தித்த சௌமியா அன்புமணி பேசுகையில், சென்னையிலிருந்து எல்லா பகுதிகளுக்கும் ரயில் போக்குவரத்து உள்ளது. தருமபுரியில் இருந்து சென்னைக்கு மட்டும் இல்லை. மொரப்பூர் ரயில் நிலையத்திலிருந்து தருமபுரி ரயில் நிலையத்திற்கு 34 கிமீ தண்டவாளம் இல்லை. இரண்டாம் உலகப்போரில் போருக்கு தேவையான தளவாடங்களை கொண்டு வர மொரப்பூரில் இருந்து தருமபுரி வரை ரயில் பாதை பயன்படுத்தப்பட்டது.
இப்போது அந்த தண்டவாளங்கள் இல்லை. இதனை கொண்டு வர 19 முறை ரயில்வே துறை அமைச்சரை அன்புமணி ராமதாஸ் சந்தித்தார். ஆனால் இந்த திட்டத்திற்கு பட்ஜெட்டில் நிதி ஒதுக்கினால் தான் திட்டம் செயல்படும். மாநில அரசு ஒத்துழைப்பு கொடுக்க வேண்டும். தமிழ்நாட்டிற்கு கிடைத்த ஒரே ரயில் திட்டம் இதுதான். ஆனால் மாநில அரசு நிதி கொடுக்காததால், மத்திய அரசிடம் முழு நிதியையும் பெற முயற்சித்துள்ளார். இந்த திட்டத்திற்கு நிலம் கையகப்படுத்த வேண்டும். மக்களுக்கு நிவாரணம் கொடுக்க வேண்டும். அதை மாநில அரசு செய்யவில்லை. ரயில் பாதையில் ஆக்கிரமிப்பு, வீடு கட்டியவர்களுக்கு நிவாரணமாக கொடுக்க முடியாத சூழல் உள்ளது. இதனை கருணை உள்ளத்தோடு செய்து கொடுக்க வேண்டும். தருமபுரி - மொரப்பூர் ரயில் திட்டம் தருமபுரி மாவட்ட மக்களின் 84 ஆண்டு கனவு திட்டம். 2019 ஆம் ஆண்டு அன்புமணி ராமதாஸ் நாடாளுமன்ற உறுப்பினராக இருந்தபோது கொண்டு வரப்பட்ட மிக முக்கியமான திட்டம். ஐந்து ஆண்டுகளாக இந்த திட்டம் ஆமை வேகத்தில் நடந்து கொண்டிருந்தது. இந்த திட்டத்திற்கான நில அளவை உள்ளிட்ட எந்த ஒரு பணியும் நடைபெறாமல் இருந்தன. ஆனால், கடந்த ஒன்றரை ஆண்டுகளில் தருமபுரி - மொரப்பூர் ரயில் திட்டத்தின் 60 சதவீத பணிகள் முடிவடைந்துள்ளது. மீதமுள்ள நில அளவைப் பணி செய்து அங்குள்ள விவசாயிகளுக்கு நிலத்திற்கான நிதியை வழங்கி அதனை ரயில்வே துறையிடம் ஒப்படைக்கப்பட வேண்டும். இந்தப் பணி நிறைவு பெற்றால் 4 மாதங்களில் டெண்டர் பணிகளை முடிவு செய்து இரண்டு ஆண்டுகளில் தருமபுரி - மொரப்பூர் ரயில் திட்டத்தை முழுமையாக முடிக்க முடியும் என ரயில்வே துறையினர் தெரிவித்துள்ளனர்" என்றார். மேலும், இந்த பகுதிக்கு புதிதாக 2 ரயில் நிலையங்கள் கிடைக்கும் என்று கூறிய சௌமியா அன்புமணி அதுபற்றி பேசும் போது, "தருமபுரி - மொரப்பூர் ரயில் திட்டம் அமைந்தால் இந்த பகுதியில் இரண்டு புதிய கூடுதல் ரயில் நிலையங்கள் கிடைத்துவிடும். தருமபுரியில் இருந்து சென்னைக்கு ரயிலில் பயணம் செய்யலாம். தருமபுரி சிப்காட் தொழிற்பேட்டை அமையும்போது பொதுமக்களுக்கும் தொழில்துறையினருக்கும் பயனுள்ள வகையில் இந்த திட்டம் அமையும். தருமபுரி மாவட்டத்திலிருந்து சேலம், பெங்களூரு, நாகர்கோயில் உள்ளிட்ட முக்கியமான பகுதிகளுக்கு ரயிலில் செல்லலாம். ஆனால் மாநில தலைநகரான சென்னைக்கு செல்ல முடியாத நிலை தற்போதும் உள்ளது. தருமபுரி - மொரப்பூர் ரயில் திட்டம் நிறைவடைந்தால் அந்த குறையும் நீங்கும். இங்கிருந்து சென்னைக்கு ரயிலில் செல்ல முடியும். மேலும், தருமபுரி - மொரப்பூர் ரயில் திட்டத்திற்கான நில எடுப்பு பணிகளை துரிதப்படுத்தி ரயில்வே துறையிடம் ஒப்படைக்க அதிகாரியிடம் கேட்டுக் கொண்டதாகவும் சௌமியா அன்புமணி தெரிவித்தார். செய்தியாளர்களின் கேள்வி ஒன்றுக்கு பதில் அளித்த சௌமியா அன்புமணி, தமிழகத்தில் பாலியல் குற்ற செயல்களில் ஈடுபடுபவர்களுக்கு உடனே இரண்டு மாதத்தில் மரணதண்டனை கொடுக்க வேண்டும். உயிர் பயத்தை ஏற்படுத்தினால்தான் குற்றங்கள் குறையும் என்றார்.