துபாய்: துபாயில் செயல்பட்டு வரும் தர்பார் மீடியா அலுவலகத்தில், வளைகுடா தமிழ்ச் சங்கம் சார்பாக ஒரு சிறப்பு நூல் வெளியீட்டு விழா நடைபெற்றது. மதுரையைச் சேர்ந்த பிரபல எழுத்தாளரும் கவிஞருமான இரா. இரவி எழுதிய 'மாண்புமிகு மனைவி' என்ற புதிய புத்தகம் இவ்விழாவில் வெளியிடப்பட்டது.
கவிஞர் இரா. இரவி தனது மறைந்த மனைவியின் நினைவாகவும், அவர் மீது கொண்ட அளவற்ற அன்பை வெளிப்படுத்தும் வகையிலும் இந்த நூலை மிக உருக்கமாக எழுதியுள்ளார். கணவன் - மனைவி உறவின் மகத்துவத்தையும், குடும்பத்தின் முக்கியத்துவத்தையும் விளக்கும் வகையில் இப்புத்தகம் அமைந்திருக்கிறது.
இவ்விழாவில் வளைகுடா தமிழ்ச் சங்கத்தின் தலைவர் முனைவர் ஆ. முகம்மது முகைதீன் கலந்துகொண்டு 'மாண்புமிகு மனைவி' நூலை முறைப்படி வெளியிட்டார். இதன் முதல் பிரதியை தமிழ்ச் சங்கத்தின் பொதுச் செயலாளர் முதுவை ஹிதாயத் பெற்றுக்கொண்டார். நூலை வெளியிட்டு பேசிய முனைவர் முகம்மது முகைதீன், "கவிஞர் இரா. இரவி தனது மனைவியுடன் வாழ்ந்த மகிழ்ச்சியான வசந்த காலம் தொடங்கி, அவரது மறைவிற்குப் பிறகு ஏற்பட்ட தாங்க முடியாத சோகம் வரை அனைத்தையும் இந்த நூலில் நெஞ்சைத் தொடும் வகையில் பதிவு செய்துள்ளார். தனது மனைவியை இழந்த ஒரு கணவனின் உள்ளத்து வேதனையையும், உண்மையான பாசத்தையும் பிரதிபலிக்கும் சிறந்த படைப்பாக இந்த நூல் வெளிவந்துள்ளது" என்று நெகிழ்ச்சியுடன் குறிப்பிட்டார். இந்த இலக்கிய விழாவில் துபாய் தர்பார் மீடியா இயக்குனர் சொக்கம்பட்டி கபீர், மயிலாடுதுறை கிருஷ்ணன், ரகுவரன், இலங்கை திருமாறன் உள்ளிட்ட தமிழ் ஆர்வலர்களும் இலக்கிய பிரியர்களும் பலரும் நேரில் கலந்துகொண்டு சிறப்பித்தனர். துபாயில் நடந்த இந்நிகழ்வு அங்குள்ள தமிழ் மக்கள் மத்தியில் பெரும் கவனத்தையும் வரவேற்பையும் பெற்றுள்ளது.