துபாய் விசா ரிஜெக்ட் ஆகுதா? இந்த 7 விஷயங்கள் தான் காரணம்.. அதிகாரப்பூர்வமாகவே அறிவித்த அமீரகம்

அமீரக விசா

இதற்கிடையே அமீரக அரசு இது தொடர்பாக புதிய வழிகாட்டுதல்களை வெளியிட்டுள்ளது. அதில் விசா நிராகரிக்கப்படுவதற்கு குற்றப் பின்னணி மட்டுமே காரணமல்ல. விண்ணப்பப் படிவத்தில் சிறிய தவறுகள் அல்லது தெளிவில்லாத ஆவணங்கள் கூட விசா நிராகரிக்கப்பட காரணமாக அமைந்துவிடுவதாக தெரிவிக்கப்பட்டுள்ளது. விசா நிராகரிப்புக்கான 7 முக்கிய காரணங்களையும் அது வெளியிட்டுள்ளது.

7 காரணங்கள்

• விண்ணப்பப் படிவத்தில் தவறான அல்லது முழுமையற்ற தகவல்களை வழங்குவது.
• பாஸ்போர்ட் அல்லது பிற ஆவணங்களை தெளிவில்லாமல் அதாவது Blur டாக்குமெண்டாக ஸ்கேன் செய்து பதிவேற்றுவது.
• கடந்த காலங்களில் அமீரக விசா விதிமுறைகளை மீறியிருப்பது அல்லது அனுமதிக்கப்பட்ட காலத்தைத் தாண்டி தங்கியிருப்பது.
• அமீரகத்தில் சட்டவிரோத நடவடிக்கைகள் அல்லது குற்ற பின்னணி இருப்பது.
• விண்ணப்பதாரரின் வேலை அல்லது தொழில் தொடர்பான சிக்கல்கள்.
• சில குறிப்பிட்ட நாடுகளை சேர்ந்தவர்களுக்கு விதிக்கப்பட்டுள்ள விசா கட்டுப்பாடுகள்.
• விண்ணப்பத்தில் குறிப்பிடப்பட்ட பயண நோக்கத்திற்கும், சமர்ப்பிக்கப்பட்ட ஆவணங்களுக்கும் இடையே முரண்பாடுகள் இருப்பது.

இந்த 7 காரணங்களுக்காகவே அமீரக விசா பெரும்பாலும் நிராகரிக்கப்படுவதாக அந்நாட்டு அரசு தெரிவித்துள்ளது. குறிப்பாக ஆவணங்கள் தெளிவாக இல்லாதது போன்ற நிர்வாக ரீதியிலான தவறுகள் கூட விசா மறுப்புக்கு காரணமாக இருக்கும் என்பதை அமீரகம் எச்சரித்துள்ளது.

விசா கிடைக்க என்ன செய்ய வேண்டும்?

மேலும், விசா நிராகரிக்கப்படுவதை தவிர்க்க விண்ணப்பதாரர்கள் கட்டாயம் பின்பற்ற வேண்டிய 5 வழிமுறைகளையும் அமீரக அரசு வெளியிட்டுள்ளது.

• அனைத்து ஆவணங்களையும் சமர்ப்பிக்கும் முன் பலமுறை சரிபார்க்க வேண்டும்.
• அமீரக சட்டங்களை மதித்து, குற்றப் பதிவுகள் இல்லாமல் இருக்க வேண்டும்.
• முந்தைய விசாக்களை சரியாக பயன்படுத்தி இருக்க வேண்டும். விசா விதிமுறைகளை மீறியிருக்கக்கூடாது.
• ஏற்கனவே விசா நிராகரிக்கப்பட்டிருந்தால், அதற்கான காரணத்தை சரிசெய்த பிறகே மீண்டும் விண்ணப்பிக்க வேண்டும்.
• போதுமான நிதி வசதி, அதாவது Proof of Funds இருப்பதை நிரூபிக்கும் ஆவணங்களை மற்ற ஆவணங்களுடன் சேர்த்து சமர்ப்பிக்க வேண்டும்.

Proof of Funds ஆவணத்தை சமர்ப்பிக்க பலரும் மறந்து விடுவது அல்லது அதற்கு போதுமான ஆதாரங்களை வழங்காததே விசா மறுக்கப்பட முக்கிய காரணமாக இருப்பதாக அமீரக அரசு சுட்டிக்காட்டியுள்ளது.

கவனிக்க வேண்டியது

ஏற்கனவே விசா நிராகரிக்கப்பட்டவர்கள், அதே விண்ணப்பத்தை எந்த மாற்றமும் செய்யாமல் மீண்டும் சமர்ப்பிப்பதால் பலன் கிடைக்காது என்றும் அமீரக அரசு தெரிவித்துள்ளது. முதலில் எதற்காக உங்கள் விசாவை நிராகரித்தார்கள் என்பதை கண்டறிந்து, அதை சரிசெய்த பிறகே புதிய விசா விண்ணப்பத்தை சமர்ப்பிக்க வேண்டும் என்று அறிவுறுத்தியுள்ளது.

துபாய் உட்பட அமீரக நாடுகளுக்கு இந்தியர்கள் அதிகம் செல்லும் நிலையில், அவர்களுக்கு இந்த அறிவிப்பு உதவும்! சரியான ஆவணங்கள், துல்லியமான தகவல்கள் மற்றும் போதுமான நிதி ஆதாரங்களை வழங்கினால் விசா கிடைப்பதற்கான வாய்ப்புகள் அதிகம்!