ஓட்டு போடலைல! என் காசை திருப்பி தாங்க! மாரியாத்தா சும்மா விடமாட்டா! ஜெகன் கட்சி வேட்பாளர் வார்னிங்

ஆந்திராவில் கடந்த நவம்பர் 1ஆம் தேதி மாநகராட்சி, நகராட்சி, நகர பஞ்சாயத்துகளுக்கு தேர்தல் நடந்தது. இதில் தேசிய ஜனநாயக கூட்டணிக்கும் ஒய்எஸ்ஆர் காங்கிரஸுக்கும் இடையே கடும் போட்டி நிலவியது.

என்டிஏ கூட்டணி அமோகம்

தேர்தலில் பதிவான வாக்குகள் கடந்த 3 ஆம் தேதி எண்ணப்பட்டன. அதில் மாநகராட்சி மேயர் பதவிக்கான 13 இடங்கள், நகராட்சி தலைவர் பதவிக்கான 87 இடங்கள், ஆக மொத்தம் 100 இடங்களில் 93 இடங்களை என்டிஏ கூட்டணி கைப்பற்றியுள்ளது.

பலமனேரு மாநகராட்சி

சித்தூர் மாவட்டத்தில் உள்ள பலமனேரு மாநகராட்சியில் மொத்தம் உள்ள 36 வார்டுகளில் தெலுங்கு தேசம் கட்சி 26 இடங்களிலும், ஒய்எஸ்ஆர் 8 இடங்களிலும் ஜனசேனா 2 இடங்களிலும் வென்றது.

ஒய்எஸ்ஆர் வேட்பளர் தோல்வி

இந்த மாநகராட்சியின் 32 ஆவது வார்டில் ஜனசேனாவை சேர்ந்த பூலா சைதன்யா மோகன் போட்டியிட்டார். அவரை எதிர்த்து ஒய்எஸ்ஆர் காங்கிரஸ் கட்சியின் கே.ரெட்டி பிரசாத் போட்டி போட்டார். இதில் பூலா சைதன்யாவிடம் ரெட்டி பிரசாத் தோல்வியடைந்தார்.

கோபமடைந்த வேட்பாளர்

இதனால் கடும் கோபமடைந்த அவர் ஒரு வீடியோ வெளியிட்டுள்ளார். அது வைரலாகி வருகிறது. அந்த வீடியோவில் "அதிக வட்டிக்கு ரூ 10 லட்சம் கடன் வாங்கி ஓட்டுக்கு தலா ரூ 1000 என கொடுத்தேன். ஆனால் பணத்தை வாங்கிக் கொண்டு 400 வாக்காளர்கள் எனக்கு வாக்களிக்கவில்லை என்பது தேர்தல் முடிவுகளில் தெரிகிறது.

வாக்களிக்காதவர்கள்

பணத்தை வாங்கிக் கொண்டு எனக்கு வாக்களிக்காதவர்கள் உடனே பணத்தை திருப்பி தர வேண்டும். இல்லாவிட்டால் அவர்களது வீட்டு வாசலில் அமர்ந்து போராட்டம் நடத்துவேன். இந்த தேர்தலில் எனக்கே வாக்களிப்பதாக சில வாக்காளர்கள், மாரியம்மன் மீது சத்தியம் செய்து பணத்தை பெற்றனர்.

பணத்தை திருப்பி தாங்க

ஆனால் எனக்கு வாக்களிக்காமல் என்னை எதிர்த்து போட்டியிட்டவர்களுக்கு வாக்களித்துவிட்டனர். எனவே பணத்தை வாங்கிக் கொண்டு ஓட்டு போடாதவர்கள் என் பணத்தை மாரியம்மன் கோயிலில் வந்து திருப்பி கொடுக்க வேண்டும்.

நல்ல திட்டங்களை வைத்திருந்தேனே!

இந்த வார்டு மக்களுக்காக குடிநீர், சாலை, சுகாதாரம் உள்ளிட்ட அத்தியாவசிய தேவைகளை பூர்த்தி செய்து கொடுக்க உறுதியளித்திருந்தேன். ஆனால் என்னை சூழ்ச்சியால் தோற்கடித்துவிட்டார்கள். எது எப்படியோ வெற்றி பெற்றவர்களுக்கு வாழ்த்துக்கள். இந்த வார்டுக்கு நல்லது செய்ங்க என புலம்பி தள்ளிவிட்டார்.

புகார் அளிக்க முடிவு

உள்ளாட்சி தேர்தலில் ஒய்எஸ்ஆர் காங்கிரஸ் பணம் கொடுத்ததாக ஆதாரத்துடன் தெலுங்கு தேசம் தேர்தல் ஆணையத்தில் புகார் அளிக்க முடிவு செய்தது. இந்த நிலையில் ரெட்டி பிரசாத்தின் பேச்சால் கொந்தளித்த ஜெகன் மோகன் ரெட்டி, கட்சி நடவடிக்கைகளுக்கு எதிராக செயல்பட்டதாக அவரை கட்சியில் இருந்து நீக்க உத்தரவிட்டுள்ளார்.