ஹைதராபாத்: ஹைதராபாத்தில் உள்ள சாலைக்கு அமெரிக்க அதிபர் டொனால்ட் டிரம்பின் பெயர் சூட்டப்பட்டுள்ளது. இதனை அறிந்த டொனால்ட் டிரம்ப் நன்றி தெரிவித்துள்ளார். இந்த சாலையின் பெயரை தெலங்கானாவில் ஆட்சி செய்யும் காங்கிரஸ் அரசு மாற்றியதன் பின்னணியில் முக்கிய மேட்டர் உள்ளது.
தெலங்கானாவில் காங்கிரஸ் கட்சியின் ஆட்சி நடக்கிறது. முதல்வராக ரேவந்த் ரெட்டி உள்ளார். தெலங்கானாவின் தலைநகராக ஹைதராபாத் உள்ளது. உலகளவில் ஹைதாராபாத் நகரை புகழடைய வைத்து தொழில் முதலீடுகளை ரேவந்த் ரெட்டி திட்டமிட்டுள்ளார்.
அதன்படி ஹைதராபாத்தில் உள்ள சாலைகளுக்கு பிரபலமான தலைவர்களின் பெயரையும், பிரபல நிறுவனங்களின் பெயர்களையும் சூட்ட அவர் முடிவு செய்தார். அதன்படி ஹைதராபாத்தில் உள்ள அமெரிக்க துணைத் தூதரகத்தையொட்டிய உயர்மட்ட சாலைக்கு அமெரிக்க அதிபர் டொனால்ட் டிரம்பின் பெயர் வைக்க முடிவு செய்யப்பட்டது. அந்த சாலைக்கு டொனால்ட் டிரம்ப் அவென்யூ என்று பெயர் சூட்டப்பட்டுள்ளது. டொனால்ட் டிரம்ப் இன்னொரு நாட்டின் அதிபர் என்பதால் அவரது பெயரை வைக்க தெலுங்கானா அரசு மத்திய வெளியுறவுத்துறை அமைச்சகம் மற்றும் அமெரிக்க தூதரகத்துக்கு கடிதம் எழுதியது. இருதரப்பும் அனுமதி கொடுத்த நிலையில் தற்போது ஹைதராபாத்தில் உள்ள அமெரிக்க துணை தூதரகத்தையொட்டிய உயர்மட்ட சாலைக்கு டொனால்ட் டிரம்ப் அவென்யூ என்று பெயர் வைக்கப்பட்டுள்ளது. இதுபற்றி அறிந்த டொனால்ட் டிரம்ப் தனது ட்ரூத் வலைதள பக்கத்தில் நன்றி தெரிவித்துள்ளார். அந்த பதிவில், ''இந்தியாவின் ஹைதராபாத்தில் புதிதாக டொனால்ட் டிரம்ப் அவென்யூ உருவாக்கப்பட்டுள்ளது. அமெரிக்க அதிபர் ஒருவருக்கு இப்படியாக மரியாதை செய்வது இதுதான் முதல் முறை. நன்றி'' என கூறியுள்ளார். மேலும் அந்த பதிவில் தெலுங்கானா துணை முதல்வர் மல்லு பட்டி விக்ரமர்கா மற்றும் இந்தியாவுக்கான அமெரிக்க தூதர் செர்ஜியோ கோர் ஆகியோர் சேர்ந்து டொனால்ட் டிரம்ப் அவென்யூ பெயர் பலகையை திறந்து வைக்கும் போட்டோவை டொனால்ட் டிரம்ப் பகிர்ந்துள்ளார். முன்னதாக டெல்லியில் அமெரிக்க-இந்தியா ஸ்ரேட்டிஜிக் க பார்ட்னர்ஷிப் மன்றத்தின்(USISPF) ஆண்டு மாநாடு நடந்தது. இதில் தெலுங்கனா முதல்வர் ரேவந்த் ரெட்டி பங்கேற்று பேசினார். அப்போது ஹைதராபாத்தில் உள்ள முக்கியமான சாலைகளுக்கு உலகளாவிய நிறுவனங்களின் பெயர்களை சூட்ட வேண்டும் என்று அவர் முன்மொழிந்தார். அதன்படி ரேவந்த் ரெட்டி கூகுள் ஸ்ட்ரீட் (அமெரிக்காவிற்கு வெளியே கூகுளின் பெரிய வளாகம் ஹைதராபாத்தில் அமைகிறது), டொனால்ட் டிரம்ப் அவென்யூ உள்ளிட்ட பெயர்களை ஹைதராபாத்தில் உள்ள சாலைகளுக்கு சூட்ட உள்ளதாக தெரிவித்தார். இப்படியாக ஒவ்வொரு பிரபல நிறுவனங்கள் இருக்கும் சாலைகளுக்கும் அதன் பெயர் சூட்டப்படும்போது பிற நிறுவனங்களும் அங்கு முதலீடு செய்ய வாய்ப்புள்ளது. இவ்வாறு முதலீடுகள் செய்யும்போது வேலைவாய்ப்புகள் மற்றும் அரசுக்கான வருவாய் பெருகும். இதனால் தான் ரேவந்த் ரெட்டி இந்த நடவடிக்கையை எடுத்துள்ளார்.