மீண்டும் குட்டையை குழப்பும் இஸ்ரேல்.. டிரம்புக்கு தலைவலியாக மாறிய பெஞ்சமின் நெதன்யாகு!

போர் நிறுத்த விதிமுறைகள்

அமெரிக்கா - ஈரான் இடையே விரைவில் அமைதி ஒப்பந்தம் கையெழுத்தாகும் என எதிர்பார்க்கப்படும் நிலையில், அதன் முக்கிய அம்சங்கள் வெளியாகியுள்ளன. அதன்படி, இரு நாடுகளுக்கும் இடையிலான போர் நிறுத்தம் மேலும் 60 நாட்களுக்கு நீட்டிக்கப்படலாம். இந்த காலகட்டத்தில் ஈரானின் அணு திட்டம் தொடர்பாக தொழில்நுட்ப ரீதியான பேச்சுவார்த்தைகள் நடைபெற உள்ளன.

மேலும், அமெரிக்க கடற்படை விதித்துள்ள கடல்படை முடக்கங்கள் நீக்கப்பட்டு, உலக எண்ணெய் வர்த்தகத்தில் முக்கியமான ஹார்முஸ் நீரிணை மீண்டும் முழுமையாக திறக்கப்படலாம் என கூறப்படுகிறது. ஈரான் மீது விதிக்கப்பட்டுள்ள பொருளாதார தடைகள் தளர்த்துவது மற்றும் முடக்கப்பட்டுள்ள ஈரான் நிதிகளை விடுவிப்பது குறித்தும் அமெரிக்கா பேச்சுவார்த்தை நடத்த ஒப்புக்கொள்ளும் என தகவல்கள் தெரிவிக்கின்றன.

இந்த அமைதி ஒப்பந்தம் ஈரான் - அமெரிக்கா மட்டுமின்றி, லெபனானை உள்ளடக்கிய அனைத்து மோதல் தரப்பு மோதல்களுக்கும் நிரந்தர அமைதிக்கான அடித்தளத்தை உருவாக்கும் என எதிர்பார்க்கப்படுகிறது. இறுதி ஒப்பந்தம் ஜூன் 19-ஆம் தேதி சுவிட்சர்லாந்தில் கையெழுத்தாகும் என தகவல்கள் வெளியாகியுள்ளன. மேலும் விரிவான விவரங்கள் விரைவில் வெளியாகும் என எதிர்பார்க்கப்படுகிறது.

நெதன்யாகுவின் நிலைப்பாடு

இந்த நிலையில் அமெரிக்க அதிபர் டொனால்ட் டிரம்ப் அறிவித்த அமைதி ஒப்பந்தத்தில் உள்ள லெபனான் தொடர்பான விதியை இஸ்ரேல் ஏற்க முடியாது என்று நெதன்யாகு நேரடியாகத் தெரிவித்துள்ளது பெரும் சர்ச்சையாகியுள்ளது.

இஸ்ரேல் பாதுகாப்புப் படைகள் லெபனானின் தெற்குப் பகுதியில் இருந்து விலக மாட்டோம் என்றும், இந்த விதிக்கு இஸ்ரேல் கட்டுப்படாது என்றும் தெரிவித்துள்ளார். இந்த நிலைப்பாடு, அமெரிக்கா - ஈரான் இடையேயான அமைதி முயற்சிகளுக்கு புதிய சிக்கலாக உருவெடுத்துள்ளது.

ஒப்பந்தத்தின் முக்கிய அம்சம்

அமெரிக்காவும் ஈரானும் இடையே எட்டப்பட்ட அமைதி ஒப்பந்தத்தில், இஸ்ரேல் படைகளை லெபனானின் தெற்குப் பகுதியிலிருந்து உடனடியாக விலக்கிக் கொள்ள வேண்டும் என்று குறிப்பிடப்பட்டுள்ளது.

இந்த விதி, மத்திய கிழக்கு பகுதியில் நீண்டகாலமாக நிலவி வரும் பதற்றத்தை குறைக்கும் நோக்கத்துடன் இடம்பெற்றுள்ளது. ஆனால், இஸ்ரேல் இந்த விதியை ஏற்க மறுத்துள்ளதால், அமைதி ஒப்பந்தம் முழுமையாக நடைமுறைக்கு வருவதில் தடங்கல் ஏற்படும் அபாயம் உருவாகியுள்ளது.

இஸ்ரேலின் எதிர்ப்பு

இஸ்ரேல், லெபனானின் தெற்குப் பகுதியில் தனது இருப்பை தொடர்ந்து நிலை நிறுத்த விரும்புகிறது. இந்த காரணத்தால், அமெரிக்கா - ஈரான் இடையேயான அமைதி ஒப்பந்தத்தில் உள்ள லெபனான் விதியை இஸ்ரேல் ஏற்க மறுத்துள்ளது. இஸ்ரேல் தனது நிலையை மாற்றாது என்று நெதன்யாகு தெரிவித்துள்ளதால், அமெரிக்கா இஸ்ரேலை ஒப்பந்தத்தில் இணைத்துக்கொள்ள கடினமான பணியை எதிர்கொண்டுள்ளது.

அமெரிக்காவின் பொறுப்பு

அமெரிக்கா போர் நிறுத்தத்தை முடிவு செய்துள்ளதால், இஸ்ரேலை ஒப்பந்தத்தில் இணைத்துக்கொள்ளும் பொறுப்பு அமெரிக்காவிடமே உள்ளது. இருப்பினும், இஸ்ரேல் தொடர்ந்து ஒப்பந்தத்தை சீர்குலைக்க முயற்சிக்கும் என்று எதிர்பார்க்கப்படுகிறது.

இதனால் அமைதி ஒப்பந்த செயல்முறையில் இடையூறுகள் ஏற்பட வாய்ப்புள்ளது. ஆனால், அமெரிக்கா மோதலை முடிவுக்கு கொண்டு வர முடிவு செய்துள்ளதால் அடுத்து நடக்கும் ஒவ்வொரு விஷயமும் முக்கியமானதாக இருக்கப்போகிறது.