மதுரை: "தெய்வத்தின் சந்நிதியில் அனைவரும் சமம்" என்ற தத்துவத்தை மீண்டும் ஒருமுறை சட்டத்தின் மூலம் உரக்கச் சொல்லியிருக்கிறது மதுரை உயர்நீதிமன்றம். கோவில்களை நிர்வகிப்பதிலோ அல்லது வழிபாட்டு முறைகளிலோ சாதி அடிப்படையில் எவ்விதப் பிரிவினையும் காட்டக்கூடாது என நீதிமன்றம் பிறப்பித்துள்ள அதிரடி உத்தரவு, தமிழக ஆன்மீக மற்றும் சமூகச் சூழலில் பெரும் விவாதத்தை ஏற்படுத்தியுள்ளது.
தமிழகத்தின் பல பகுதிகளில் உள்ள கிராமக் கோவில்களில், திருவிழா நடத்துவதிலும், கோவில் நிர்வாகத்தைக் கவனிப்பதிலும் குறிப்பிட்ட சமூகத்தினருக்கு மட்டுமே முன்னுரிமை அளிக்கப்படுவதாகத் தொடர்ந்து புகார்கள் எழுந்த வண்ணம் உள்ளன.
குறிப்பாக, தென் மாவட்டங்களில் உள்ள சில கோவில்களில் 'வரி' வசூலிப்பதில் தொடங்கி, 'முதல் மரியாதை' செய்வது வரை சாதி ரீதியான பாகுபாடுகள் நிலவுவதாகக் கூறி தொடரப்பட்ட வழக்குகளை விசாரித்த போதே, நீதிமன்றம் இந்த வரலாற்றுச் சிறப்புமிக்க கருத்தைத் தெரிவித்துள்ளது. உதாரணமாக தஞ்சை மாவட்டத்தில் நாடியம்மன் கோயில், முனீஸ்வரன் கோயில் உள்பட பல கோயில்களில் பரம்பரை அறங்காவலர்கள் நிர்வகித்து வந்தனர். இதில் சாதி ரீதியான கோரிக்கைகள் எழுந்தன. இந்த நிலையில் கோயில் விவகாரத்தில் கடந்த அரசின் அமைச்சராக இருந்த சேகர்பாபு பரிந்துரையின் பேரில் முனீஸ்வரன் கோயிலை மட்டும் தனியாக பிரித்து தனி நிர்வாகத்தின் கீழ் அறநிலையத் துறை கொண்டு வந்தது. இதை எதிர்த்து தஞ்சையை சேர்ந்த மகிழன் என்பவர் மதுரை ஹைகோர்ட்டில் ஒரு மனு தாக்கல் செய்துள்ளார். அந்த மனுவில் ஜாதி ரீதியில் கோயில் நிர்வாகத்தை பிரிப்பது சட்டவிரோதம். எனவே முனீஸ்வரன் கோயிலை தனி நிர்வாகத்தில் கொண்டு வந்ததை ரத்து செய்து உத்தரவிட வேண்டும் என கோரிக்கை விடுத்திருந்தார். இதுகுறித்து எதிர்தரப்பினர் தங்களது வாதத்தில், நாடியம்மன் கோயில் பரம்பரை அறங்காவலர்களின் நிர்வாகத்தின் கீழ் உள்ளது. முனீஸ்வரன் கோயிலை உள்ளூர் மக்களில் சில தரப்பினர் குலதெய்வமாக வழிபடுகிறார்கள். பரம்பரை அறங்காவலரின் நிர்வாகத்தில் இருக்கும் போது வழக்கமான உரிமைகள் பாதிக்கப்பட்டன. இதனால் கோயிலை பிரிக்கும்படி கோரிக்கை வைத்ததன்பேரில் இந்த நடவடிக்கை எடுக்கப்பட்டுள்ளது என தெரிவித்திருந்தனர். இந்த வழக்கை விசாரித்த நீதிபதி பரதசக்கரவர்த்தி அமர்வு, மிகத் தெளிவான மற்றும் கடுமையான சில உத்தரவுகளைப் பிறப்பித்துள்ளது. கோவில்கள் என்பது பொதுச் சொத்துக்கள். அவற்றை நிர்வகிக்கும் குழுக்களில் ஒரு குறிப்பிட்ட சாதியினர் மட்டுமே ஆதிக்கம் செலுத்துவதை அனுமதிக்க முடியாது. அனைத்துத் தரப்பு மக்களையும் உள்ளடக்கிய நிர்வாகமே முறையானது. சாமி தரிசனம் செய்வதிலோ, அர்ச்சனை செய்வதிலோ அல்லது திருவிழாக்களில் பங்கேற்பதிலோ சாதி அடிப்படையில் எவரையும் ஒதுக்கக் கூடாது. இந்து சமய அறநிலையத்துறை, கோவில்களில் சாதி ரீதியான பிரிவினைகள் ஏற்படுவதைத் தடுக்கக் கடுமையான கண்காணிப்பை மேற்கொள்ள வேண்டும். மீறுபவர்கள் மீது சட்டப்படி நடவடிக்கை எடுக்கப்பட வேண்டும். பக்தியில் உயர்வு தாழ்வு கிடையாது. ஒரு குறிப்பிட்ட சமூகத்தினர் மட்டுமே கோவிலைத் தங்களுக்குச் சொந்தமானதாகக் கருதுவது சட்டவிரோதமானது. கோவில்கள் அமைதி நிலவும் இடமாக இருக்க வேண்டுமே தவிர, சாதிப் பெருமை பேசும் களமாக மாறக்கூடாது" என்று நீதிபதிகள் சுட்டிக்காட்டினர். மதுரை உயர்நீதிமன்றத்தின் இந்த உத்தரவு, பல ஆண்டுகளாகக் கோவில் திருவிழாக்களில் நிலவி வரும் மோதல்களுக்கு முற்றுப்புள்ளி வைக்கும் என்று எதிர்பார்க்கப்படுகிறது. குறிப்பாக, பட்டியலின மக்கள் கோவில் நுழைவுப் போராட்டங்களை நடத்தி வரும் சூழலில், இந்தத் தீர்ப்பு அவர்களுக்குக் கிடைத்துள்ள மிகப்பெரிய சட்ட ரீதியான வெற்றியாகப் பார்க்கப்படுகிறது. ஆன்மீகம் என்பது மனிதர்களை இணைக்க வேண்டுமே தவிர, பிரிக்கக் கூடாது. சட்டங்கள் பல வந்தாலும், மக்களின் மனங்களில் மாற்றம் ஏற்படும் போதே இத்தகைய தீர்ப்புகள் முழுமையான வெற்றியை அடையும். மதுரை உயர்நீதிமன்றத்தின் இந்த 'அதிரடி' உத்தரவு, சமத்துவத்தை நோக்கிய தமிழகத்தின் பயணத்தில் ஒரு முக்கிய மைல்கல் என்பதில் ஐயமில்லை!