வைகை நதியில் கார் பார்க்கிங்.. புகார் அளித்தும் தொடரும் அத்துமீறல்.. கொதிக்கும் சு.வெங்கடேசன்!

கள்ளழகர் ஆற்றில் இறங்கும் இடத்தில் இருப்பு கதவுகள் அமைக்கப்பட்டு மாநகராட்சியால் பூட்டு போடப்பட்டிருக்கும். இந்த பூட்டு திறக்கப்பட்டது எப்படி என்ற கேள்வியும் எழுந்துள்ளன. அதுமட்டுமல்லாமல் கோரிப்பாளையம் செல்ல இந்த பாதை முக்கியத்துவம் வாய்ந்தது என்பதால், காவல்துறையினர் எப்போதும் அங்கு வாகன தணிக்கையில் ஈடுபட்டிருப்பர்.

இதனையும் மீறி வைகை நதி கார் பார்க்கிங் செய்ய பயன்படுத்தப்பட்டது எப்படி என்றும் பொதுமக்கள் கேள்வி எழுப்ப தொடங்கி இருக்கின்றனர். இதுதொடர்பாக மதுரை சிபிஎம் எம்பி சு.வெங்கடேசன் தனது எக்ஸ் பக்கத்தில், வைகை நதியில் அழகர் ஆற்றில் இறங்கும் இடத்தில் இருக்கும் கதவுகள் திறக்கப்பட்டு, நதிக்குள்ளே வாகனங்கள் நிறுத்தப்பட்டுள்ளன.

காவிரி நதி நீர் பிரச்சனை.. சிந்து ஒப்பந்தத்தை கையில் எடுத்த கர்நாடகா! உச்ச நீதிமன்றத்தில் பதில் மனு

"நதி கார் பார்க்கிங்காக பயன்படுத்தப்படுகிறது" என்று நேற்றைய நாளிதழ் ஒன்று புகைப்படத்துடன் செய்தி வெளியிட்டிருந்தது. அதைப் பார்த்ததும் பொதுப் பணித்துறையின் தலைமைப் பொறியாளரிடம் பேசினேன். "அந்தக் கதவின் சாவிகள் பொதுப்பணித்துறை, மாநகராட்சி, காவல்துறை ஆகிய மூவரிடமும் இருக்கிறது.

நாங்கள் திறந்துவிடவில்லை" என்று கூறிய அவர், உடனடியாக நடவடிக்கை எடுப்பதாகத் தெரிவித்து, உள்ளே நிறுத்தப்பட்டிருந்த வாகனங்களை எல்லாம் வெளியேற்றிவிட்டு எனக்குப் புகைப்படம் ஒன்றையும் அனுப்பியிருந்தார். ஆனால், இன்று காலை மீண்டும் அதே இடத்தில், வைகை நதியில் கார்கள் பார்க்கிங் செய்யப்பட்டுள்ளதையும், கதவு முழுமையாகத் திறந்திருப்பதையும் பொதுமக்கள் புகைப்படம் எடுத்து அனுப்புகிறார்கள்.

வைகை நதியைப் பார்க்கிங்காகப் பயன்படுத்தக் காரணமானவர்கள் மீதும், அதற்குத் துணைபோகும் அதிகாரிகள் மீதும் மதுரை மாவட்ட ஆட்சியர் உடனடியாக நடவடிக்கை எடுக்க வேண்டுமெனக் கேட்டுக்கொள்வதாக பதிவிட்டுள்ளார். இந்த விவகாரத்தின் பின்னணியில் யார் இருக்கிறார்கள் என்ற கேள்வியும் எழுந்துள்ளன.