டைகர் ஷெராப் மீது அட்டாக்! சிறையில் இருந்தே சர்வதேச நெட்வொர்க்! பிஷ்னோய் கும்பல் இயங்குவது எப்படி?

அடுக்கு முறை கட்டமைப்பு

லாரன்ஸ் பிஷ்னோய் கும்பல் நான்கு முக்கிய அடுக்குகளாகப் பிரிக்கப்பட்டு இயங்குகிறது:

லாரன்ஸ் பிஷ்னோய் சிறையில் இருந்தாலும், அவரது முக்கிய வழிகாட்டுதல்கள் மற்றும் இலக்குகள் மட்டுமே அவரிடம் இருந்து வெளிவருகின்றன. கனடா மற்றும் அமெரிக்காவில் பதுங்கியிருக்கும் கோல்டி பிரார் மற்றும் லாரன்ஸின் தம்பி அன்மோல் பிஷ்னோய் போன்ற முக்கிய நபர்கள் இந்த உத்தரவுகளைச் செயல்படுத்தும் மேலாளர்களாக இருக்கிறார்கள். யார் மீது தாக்குதல் நடத்த வேண்டும், யாருக்குப் பணம் கொடுக்க வேண்டும் என்பதை இவர்களே முடிவு செய்கின்றனர்.

துப்பாக்கிகளை வட மாநிலங்களில் இருந்து கடத்தி வருவது, தாக்குதல் நடக்கும் இடத்தை முன்கூட்டியே நோட்டமிடுவது, தங்குமிடம் மற்றும் பைக்குகளை ஏற்பாடு செய்வது இவர்களின் வேலை. துப்பாக்கியை வாங்கிச் சுடும் அடிமட்ட இளைஞர்கள்.

'யாரென்றே தெரியாத' ரகசிய தொடர்பு

இந்தக் கும்பலின் மிகப்பெரிய பலமே, இதில் ஈடுபடும் யாருக்கும் முழு விவரம் தெரியாது என்பதுதான்.

உதாரணமாக, ஒரு இடத்தில் துப்பாக்கிச்சூடு நடத்த இரண்டு இளைஞர்கள் தேர்வு செய்யப்படுகிறார்கள் என்றால், அவர்களுக்கு உத்தரவு போடும் வெளிநாட்டு மேலாளர் யார் என்று தெரியாது. அவர்கள் கையில் துப்பாக்கியையும் தோட்டாக்களையும் கொடுக்கும் நபரை அவர்கள் இதற்கு முன் பார்த்திருக்கவே மாட்டார்கள். சம்பவ இடத்திற்கு அவர்களை பைக்கில் அழைத்துச் செல்லும் நபரும் புதியவராக இருப்பார்.

தாக்குதலுக்குப் பிறகு பணம் கொடுக்க வரும் நபர் கூட இவர்களுக்கு முன்பின் அறிமுகமில்லாதவராக இருப்பார். வழியில் அடையாளம் காண்பதற்கு கூட, அவர்கள் அணிந்திருக்கும் சட்டையின் நிறத்தை மட்டும் செல்போனில் படமெடுத்து அனுப்பி ஒருவரை ஒருவர் அடையாளம் கண்டு பணத்தை ஒப்படைப்பார்கள். இதனால், ஒரு துப்பாக்கிச்சூடு நடந்தவுடன் களத்தில் நின்ற நபரை போலீசார் உடனடியாகக் கைது செய்தாலும், அவர்களுக்கு மேலே உள்ள நபர்களைப் பற்றி எந்த தகவலும் தெரியாமல் போய்விடுகிறது.

சோஷியல் மீடியா மூலம் ஆள் பிடிக்கும் வலை

லாரன்ஸ் பிஷ்னோய் கும்பலில் உள்ள 700-க்கும் மேற்பட்ட ஆட்கள் எப்படி சேர்ந்தார்கள்?

பஞ்சாப், ஹரியானா, ராஜஸ்தான், மேற்கு உத்தரப் பிரதேசம் போன்ற பகுதிகளில் வேலையில்லாமல் இருக்கும் ஏழை இளைஞர்களை இவர்கள் குறிவைக்கிறார்கள். இன்ஸ்டாகிராம் மற்றும் பேஸ்புக்கில் லாரன்ஸ் பிஷ்னோயை ஒரு 'ஹீரோ' போல காட்டும் வீடியோக்கள், மாஸ் வசனங்கள் மற்றும் ரீல்ஸ்களை பரவ விடுகிறார்கள்.

இதனைப் பார்த்து கவரப்பட்டு, எளிதில் பணம் சம்பாதிக்கவும், ஊருக்குள் 'பெரிய தாதா' என்ற பெயரைப் பெறவும் ஆசைப்படும் இளைஞர்களை அடையாளம் கண்டு ரகசியமாகப் பேசுகிறார்கள். ஆரம்பத்தில் வெறும் 10,000 முதல் 15,000 ரூபாய் செலவுப் பணத்தைக் கொடுத்து, "யாருக்கும் காயம் ஏற்படாமல் வானத்தை நோக்கிச் சுட்டுவிட்டு வா" என்று கூறி உள்ளே இழுக்கிறார்கள். ஒருமுறை உள்ளே வந்து துப்பாக்கியைத் தொட்ட பிறகு, அவர்களால் மீண்டும் வெளியே வர முடியாத அளவுக்கு வழக்குகளில் சிக்க வைத்து நிரந்தரக் கூலிப்படையாக்கி விடுகிறார்கள்.

சிக்னல், டெலிகிராம் மற்றும் விர்ச்சுவல் எண்கள்

காவல்துறையின் கண்காணிப்பில் இருந்து தப்பிக்க இவர்கள் வழக்கமான மொபைல் அழைப்புகளைப் பயன்படுத்துவதே இல்லை. வெளிநாட்டு எண்களைக் கொண்டு உருவாக்கப்பட்ட இணையதள அழைப்புகள், என்கிரிப்ட் செய்யப்பட்ட சிக்னல் மற்றும் டெலிகிராம் செயலிகள் மூலமாக மட்டுமே பேசுகிறார்கள். ஒரு சிறிய விஷயத்தைப் பேசி முடித்த உடனேயே அந்த செயலியை அழித்துவிட்டு புதிய எண்களுக்கு மாறிவிடுகிறார்கள்.

போலீசாருக்கு ஏன் பெரும் சவாலாக உள்ளது?

சிறைக்குள் இருக்கும் ஒரு தலைவன், வெளிநாடுகளில் பதுங்கியிருக்கும் மேலாளர்கள், மாநில எல்லைகளைக் கடந்து நடக்கும் பணப் பரிவர்த்தனைகள், சமூக வலைதளங்களில் சிக்கி பலியாகும் அப்பாவிக் கூலிப்படை இளைஞர்கள்.. என பல அடுக்குகளாகப் பிரிந்து கிடப்பதே இந்தக் கும்பலின் பலம்.

களத்தில் சுடும் ஆட்கள் கைது செய்யப்பட்டாலும், வெளிநாடுகளில் இருந்து அடுத்தடுத்த இளைஞர்களைத் தூண்டிவிட்டு தாக்குதல்களை தொடர்ந்து அரங்கேற்றி வருவதால், இந்த ஒட்டுமொத்த சங்கிலியை உடைப்பது புலனாய்வு அமைப்புகளுக்குத் தொடர் சவாலாகவே நீடிக்கிறது.