மும்பை: மகாராஷ்டிரா அரசியலில் இப்போது மிகப் பெரிய மாற்றம் நடந்துள்ளது. தாக்கரே தரப்புக்கு மொத்தம் 9 எம்பிக்கள் இருந்த நிலையில், அவர்களில் 6 பேர் என்டிஏ தரப்பிற்குத் தாவியுள்ளனர். மேலும், தனது தரப்பு சிவசேனா கட்சியைக் காங்கிரஸ் கட்சியுடன் முழுமையாக இணைக்க உத்தவ் தாக்கரே திட்டமிட்டுள்ளதாகவும் இவர்கள் விமர்சித்துள்ளனர்.
மகாராஷ்டிர அரசியலில் மீண்டும் ஒரு பெரும் புயல் வீசத் தொடங்கியுள்ளது. முன்னாள் முதலமைச்சர் உத்தவ் தாக்கரே தலைமையிலான சிவசேனா கட்சியைச் சேர்ந்த ஆறு எம்.பி.க்கள், தங்களை உத்தவ் அணியிலிருந்து விடுவித்துக்கொண்டு, முதலமைச்சர் ஏக்நாத் ஷிண்டே தலைமையிலான அணியுடன் இணைய முடிவு செய்துள்ளனர். இதற்காக அவர்கள் டெல்லியில் மக்களவை சபாநாயகர் ஓம் பிர்லாவை நேரில் சந்தித்துப் பேசியுள்ளனர்.
இந்த ஆறு எம்.பி.க்களும் தாங்கள் ஏன் கட்சியை விட்டு வெளியேறுகிறோம் என்பதற்கான காரணங்களைச் சபாநாயகரிடம் விரிவாக விளக்கியுள்ளனர். உத்தவ் தாக்கரேவின் சிவசேனா அதன் உண்மையான கொள்கையிலிருந்து விலகிவிட்டதாக அவர்கள் குற்றம் சாட்டியுள்ளனர். குறிப்பாக, உத்தவ் தாக்கரே தனது கட்சியை எதிர்காலத்தில் காங்கிரஸ் கட்சியுடன் முழுமையாக இணைக்கத் திட்டமிட்டுள்ளதாகவும், இது தங்களுக்கு உடன்பாடு இல்லாத ஒன்று என்றும் அவர்கள் கூறியுள்ளனர். காங்கிரஸ் கட்சியுடன் கூட்டணி வைத்திருப்பதே தங்களுக்குப் பிடிக்கவில்லை என்றும், இந்த இணைப்பு முயற்சியே தாங்கள் வெளியேற முக்கிய காரணம் என்றும் அவர்கள் தெரிவித்துள்ளனர். மேலும், உத்தவ் தாக்கரே மற்றும் அவரது மகன் ஆதித்ய தாக்கரே ஆகியோர் மீது இந்த எம்பிக்கள் கடும் அதிருப்தியில் இருந்ததாகத் தெரிகிறது. உத்தவ் தாக்கரே தங்களைச் சந்திக்க நேரம் ஒதுக்குவதில்லை என்றும் தங்கள் தொகுதிகளுக்கு அவர் நேரில் வந்து மக்களைச் சந்திப்பதில்லை என்றும் அவர்கள் புகார் கூறியுள்ளனர். தேர்தல் நேரங்களில் கட்சித் தலைமையிடமிருந்து தங்களுக்கு முறையான ஆதரவு கிடைப்பதில்லை என்றும் ஆதித்ய தாக்கரேவை சந்திப்பது கூட தங்களுக்குக் கடினமாக இருப்பதாகவும் அவர்கள் சபாநாயகரிடம் முறையிட்டுள்ளனர். சபாநாயகர் ஓம் பிர்லாவை சந்தித்த இந்த எம்.பி.க்கள், நாடாளுமன்றத்தில் தங்களுக்கு ஒதுக்கப்பட்டுள்ள இருக்கைகளை மாற்றித் தருமாறு கோரிக்கை விடுத்துள்ளனர். ஏக்நாத் ஷிண்டே அணியைச் சேர்ந்த ஏழு எம்பிக்கள் அமர்ந்துள்ள இடத்திற்கு அருகிலேயே தங்களுக்கும் இடங்களை ஒதுக்க வேண்டும் என்று அவர்கள் கேட்டுக்கொண்டுள்ளனர். இந்தத் திட்டம் மிகவும் ரகசியமாகவும் திட்டமிட்டபடியும் அரங்கேற்றப்பட்டுள்ளது. கடந்த சில நாட்களாக இந்த ஆறு எம்.பி.க்களும் செல்போன்களை சுவிட்ச் ஆப் செய்திருந்தனர். தாக்கரே தரப்பால் இவர்களைத் தொடர்பு கொள்ளக்கூட முடியவில்லை. அவர்கள் வெவ்வேறு இடங்களிலிருந்து தனி விமானங்கள் மூலம் டெல்லிக்கு வந்து சேர்ந்துள்ளனர். நாகேஷ் அஷ்டிகர் ஜூன் 16 அதிகாலை 1.30 மணிக்கு நாந்தேடில் இருந்து தனி விமானத்தில் வந்தார். ஓம்ராஜே நிம்பால்கர் புனேவில் இருந்து அதிகாலை 4.30 மணிக்கு வந்தார். அவருடன் ஏக்நாத் ஷிண்டேவின் மகன் ஸ்ரீகாந்த் ஷிண்டேவும் வந்திருந்தார். சஞ்சய் தேஷ்முக், சஞ்சய் ஜாதவ், பாவுசாகேப் வாக் சௌரே மற்றும் சஞ்சய் தினா பாட்டீல் ஆகியோரும் அடுத்தடுத்து டெல்லி வந்து சேர்ந்தனர். டெல்லி வந்த இவர்கள் அனைவரும் நொய்டாவில் உள்ள ஒரு ஹோட்டலில் தங்க வைக்கப்பட்டனர். முதலமைச்சர் ஏக்நாத் ஷிண்டே ஜெய்ப்பூர் வழியாக டெல்லி வந்து இவர்களைச் சந்தித்தார். ஸ்ரீகாந்த் ஷிண்டேவின் இல்லத்தில் நடந்த ஆலோசனைக் கூட்டத்திற்குப் பிறகு, அவர்கள் சபாநாயகரை சந்தித்தனர். இந்த அதிரடி மாற்றத்தால் உத்தவ் தாக்கரே தரப்பு கடும் கோபத்தில் உள்ளது. கட்சித் தாவலில் ஈடுபட்ட இந்த ஆறு எம்.பி.க்களுக்கும் ஏழு நாட்களுக்குள் விளக்கம் அளிக்கக் கோரி நோட்டீஸ் அனுப்பப்பட்டுள்ளது. அவர்கள் மீது கட்சி விரோத நடவடிக்கை எடுத்திருப்பதாகக் கூறி, சபாநாயகர் அவர்களின் கோரிக்கையை ஏற்கக் கூடாது என்று உத்தவ் தரப்பு வலியுறுத்தியுள்ளது. இந்த ஆறு எம்.பி.க்களின் ஆதரவு ஏக்நாத் ஷிண்டே அணிக்குக் கிடைப்பது, மகாராஷ்டிராவில் அவரது பலத்தை அதிகரிக்கும். அதேபோல என்டிஏ அரசின் பலமும் அதிகரிக்கிறது. குறிப்பாக, மகளிர் இட ஒதுக்கீடு மசோதா போன்ற முக்கியமான சட்டங்களை நிறைவேற்ற இந்த ஆறு எம்.பி.க்களின் வாக்குகள் பா.ஜ.க-வுக்கு மிகவும் உதவியாக இருக்கும். வரும் சனிக்கிழமை அன்று இந்த எம்.பி.க்கள் மீண்டும் முதலமைச்சர் ஷிண்டேவைச் சந்தித்து, தங்கள் அடுத்தகட்ட முடிவுகளை அதிகாரப்பூர்வமாக அறிவிக்க உள்ளனர்.காங்கிரஸ்- சிவசேனா
அதிருப்தி
என்ன நடந்தது
உத்தவ் தாக்கரே