நாகர்கோவில்: கன்னியாகுமரி மாவட்டத்தில் பேருந்துக்காக காத்திருந்த கல்லூரி மாணவிக்கு லிஃப்ட் தருவதாகச் சொல்லி அழைத்துச் சென்று பாலியல் தொல்லை கொடுத்த தவெக முன்னாள் நிர்வாகி கிறிஸ்டோபர் கைது செய்யப்பட்டுள்ளார்.
நாகர்கோவிலில் உள்ள கல்லூரியில் படிக்கும் மாணவி ஒருவர், கன்னியாகுமரி மத்திய மாவட்ட தவெக இளைஞர் அணி நிர்வாகியான தனது தோழியுடன் அண்மையில் ஒரு நாள் மாலை பேருந்துக்காக காத்திருந்தார். அப்போது, தக்கலை பகுதியைச் சேர்ந்த தவெக மத்திய மாவட்ட தவெக செயற்குழு உறுப்பினர் கிறிஸ்டோபர் அந்த வழியாக காரில் வந்துள்ளார்.
அவரது காரில் இருவருக்கும் லிஃப்ட் கொடுத்துள்ளார். முதலில் தனது ஊரான மூலச்சலில் தவெக பெண் நிர்வாகியான மாணவி இறங்கிக்கொண்டார். மற்றொரு கல்லூரி மாணவியை அவரது ஊரில் கொண்டு விடுவதாக கூறி அழைத்துச் சென்ற கிறிஸ்டோபர், பாதி வழியில் பெட்ரோல் பங்க்கில் எரிபொருள் நிரப்பியபோது கண்ணாடியை துடைப்பது போல பாலியல் தொல்லை கொடுத்துள்ளார். அதிர்ச்சி அடைந்த மாணவி, அவரை கடுமையாக திட்டிவிட்டு இறங்கிச் சென்றுள்ளார். இதுகுறித்து, தவெக நிர்வாகியான தனது தோழியிடம் கூறி மாணவி அழுதுள்ளார். இதையடுத்து அவர் கொற்றிக்கோடு காவல் நிலையத்துக்கு மாணவியை அழைத்துச் சென்று புகார் அளித்துள்ளார். போலீசார் வழக்கு பதிவு செய்யாமல் பஞ்சாயத்து பேசி பண பேரம் நடத்தியதாக கூறப்படுகிறது. இந்நிலையில், மாணவிக்கு நேர்ந்த துயரம் குறித்த தகவல் சமூக வலைதளங்களில் பரவி, கடும் விமர்சனங்களை ஏற்படுத்தியது. இதையடுத்து மாவட்ட எஸ்.பி அன்சுல் நாகர் உத்தரவின் பேரில், தக்கலை மகளிர் போலீசார் விசாரணை நடத்தி, கிறிஸ்டோபர் மீது 2 பிரிவுகளின் கீழ் வழக்கு பதிவு செய்து, அவரைத் தேடி வந்தனர். இந்த பாலியல் புகார் விவகாரத்தை தொடர்ந்து, தவெகவில் இருந்து கிறிஸ்டோபர் நீக்கப்பட்டார். இந்நிலையில், தலைமறைவாக இருந்து வந்த கிறிஸ்டோபரை போலீசார் கைது செய்துள்ளனர்.சோகத்தில் செம்மலை.. பதவி கொடுக்காத தவெக தலைமை.. அலர்ட் மோடில் காய் நகர்த்தும் தமிழன் பார்த்திபன்!